Аҧсны Аҳәынҭқарра Ахада

 

Ахада Астандартқәеи афымцамчтәи атехникатәи хылаҧшразы аилак Ахантәаҩы Гарри Саманба дидикылеит

30.11.2018

Ахада Астандартқәеи афымцамчтәи атехникатәи хылаҧшразы аилак Ахантәаҩы Гарри Саманба дидикылеит

Абҵарамза 30 рзы Аҧсны Аҳәынҭқарра Ахада Рауль Ҳаџьымба имҩаҧигеит аусуратә еиҧылара Астандартқәеи афымцамчтәи атехникатәи хылаҧшразы аилак Ахантәаҩы Гарри Саманба далархәны.
Аҳәынҭқарра Ахада Астандартқәеи афымцамчтәи атехникатәи хылаҧшразы аҳәынҭқарратә еилакы имҩаҧнагаз аконтрольтә усмҩаҧгатәқәа рылҵшәақәа дрызҵааит:
«Иахьазы имҩаҧгоу агәаҭаратә усурақәа рышьҭахь шәусураҟны иаарҧшу атәы шәалацәажәар сҭахын. Еиҭакрақәас иҟалеи? Сара излаздыруала, еиҭакра бзиақәакгьы ыҟоуп, иаагозар, атуристтә усхк аҟны. Еиҳа ахылаҧшра рҕәҕәоуп иара убас егьырҭ ахырхарҭақәа жәпакы рыҟны, ҷыдала, амаҵзура аусхк аҟны, акрыфарҭақәа рыҟны, еиҳаракгьы, ашколқәранӡатәи ашколтәи усбарҭақәеи рыҟны».
Гарри Саманба имҩаҧгоу аусуразы аҳасабырба ҟаиҵеит.
«Аусура акыр иҳарҕәҕәеит. Апроблемақәа маҷӡам, урҭ азакәанҧҵаратә базаҟны ауп иахьыҟоу. Абри аганахьала иҟаҳҵаз рацәоуп. Апарламенти ҳареи аус еицаҳуеит. Иҟоуп азакәан апроектқәа хҧа, урҭ ҳусура акыр иацхраауеит.
Уажәы ҳара ауаа аҭакҧхықәра агара иашьҳарцыларц азы иҳалшо зегьы аҟаҵара ҳаҿуп. Ари акраҵанакуеит. Абри аганахьала ателехәаҧшра ҳхы иаҳархәоит. Ари иалшо шмаҷым гәаҳҭеит. «Абаза-ТВ» ҳареи ҳаицәажәеит, есҧшьаша адырраҭара цоит, ари ахархәаҩцәа иргәаҧхоит.
Ҳара аарыхҩцәа аицлабра бзиа рыбжьаларц ҳҭахуп, уи ҳацхраауеит. Анаплакы ҿыц анаартха, ауаа ҳарҧырхагаӡам, аха иқәҳаргыло азҵаарақәа неиҩымсрада инагӡазроуп.
Даара акраҵанакуеит ашколтәи ашколқәранӡатәи аусбарҭақәа ирыдҳәалоу ахырхарҭа. Ара агхақәа рацәаны иаҳбеит. Уи иазкын ателехәаҧшратә дырраҭарагьы. Иаарҧшыз агхақәа  раҧыхразы уажәы аусура мҩаҧысуеит. Ҳара аҩбатәи агәаҭара дәықәаҳҵеит арҭ аобиектқәа рышҟа, ариашарақәа иҟарҵаз маҷӡам, 100% рҟынӡа ҳҳәар ҟалоит. Ари ламысла иазнеит Аҵара аминистрраҟынгьы, араионтә ҟәша анапхгаҩцәагьы, Администрациақәа рхадацәагьы. Абри аганахьала аусура бзианы имҩаҧысуеит», - иҳәеит Гарри Саманба.
Аҳәынҭқарра Ахада дазааҭгыланы иҳәеит, агәаҭарақәа рхыҧхьаӡара анормақәа ишырхымсыракәу.
«Арҭ агәаҭарақәа иашаны иазнеироуп ауаа, иаарҧшу агхақәа рыриашара иашьҭазароуп. Агәаҭарақәа игәазҭо аилазаарақәа рыбжьара еиқәшаҳаҭны имҩаҧысуазароуп. Урҭ есҽынгьы имҩаҧгалатәӡам. Аилагара шыҟоу адырра аныҟала, уи хылаҧшра аҭатәуп», - иҳәеит Ахада.
Ахада иаҵшьны иҳәеит Аҳәынҭеилакы атуристтә усхк аҟны имҩаҧнаго аусура аҵак ду шамоу. Гарри Саманба Ахада изеиҭеиҳәеит абри ахырхарҭала имҩаҧысуа аусура атәы.
«Сара аколлектив адҵа рысҭеит агәаҭарақәа лаҵарамзазы ма рашәарамзазы имҩаҧырго акәымкәа, азыҟаҵаратә усурақәа ажьырныҳәамзазы ирылагаларц азы. Уи ашьҭахь аобиектқәа рҭагылазаашьа ҳдыруа иҟалоит. Абри ахырхарҭала аилыркааратә усура ду мҩаҧысуеит, арыжәтәи ацхеи ирызкны», - иҳәеит Гарри Саманба.
Аҳәынҭқарра Ахада иаҵшьны иҳәеит аилыркааратә усура адагьы, аилагарақәа ҟазҵо рганахьала ахара рыдҵаразы аусмҩаҧгатәқәа шынагӡатәу атәы.
Ахада иара убас иазгәеиҭеит Аҳәынҭеилакы иадҵаало анаплакҩцәа рзы абжьгарақәа рхаҭабзиареи адокументқәа реиқәыршәара аҿҳәара ахмырҧареи хылаҧшра шрыҭатәу.
1.JPG


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT