Аҧсны Аҳәынҭқарра Ахада

 

Адныҳәаларатә цҳамҭақәа

21.05.2019

Аҧсны Ахада Рауль Ҳаџьымба аҳәаанырцә иҟоу адиаспорақәа рышҟа иҟаиҵаз ааҧхьара

***

Ҳаҭыр зқәу ҳауаажәлар! Ҳаҭыр зқәу ҳџьынџьуаа!

Иахьатәи амш – хашҭра зқәым агәалашәареи алахьеиқәреи ирымшуп. Зеижәтәи ашәышықәсазы аимпериа дуқәа реиҿагылара иахҟьаны иҟалаз атрагедиа ду – кавказтәи ажәларқәа рыхҵәара-хыҧсаара – ааха ҕәҕәа анаҭеит ҳмилаҭ рыҿиара, ргенофонд.

Ари ахҭыс бааҧс ҳажәлар еиҩнашеит, рҭоурыхтә џьынџь, рдаракәац иацәнарҟьалеит, иарцәгьеит рлахьынҵа, иаҿаҟәеит рымҩақәа, нахьнатә аахыс изхықәаауаз рырхнышьнақәа еиҩҵәаны, Мрагылара ааскьатәи аҳәынҭқаррақәа рышҟа иҟьаны иқәнаҧсеит уи аӡыблара бааҧсы. Аха иара убас шакәугьы, ҳџьынџьуаа еиқәдырхеит рхылҵшьҭра, рдоуҳашьҭра, рбызшәа, рытрадициа, ркультура, рқьабз-рҵас. Урҭ рхы ладмырҟәит даҽа дунеихәаҧшратә системак аҿаҧхьа. Иахьагьы акырӡа иҩаҳаракны иркуп ҧсра зқәым ҳаҧсуара абираҟ!

Ҭырқәтәыла, Шьамтәыла, Иорданиа, Египет уҳәа егьырҭ атәылақәа жәпакы рыҿгьы, ананамгареи, арыцҳареи ириааины, аҧсреи-абзареи ирыбжьагыланы, аҧсуаа еиқәдырхеит рхаҿра, инарҵауланы ирҳаит рышьаҭақәа ақалақьқәеи, ақыҭақәеи, аҳаблақәеи рҿы. Атәым цивилизациа иазымхәаҽит ҳажәлар ргәымшәара, еихсыҕьра зқәым рыҧсадгьыл ашҟа агәбылра ду. Араҟа иит ирызҳаит, иҕьацеит, рыхьӡ адунеи иахыҵәеит шәҩыла, зықьҩыла ауаа нагақәа, афырхацәа, аҳәынҭқарратә усзуҩцәа, аибашьцәа, ар рҧызацәа, адипломатцәа, аспорт-ӡыргаҩцәа, апоетцәа, аҵарауаа.

1992-1993 шықәсқәа раан ақырҭуа мпыҵахалаҩцәа Аҧсны ианақәла, рыбжьы ҕәҕәаны идыргеит ҳашьцәа, ҳаҳәшьцәа, аҧсуааи ачерқьесцәеи ҕәҕәала рҽеидыркылт. Рыҧсадгьыл ахьчаразы ақырҭуа агрессорцәа реихац аандақәа еилаҧыххааны, арахь рҿаархеит жәпаҩык аибашьцәа еиҿамсқәа, ҳдиаспора ахаҭарнакцәа хьӡырҳәагақәа. Имаҷҩым зыҧсадгьыл зхы ақәызҵаз Аҧсны ахьчаҩцәагьы! Рыхьӡ кашәара ақәымзааит ҳадгьыл зшьала изырҧсаҳәаз ҳашьцәа!  

Иахьа аҿиарамҩа иану, адунеи аҿы акырџьара иазхаҵоу Аҧсны ахьыҧшымра аиқәырхараҿы ҳара хыхьчага бџьар хадас иҳамоуп, аринахысгьы иҳамазароуп ҳажәлар ракзаара, рызегь рабдуцәеи урҭ рабдуцәеи рхәышҭаарақәа, рхьышьҭрақәа рахь ихынҳәыртә алшарақәа раҧҵара.

Ҳара ҳуалҧшьақәа ируакуп 19-тәи ашәышықәсазы ахҵәара, ақәӡаара иҭазыргылаз ҳажәлар мчыла ихырҵәоу, зџьынџь иахыгоу етноск раҳасабала разхаҵара, усеиҧш жәларбжьаратә статус рзыҧҵәаразы аполитикатә-дипломатиатә усура ду амҩаҧгара.

Уи аганахьала, ҿыц иаҧҵоу Аҧсадгьыл ахь архынҳәразы аминистрреи, Адәныҟатәи аусқәа рминистрреи егьырҭ аҳәынҭқарратә усбарҭақәеи реинырра иҵегь амҽхак ырҭбаатәуп.

Ҳауаажәлар зегь рзы иналукааша хҭысны иҟалеит аҭоурых ду змоу Шьамтәыла Аҧсны ахьыҧшымра ахьазханаҵаз.

Акыр иаҧсоу ҳауаажәлар, хашьцәа, ҳаҳәшьцәа, ҳаиҳабацәа ҟәыҕақәа! Илҧха-игәыҧха шәыгымзааит иахьа уажәраанӡа арыцҳарақәа ҳрылганы ҳаазго Анцәа Ду! Иазҳалааит, ишәҭыкакаҷлааит абиҧарақәа ршьала иаагоу ихьыҧшым, иазхаҵоу Аҧсны Аҳәынҭқарра!


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT