Аҧсны Аҳәынҭқарра Ахада

 

Ахада иажәахәқәа

16.03.2018

Ахада Аҟәа ахақәиҭтәразы марттәи ажәылараҿы иҭахаз ргәалашәара иазкыз аусмҩаҧгатә аҟны иқәгылара

Хәажәкырамза 16 рзы Аҧсны Аҳәынҭқарра Ахада Рауль Ҳаџьымба 1992-1993 шш. Аҧсны Аџьынџьтәылатә еибашьраан Аҟәа ахақәиҭтәразы марттәи ажәылараҿы иҭахаз ргәалашәара иазкыз аусмҩаҧгатә аҟны дықәгылеит.

***

Акыр иаҧсоу анацәа, абацәа! Акыр иаҧсоу аибашьра аветеранцәа!

Арҭ амшқәа рзын даҽазныкгьы иаҳгәалаҳаршәоит илахьеиқәҵагоу Марттәи ахҭысқәа раан зыҧсадгьыл зхы ақәызҵаз ҳаибашьцәа хьӡырҳәагақәа! Бџьарла, уааҧсырала, техникала акырӡа аҧыжәара шрымазгьы ақырҭуа агрессорцәа, Аҧсны арратә напхгара Аҟәа ахақәиҭтәразы ажәыларатә операциа амҩаҧгара хымҧадатәны иазырыҧхьаӡон, избанзар Аҟәа акәын иахьыҟаз аҕа ихырҕәҕәарҭа плацдарм хада.

Ишыжәдыруеиҧш, уи ажәылара аҽазыҟаҵара мҩаҧысуан, ҳамч-ҳалша ҳасаб рзуны. Ажәылара аплан хадагьы арратә профессионалцәа аӡәырҩы адыҧхьаланы ишьақәыргылан. Ҳасаб рызун еиуеиҧшым астратегиатә-тактикатә знеишьақәа. Хаҭала ари аус ду илаҧш ахын Ҳар Ркомандаҟаҵаҩ хада Владислав Арӡынба.

Аха рыцҳарас иҟалаз, зқьи жәшәи ҧшьынҩажәи жәаха шықәса Хәажәкыра 15-16 рзы арратә операциа амҩаҧгараан аҭыҧ рыман асубиективтәи аобиективтәи мзызқәа ирыхҟьаз агхақәа маҷымкәа. Ажәылара заа, планла ишазгәаҭаз еиҧш изынагӡамхеит, еиҧҟьеит еиуеиҧшым ауадаҩрақәа ирыхҟьаны. Иҭахеит хыҧхьаӡара рацәала Ҳаҧсадгьыл аҵеицәа- гәымшәақәа! Ҳхырхәоит урҭ ргәалашәара-лаша аҿаҧхьа!

Ааи, арҭ атрагедиатә хҭысқәа хашҭра рықәым. Аха урҭ игәыҕырҭоу ауасхыр азышьҭарҵеит ахақәиҭреи ахьыҧшымреи рзы анаҩстәи ақәҧара. Хәажәкырамзазтәи аидыслара иалахәыз иаадырҧшит ахамеигӡара, урҭ ирылшеит ҳаҳҭнықалақь Аҟәа амацәаз иҭакны измаз ақырҭуа архәҭақәа рпозициақәа ҕәҕәала реилаҧыххаара. Марттәи ажәылара ҳаруаа ирнаҭаз аибашьратә ҧышәа алшара ҿыцқәа аанартит анаҩстәи аоперациақәа қәҿиарала рымҩаҧгаразы.

Сынтәа ҳажәлар зегьы иазгәарҭараны иҟоу ҳиааира 25 шықәса ахыҵра иазку адокументалтә шықәсҩыраҿы Марттәи ажәылара аанхоит арратә фырхаҵара иаҭоурыхны! Ҳарҭ иаҳуалҧшьоуп иеиҵагыло аҿар абри апатриоттә ҿырҧштәала рааӡара!

Рыхьӡ кашәара ақәымзааит зыҧсҭазаара ахҭнызҵаз ҳаибашьцәа! Нагӡара ақәзааит ҳаҧсадгьыл Аҧсынтәыла!

 


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT