Ахада хантәаҩра ззиуаз Аҧсни Урыстәылеи Ршәарҭадара Ахеилакқәа раппаратқәа злахәыз Аилацәажәара

11.06.2019
Ахада хантәаҩра ззиуаз Аҧсни Урыстәылеи Ршәарҭадара Ахеилакқәа раппаратқәа злахәыз Аилацәажәара

Рашәарамза 11 рзы имҩаҧысит Аҧсны Аҳәынҭқарра Ахада Рауль Ҳаџьымба хантәаҩра ззиуаз Аҧсны Аҳәынҭқарреи Урыстәылатәи Афедерациеи Ршәарҭадара Ахеилакқәа раппаратқәа злахәыз Аилацәажәара.

Ахада аилацәажәара иалахәыз аҧсшәа реиҳәеит.

«Бзиала шәаабеит ҳәа шәасҳәоит еиҭа Аҧсны. Имҩаҧысуеит Ашәарҭадара Ахеилаки егьырҭ аиҵаҟәшақәеи алархәны ҳусеицура арҕәҕәара хықәкыс измоу аусура. Ҳара уанӡа ихацыркыз аусура амҽхак зегьы иацҵаны аусура ҳазхиоуп. Ҳәарада, уи ҳажәларгьы ирҭахуп, ҳҳәынҭқаррагьы. Иҟоуп зҵаарақәак, урҭ шәареи ҳареи ҳрылацәажәараны ҳаҟоуп. Сгәы иаанагоит, 2014 шықәсазтәи Аиқәшаҳаҭраҟны иазгәаҳҭахьаз аусмҩаҧгатәқәа рынагӡаразы еиҳа гәацҧыҳәарала аусура шаҭаху азы аилкаара ҟалап ҳәа, ахырхарҭақәа жәпакы рынагӡаразы ҳамчқәа еибаҳҭар акәхоит», - иазгәеиҭеит Ахада.

Урыстәылатәи Афедерациа Ашәарҭадара Ахеилак Амаӡаныҟәгаҩ ихаҭыҧуаҩ Рашид Нургалиев Рауль Ҳаџьымба иҭабуп ҳәа иеиҳәеит иҟаиҵаз адкыларазы:

«Иҭабуп ҳәа шәасҳәоит иҟашәҵаз адкылареи ҳусуразы иаҧҵоу аҭагылазаашьеи рзы. Шәареи ҳареи иацы ҳаиқәшәеит, ҳалацәажәеит иахьа иҳаӡбараны иҟоу азҵаарақәа злоу инарҭбааны ишьақәыргылоу амшхәаҧштәы».

Аиҧылараҟны ирылацәажәан Аҧсны Аҳәынҭқарра асоциалтә-економикатә ҿиара ацхрааразы Аинвестициатә программа анагӡашьа иазку азҵаарақәа. Урҭ рыҩныҵҟа иҟоуп асоциалтәи атранспорттәи инфраструктура аҿиара азҵаарагьы. Аганқәа иара убас ирылацәажәеит амедицинатә цхыраара аҟаҵаразы аинфраструктура аҿиара азҵаарақәа, адиспансеризациа алҵшәақәа, апенитенциартә (азинхархәаратә) усбарҭа ҿыц аргылара, аҧсны-урыстәылатәи аҳәаа ахысразы ганрацәалатәи автомашьынатә зоужьратә пункт аусура, иара убас амармалташьтә бжы аныхра иазку ауснагӡатәқәа рымҩаҧгара уҳәа егьырҭ азҵаарақәагьы.


Возврат к списку