Аҧсны Аҳәынҭқарра Ахада

 

Ацҳамҭақәа

Аҧсны Аҳәынҭқарра Абираҟ Амш азы адныҳәалара 23.07.2018

Аҧсны Аҳәынҭқарра Абираҟ Амш азы адныҳәалара

Ҧхынгәымза 23 рзы Аҧсны Аҳәынҭқарра Ахада Рауль Ҳаџьымба Аҧсны жәлар ирыдиныҳәалеит Аҧсны Аҳәынҭқарра Абираҟ

***
Ҳаҭыр зқәу ҳауаажәлар!

Аҧсны Аҳәынҭқарра аҭоурыхаҿы иҟоуп хашҭра зқәым, ҳаҿиарамҩаҿы аҭыҧ ҷыда аанызкыло ахҭысқәа. Урҭ иреиуоуп амилаҭтә ҳәынҭқарратә символқәа ирыдҳәалоу амшқәа.

 Шәышықәсала еиқәырханы иааргон аҧсуа ҳәынҭқарцәа, аҧхьагылаҩцәа, аибашьцәа гәымшәақәа аиааиреи ахьыҧшымреи рбираҟқәа. Аҧсынтәыла иамамамызт ҭынч ҧсҭазаара. Иара адунеиаҿ иааннакылоз агеополитикатә ҭыҧ зеиҧшраз ала, ирацәаҩын уи лаҧшықәҵаны измаз аҳәынҭқаррақәа, амчрақәа, аимпериақәа.

Аха ҳара ҳажәлари урҭ раҧхьагылаҩцәеи ирдыруан, иагьрылшон дарбанзаалакь ақәылаҩ иҿагылашьа, ахеиқәырхашьа. Ҩашьара рықәымкәа иаанхеит хьӡи-ҧшеи згым ҳҭоурых аҿы Леонраа, Қьалышьбеираа. Урҭ Аҧсны амчхара, ахьыҧшымра рыхьчон дипломатиала, политикатә ҟәыҕарыла, аха ианамуӡалакь – бџьарла еиқәных идыргылон зхыҧхьаӡара маҷмыз, хаҵаҵас атәым легионқәа рҿагылара зылшоз архәҭақәагьы.

Аидысларақәа рҿы, ашьаарҵәыратә жәыларақәа рҿы иӡрыжәхон аҧсуаа рдоуҳамч, рцәаҩа, рҟазшьа! Аибашьцәеи урҭ раҧхьагылаҩцәеи ҧхьаҟа инеиуан Аҧсны абираҟ аанкыланы. Ҳара ҳзаҵәымызт ахьыҧшымразын ҳақәҧараҿы. Еишьцәаҵас иҳавагылан Кавказтәи ашьхарыуа жәларқәа. Убас иҟалеит аҵыхәтәантәи ҳџьынџьтәылатә еибашьраангьы, 1992-1993 шықәсқәа рзы.

Иахьа ҳаҧсадгьыл ҧсаатәҵас иахаҧыруеит ҳаибашьцәа хьӡырҳәагақәа ршьала икәабоу Аҧсны Аҳәынҭқарратә Абираҟ. 25 шықәса ахыҵуеит шьала иаагоу Аиааира Ду!
Имариамызт Аҳәынҭқарратә Абираҟи Агерби рыдкылара апроцесс. Уи иаҿагылан ҳтәылеи ҳажәлари рҭоурых аҵәаҕәа ахьызшьуаз ақырҭуа милаҭ-шовинисттә еиҿкаарақәа, Қарҭтәи аметрополиа адҵақәа рынагӡара иазхиаз аҭыҧантәи аполитикцәа.

Аха урҭқәа зегьы рҿагылара рылшеит ҳмилаҭтә-хақәиҭратә қәҧара аветеранцәа, ҳаҧхьагылаҩ ду Владислав Арӡынба напхгара ззиуаз Апарламент адепутатцәа. Урҭ иаадырҧшыз аҟәыҕареи, ачҳареи, аполитикатә хшыҩҵарреи ирыбзоураны иҳауит ҳажәлар зегьы рзын игәазырҳаганы иҟалаз алыҵшәа ду - закәан ҷыдала ишьақәыргылахеит ҳҳәынҭқарратә бираҟи, ҳгерби, ҳгимни.

Абираҟи агерби равтор, иналукааша аҧсуа сахьаҭыхҩы, ауаажәларратә ҧхьагылаҩ Валери Гамгиа ихаҭагьы наунагӡа даанхоит ихьыҧшым Аҧсны аҭоурыха ҿы ахақәиҭреи аҟазара ҳараки дырсимволны, доуҳатә ҧхьагылаҩны. Гәадурала зыӡбахә ҳәатәу ҭоурыхуп абираҟ автори Владислав Арӡынбеи ари иреиҳаӡоу амилаҭтә проект – Аҧсуа бираҟ аларҵәаразын, аидеологиатә шьаҭа-ҕәҕәа аҭаразы, еидырбалаз аџьабаа, иазкарҭәаз аҧхӡаша.

 Акыр иаҧсоу ҳашьцәа, ҳаҳәшьцәа, нхыҵаа-аахыҵаа! Акыр иаҧсоу ҳџьынџьуаа! Гәык-ҧсыкала ишәыдысныҳәалоит Аҧсны Аҳәынҭқарратә Абираҟ Амш. Иазҳалааит ҳтәыла амчхара, ишәҭыкакаҷлааит ҳшьам-ҳаҧсадгьыл Аҧсынтәыла! Ҳбираҟ лаша иаҵагыланы ҧхьаҟа инеилааит ҳажәлар уаҵәтәи рҧеиҧш знапы иану аҿар! Шьардаамҭа Аҧсынра!

Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org