Аҧсны Аҳәынҭқарра Ахада

 

Витали Габниа Страикбол азы агәыҧ «Нерс Атактикатә еиҟәша» даҧылеит

21.02.2018

Жәабранмза 21 рзы Аҧсны Аҳәынҭқарра Ахада Ихаҭыҧуаҩ  Витали Габниа страикбол азы Аҧсны Аҳәынҭқарра агәыҧ  «Нерс Атактикатә еиҟәша” даҧылеит.

Жәабранмза 21 рзы Ахада Ихаҭыҧуаҩ  Витали Габниа ихьӡала адипломатиатә ҧочҭала аконверт ааит Асовет Еидгыла афырхацәа, Урыстәылатәи Афедерациа афырхацәа, аџьшьаратә бҕьыци аҧсуа ҳәынҭқарратә символика змоу адыргақәеи зцу Ахьӡ-аҧша аорден наӡа занашьоу рыклуб арра-тактикатә хәмаррақәа реиҿкааратә еилакы аҟнытә.

Ахада Ихаҭыҧуаҩ  агәыҧ  Урыстәылатәи Афедерациа Атәылахьчара аминистрра акубок «АШӘАҦШЬ: уахыки ҽнаки ахьчараҟны» азы 11-тәи Жәларбжьаратәи арра-тактикатә хәмаррақәа рыҟны аиааира рыдиныҳәалеит. Уи мҩаҧысуан 2017 шықәса цәыббрамза  9 инаркны цәыббрамза  11 -нӡа ахысырҭа «Алабино» аҟны Москватәи аобласт аҿы.

Витали Габниа иазгәеиҭеит ари аусмҩаҧгатә аҽалархәра ҳреспублика аҿар рзы акраҵанакуеит апатриотизм иаша рыланааӡоит азы. 

«Арра-патриотттә ааӡара игыло абиҧарақәа рзы аҵакы амоуп. Шәара иахьа ҳтәылаҿы аҿарацәа рзы  ҿырҧшыга бзианы шәыҟоуп», - иаҵшьны иҳәеит Ахада Ихаҭыҧуаҩ.

  «Нерс Атактикатә еиҟәша» акомандаҟаҵаҩ  Денис Шашура Ахада Ихаҭыҧуаҩ иҭабуп ҳәа иеиҳәеит имҩаҧигаз аиҧыларазы.

Уи иҳәеит агәыҧ еиҿкаауеижьҭеи шықәсык шыҵуагьы алҵшәақәа шамоу. 

«Ҳара Израильнтәи иҟаз, атехника аганахьала ибзиаӡаны иеибыҭаз, насгьы аҽазыҟаҵара шықәсык иеиҳаны измоу агәыҧ ҳаҧысит.  Урҭ очкок ауп ҳахьраҧысыз, аха уи ҳара ҳзы акраҵанакуеит», - иҳәеит иаартны Денис Шашура.

Урыстәылатәи Афедерациа Атәылахьчара аминистрра иаҿыгоу аиҿкаара «Ашәаҧшь»  аҟнытә иара убас Аҧснытәи агәыҧ иеиуеиҧшым аџьшьаратә бҕьыцқәа анашьан.  

  Денис Шашура иажәақәа рыла, «АЕ НЕРС» акрызҵазкуа еихьӡараны иамоу ҳәа иҧхьаӡоуп ахәыҷқәа ргәыҧ. Ари агәыҧ аус ауеит хәыда-ҧсада, 9 шықәса зхыҵуа ахәыҷқәа аднакылоит. 

Денис Шашура иара убас аҳәара ҟаиҵеит Аҧсны 500 –ҩыуаак злахәхо страикбол азы ахәмаррақәа реиҿкаараҿы ацхыраара рырҭаразы. Урҭ ахәмаррақәа рымҩаҧгара азгәаҭоуп ҧхынгәымза 29 рзы. 

Витали Габниа иаҵшьны иҳәеит Аҧсны Аҳәынҭқарра анапхгара аганахьала агәыҧи ахәмаррақәа Аҧсны рымҩаҧгареи рыҟны ацхыраара рыҭаразы иалшо зегьы шыҟанаҵо. 

 

 


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT