Аҧсны Аҳәынҭқарра Ахада

 

Рауль Ҳаџьымба Ҟабарда-Балкариеи Аедыгтәылеи рахь ивизит аихшьалақәа рзы Ахада Ипресс-маӡаныҟәгаҩ абрифинг мҩаԥылгеит

Рауль Ҳаџьымба Ҟабарда-Балкариеи Аедыгтәылеи рахь ивизит аихшьалақәа рзы Ахада Ипресс-маӡаныҟәгаҩ абрифинг мҩаԥылгеит 12.09.2017

Цәыббрамза 12 рзы Аԥсны Аҳәынҭқарра Ахада Ипресс-маӡаныҟәгаҩ Наала Аҩӡыԥҳа Рауль Ҳаџьымба Ҟабарда-Балкариеи Аедыгтәылеи рахь ивизит аихшьалақәа рзы абрифинг мҩаԥылгеит

***

Мшыбзиақәа, ҳаҭыр зқәу сколлегацәа! Иацы Ахада Ҟабарда-Балкариеи Аедыгтәылеи рҟынтәи Иԥсадгьыл ахь дхынҳәит.

Арҭ аҳәаанырцәтә ныҟәарақәа рахь Аԥсны Ахада ддәықәлеит ареспубликақәа рхадацәа рааԥхьарала, аофициалтә усмҩаԥгатәқәа ихы рылаирхәырц азы. Рауль Џьумка-иԥа дырԥылеит нхыҵкавказтәи ареспубликақәа рхадацәеи Ҟабарда-Балкариеи Аедыгтәылеи рҟынтәи Аԥсны хатәгәаԥхарала иеибашьуаз ҳашьцәеи.

Ҷыдала ирзааҭгылатәуп Рауль Џьумка-иԥеи, Аԥсны Аџьынџьтәылатә еибашьраан хатәгәаԥхарала иеибашьуаз ҳветеранцәеи, урҭ рҭаацәарақәеи реиԥыларақәа. Арҭ аиҿцәажәарақәа раан ирылацәажәеит аибашьцәа рсоциалтә проблемақәа, ирзааҭгылеит урҭ рыӡбаразы иҟаҵатәу ашьаҿақәа. Ахада аҳәынҭқарра излалшо ала дара зегьы ацхыраара роуроуп ҳәа азгәеиҭеит. Иахьатәи аамҭазы иҭахақәаз рҭаацәарақәеи аинвалидцәеи ишзалшо ала ҳархылаԥшуеит ҳәа азгәеиҭеит Ахада.

Хатәгәаԥхарала иеибашьуази урҭ рҭаацәарақәеи ишьҭырхуаз азҵаарақәа иреиуан Аԥсны Аҳәынҭқарра атәылауаҩра аиура, атәанчаҩхәқәа рыҭара, анхарҭа ҭыԥқәа рзы адокументқәа реиқәыршәара уҳәа ирацәаны. Иара убасгьы Нхыҵ Кавказ ареспубликақәа рҟны аҭагылазаашьа уадаҩқәа ирықәшәаз ҳветеранцәа ацхыраара рыҭара.

Аԥсны уалԥшьас иадуп уи ахақәиҭразы зшьа казҭәаз афырхацәа ганрацәала рыцхраара, иҳәеит инаҵшьны Ахада.

Хатәгәаԥхарала иеибашьуази Аԥсны Ахадеи еибырҳәеит абас еиԥш аиԥыларақәа наҟ-наҟгьы рымҩаԥгара, нхыҵкавказтәи ареспубликақәа рхадацәа рыҿцәажәара, урҭ еицырзеиԥшу ауадаҩрақәа рыӡбаразы аицхыраара шаҭаху. Урҭ ареспубликақәа рхадацәа Мураҭ Кумпилов иинаугурациаан Рауль Ҳаџьымба агәра идыргеит Аԥсны Аџьынџьтәылатә еибашьра аветеранцәа рызҵаарақәеи егьырҭ асоциалтә зҵаарақәеи рыӡбараҟны Аԥсны адгылара шарҭало.

Ахада ивизит аан нхыҵкавказтәи ареспубликақәа русдкылаҩцәеи Урыстәылатәи Афедерациа Аиҳабыра ахаҭарнакцәеи алархәны далацәажәеит амшынтә баӷәазақәа рхархәарала Урыстәылатәи Афедерациа ақыҭанхамҩатә аалыҵқәа рекспорт амҩаԥгара азҵаарагьы.

Уи аус шдырманшәало азы Ахада ддыргәыӷит.

Уи адагьы, Нхыҵ Кавказ абизнес ду ахаҭарнакцәа Аԥсны атуризм аинвестициақәа ралагалара ишазыхиоу иазааҭгылеит. Уи атәы макьана инарҭбааны ҳзаламцәажәозаргьы, Ахада ивизит иалҵшәа бзиахеит ҳәа аҳәара ҳалшоит.

Нхыҵкавказтәи ареспубликақәа рхадацәа зегьы Аԥсни дареи реимадарақәа рырӷәӷәаразы амҩақәа ирылацәажәон. Хатәгәаԥхарала иеибашьуази дареи реиԥыларақәа раан инарҭбааны иалацәажәеит наҟ-наҟтәи русеицура, иеицырзеиԥшу аусмҩаԥгатәқәа реиҿкаара азҵаарақәа. Убас, ҷыдала иазааҭгылеит Ахақәиҭра Амши Хатәгәаԥхарала иеибашьуаз Рымши Аԥсны адагьы, Нхыҵ Кавказ ареспубликақәа рҟны разгәаҭара шхымԥадатәиу. Акультуратә, агуманитартә усхкқәа, аҿартә политикеи аспорти ирызку уснагӡатәқәакгьы ирылацәажәеит.

Аҵыхәтәаны иҳәатәуп Аԥсны Ахада ҳҳәынҭқарратә усбарҭақәа рҿаԥхьа уаанӡа анапы зҵаҩыз аиқәшаҳаҭрақәа зегьы аусура раларгара дҵаны ишықәиргылаз. Нхыҵкавказтәи ахадацәа уи иазыхиоуп.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT