Аҧсны Аҳәынҭқарра Ахада

 

Витали Габниа Павел Орлов иҭаацәа «Леон» иорден рнапы иаиркит

Витали Габниа   Павел Орлов иҭаацәа «Леон» иорден рнапы иаиркит 26.07.2017

Витали Габниа Павел Орлов иҭаацәа «Леон» иорден рнапы иаиркит

Ҧхынгәымза 26 рзы Аҧсны Аҳәынҭқарра Ахада Ихаҭыҧуаҩ Витали Габниа Аҧсны Аџьынџьтәылатә еибашьра аветеран Павел Орлов иҭаацәа рнапы иаиркит Павел Орлов иҧсрашьҭахь ианашьаз «Леон» иорден.

Витали Габниа иазгәеиҭеит, ари аибашьҩы дызлаз архәҭа Атәылахьчара аминистрра аҿаҧхьа иқәнаргылаз азҵаара инамаданы иагханы иҟаҵоу ҳамҭоуп.

«Павел 2-тәи абригада 1-тәи абаталион иалаз агәымшәара злаз еибашьҩын, ицеибашьуаз иҩызцәа аҳамҭа иҭатәуп ҳәа ирыҧхьаӡеит, уи агьиашахаоит. Шықәсык аҟара бжьысит аҳамҭа анианашьаз аахижьҭеи, аха уи иҧа аҳамҭа иҭаразы аҭагылазаашьа абыржәоуп ианҳауыз», - иҳәеит Ахада Ихаҭыҧуаҩ.

Витали Габниа иазгәеиҭеит Павел Орлов Аҧсны дышиз, ара дшааӡаз, аха аибашьрахь Москвантәи дшааз, усҟан иҭаацәагьы ара ишынхоз.

«Уи Аҟәа инхоз аҵарауаҩ, ауаажәларратә усзуҩы Алеқсандр Орлов-Кретчмери Аида Карбеи рҧа иакәын. Аибашьра зегьы ихигеит, еиҳа иуадаҩыз аибашьратә операциақәа дрылахәын, Аҧсны аҳҭнықалақь агаразы ажәылараан хәажәкыра 16 рзы дырхәит. Иара убас апозициатә еибашьра далахәын», - иҳәеит иара.

Ахада Ихаҭыҧуаҩ иацҵаны иҳәеит Павел Орлов аибашьра ашьҭахь иаразнак Москваҟа дшымцаз.

«Ишдыру еиҧш, аибашьрашьҭахьтәи ашықәсқәа рзы Гал араион аҟны аҭагылазаашьа уадаҩын, аҕа уажәы-уажәы зны қыҭак инапаҿы иааигон, нас даҽакы. Павел аибашьра ашьҭахь даҽа ҩышықәсаҟа Егры аӡиас аҟны аҳәынҭқарратә ҳәаа ахьчаразы дгылан, изныкымкәа имҩаҧысуаз аидысларақәа дрылахәын. Иара убас уи Адҵа ҷыда змаз аотриад, ашьҭахь Адҵа ҷыда змаз ацентр аҧҵара далахәын, аофицер иаҳасабала аррамаҵзура дахысуан», - иазгәеиҭеит Витали Габниа.

Ахада Ихаҭыҧуаҩ агәра ганы дшыҟоу иҳәеит аибашьра анымҩаҧысуаз ҳамҭак амацара акәымкәа, 1941-1945 шш. раан еиҧш аибашьратә хҭысқәа зегьы рзы акәызҭгьы, Павел Орлов «игәышҧы зегьы орденла иҩычазаарын» ҳәа.

Павел Орлов иҧшәмаҧҳәыс Ирма Гамсаниеи уи иҧа Виачеслави абри аҳамҭа ианашьара иалахәхаз зегьы иҭабуп ҳәа рарҳәеит.

Аҳамҭа аҭара ацеремониаҟны иҟан Павел Орлов иҧшәмаҧҳәыс Ирма Гамсаниеи, иҧа Виачеслави, иҧҳа Аннеи.

IMG_5739.JPG


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT