Аҧсны Аҳәынҭқарра Ахада

 

Адныҳәаларатә цҳамҭақәа

27.02.2019

Аҧсны Аҳәынҭқарра Амассатә информациа ахархәагақәа агазеҭ «Аҧсны» 100 шықәса ахыҵреи Амилаҭтә кьыҧхьи рымш рыдныҳәалара

Жәабранмза 27 рзы Аҧсны Аҳәынҭқарра Ахада Рауль Ҳаџьымба Аҧсны Аҳәынҭқарра Амассатә информациа ахархәагақәа агазеҭ «Аҧсны» 100 шықәса ахыҵреи Амилаҭтә кьыҧхьи рымш рыдиныҳәалеит.

Ҳаҭыр зқәу ажурналистцәа, апублицистцәа, Аҧсны Аҳәынҭқарра амассатә информациа ахархәагақәа рхаҭарнакцәа!

100 шықәса ҵит раҧхьатәи аҧсуа газеҭ «Аҧсны» актәи аномер анҭыҵыз аахыс. Ари акрызҵазкуа, асимволтә ҵакы змоу хҭыс дууп. Урҭ ашықәсқәа рзы иҟаз аполитикатә ҭагылазаашьа хьанҭақәа раан аамҭа иаҭахны, зыда ҧсыхәа ыҟамыз акьыҧхьтә ҭыжьымҭа ацәырҵра зыбзоуроу арккаҩ ду, апоет, арҵаҩы, аҵарауаҩ Дырмит Иосиф-иҧа Гәлиа иуаажәлар усҟан атәылаҟны иҟаз аҭагылазаашьа атәы раҳауа, еиуеиҧшым аҭоурых-культуратә информациа аиуразы, аҧсуа уаажәларра ргәы иҵхоз иҵарны иқәгылаз асоциалтә проблемақәа ирызхәыцуа, урҭ рыӡбара иалахәхартә еиҧш алшара рзаҧиҵеит.

Д.И. Гәлиа иарҕьажәҩаны ивагылан ажәа азҟаза дуқәа, ауаажәларратә усзуҩцәа: С.Ҷанба, И. Коҕониа, М. Лакырба, М. Аҳашба, Ӡ. Дарсалиа, И. Папасқьыр, В.Маан уҳәа уб.егь. Аҧсуа литература ашьақәгылара ианаҿыз, асахьаркыратә дунеихәаҧшра аҧҵаразы имариамыз, аҭакҧхықәра ду зцыз аус инаваргыланы урҭ амилаҭтә кьыҧхь, ажурналистика, апублицистика ауасхыр азышьҭарҵеит.

Ҳашьҭахьҟа ҳхьаҧшны, ҳжурналистика знысыз амҩа ҳаназхәыцуа, иреиҕьу иара ахаҭарнакцәа гәыҩбарада уи аихьӡарақәа ртәы рҳәартә иҟоуп. Аҧсуа публицистика ашьақәгылара анымҩаҧысуаз аамҭазы агазеҭ «Аҧсны», ҳәарада, ароль ду нанагӡон. Амилаҭтә кьыҧхь ацәырҵра ахыҵхырҭақәа рыҟны игылаз иналукааша ажурналистцәа, ашәҟәыҩҩцәа, апублицистцәа аӡәырҩы Сталин ихаан арепрессиақәа ирылаӡит. Аҧсуа пресса, амилаҭтә радиодырраҭара ахаҭарнакцәа аӡәырҩы харада ибжьадырӡит. Иҳаҩсыз ашәышықәса 40-тәи ашықәсқәа аҩбатәи рызбжазы амилаҭтә кьыҧхьтә ҭыжьымҭақәа рҭыжьра аанкылан, иаанкылан аҧсышәала арадиодырраҭара, аҧсуа интеллигенциа аадырбуамызт. Ари зегьы мҩаҧысуеит ҳажәлар рҭоурых аицакра, ҳажәлар ршьагәыҭреи ретнокультуратә хаҿреи мап ацәкны, аҵәаҕәа ахьшьра хықәкыс измаз ақырҭуа милаҭ-шовинисттә политика Аҧсны иалаҵәаны ианыҟаз.

Аха еиқәхеит Аҧсны, ахьыҧшымреи аполитикатә хатәҳәаақәҵареи рзин ашьақәыргыларагьы алшеит. Имариамыз абри ақәҧараҿы аҭыҧ ду ааныркылеит амассатә информациа ахархәагақәа. Ҷыдала ҳкорреспондентцәа, ҳредакторцәа, ҳрепортиорцәа, ҳоператорцәа, ҳанџьныр-техникатә усзуҩцәа, Амассатә информациа ахархәагақәа рнапхгаҩцәа рыпрофессионализм ганрацәала иааҧшит илахьынҵаӡбагаз 1992-1993 шш. Аҧсны Аџьынџьтәылатә еибашьраан. Аҧсадгьыл ахьчаразы ақәҧараҟны аидеологиатә фронт аҿы рлагаламҭа дууп Аҧсуа телехәаҧшра, арадио, акьыҧхь, аполиграфиа аусзуҩцәа. Ҳаҭырла ҳхырхәоит ззанааҭ уалҧшьа анагӡараан иҭахаз ргәалашәара аҿаҧхьа!

Иахьагьы аҧсуа журналистика ихьыҧшым ҳҳәынҭқарра аргылараҟны, ҳтәылауаа рзинқәа рыхьчараҟны ароль маҷӡам. Амассатә информациа ахархәагақәа иналукааша рхаҭарнакцәа рҧышәа ду ҿыц игыло ажурналисттә абиҧара рзы хшыҩрҵаганы иҟоуп. Ҳара уажәгьы уашьҭангьы аҵак ду аҳҭоит азинтә ҳәынҭқарра аргылара шьаҭас иамоу адемократиатә принципқәа.

Гәык-ҧсыкала ажурналистцәа зегьы ишәыдысныҳәалоит раҧхьатәи аҧсуа газеҭ «Аҧсны» 100-шықәса ахыҵреи, Амилаҭтә кьыҧхьи, Аҧсны Аҳәынҭқарра Амассатә информациа ахархәагақәеи рымш ныҳәа.
Ишәзеиҕьасшьоит агәабзиара, арҿиаратә гәҭак ҿыцқәа рынагӡара, аихьӡарақәа! 

Аҭагылазаашьа схы иархәаны, ҷыдала срыдныҳәалар сҭахуп раҧхьатәи амилаҭтә кьыҧхьтә ҭыжьымҭа атрадициақәа қәнагала зынагӡара иаҿу иахьа агазеҭ «Аҧсны» аредакциа аколлектив.




Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT