Аҧсны Аҳәынҭқарра Ахада

 

Ахадеи Владимир Путини Шәача реиҧылара иазку абрифинг

27.11.2018

 Ахадеи Владимир Путини Шәача реиҧылара иазку абрифинг

Абҵарамза 27 рзы Аҧсны Аҳәынҭқарра Ахада Рауль Ҳаџьымба Урыстәылатәи Афедерациа Ахада Владимир Путини иареи Шәача реиҧылара иазку абрифинг мҩаҧигеит.

Аҳәынҭқарра Ахада аиҿцәажәарақәа реихшьала ҟаиҵеит:

" Ҳазҭоу ашықәс нанҳәамза анҵәамҭазы имҩаҧысыз аиҧылара иацҵо, ҳрылацәжәеит Аҧсны аекономикатә, афинанстә ҭагылазашьақәа ирызкыз азҵаарақәа жәпакы, иара убас аҩ-ҳәынҭқаррак русеицзура аҩныҵҟа зыӡбара мҩаҧысуа еиуеиҧшым ауснагӡатәқәа. Урҭ атәылахьчара аусбарҭа, Аҩныҵҟатәи аусқәа рминистрра, Аҧсны абанктә система аҭагылазаашьа уҳәа азҵаарақәа ирыдҳәалан. Арҭ азҵаарақәа зегьы ҧасатәи ҳаиҧылараҿы иқәҳаргылахьан, урҭ уажәы ҳрылацәажәеит.
Урыстәыла анапхгара аганахьала азҵаарақәа зегьы адгылара роуит, иара убри аҽныҵәҟьа еиуеиҧшым ахырхарҭақәа рыла ҳара аус ҳацызуа изыхәҭоу аусбарҭақәа рнапхгаҩцәа рҿаҧхьа иқәыргылан адҵақәа. Аҩбатәи амш азы дара рыӡбара нап аркын.
Урҭ рахь иаҵанакуеит Ихымҧадатәиу амедицинатә ҧгаҧса. Иҟан ауадаҩрақәа, аха  хара имгакәа ари атема аркхоит. Аиқәшаҳаҭра иаҵаҩхоит амедицинатә полис зауа ҳтәылауаа изықәнагоу амедицинатә усбарҭаҿы аҽыхәышәтәразы алшара рызҭо.

Ҳарзааҭгылеит абанктә ҭагылазаашьа атема иазкыз азҵаарақәа. Урҭ иаартны ҳрылацәажәеит. Иаҳҳәеит арҭ ашықәсқәа зегьы рзы ицәырҵуаз ауадаҩрақәа ртәы. Ҳарҭ даара аҵак ду змоу адгылара ҳарҭоит. Уи акредит акәӡам,  абанктә система аҭышәныртәаларазы аҳәынҭқарра ацхыраара арҭоит миллиардки бжаки рҟынӡа.
Амҩатә коммуникациа атема акәзар, изныкымкәа ҳазааҭгылахьеит, аха уи ашәарҭарагьы ацуп. Избанзар абри аганахь изаацәаны аинформациа ацәыргара иахҟьаны апроцесс иаҧырхагахо ауаа цәырҵуеит. Урҭ Урыстәылеи ҳареи  ҳабжьара  аҳаиртә баӷәазеи амшынтә еимадареи ирыдҳәалоу азҵаарақәа роуп. Ари аусура иадҳәалоу азҵаарақәа ганрацәала  ирзааҭгылан. Исҳәарц сылшоит аҩ-хырхарҭак рыла аусурақәа шцо.Урҭ рылацәажәара макьана изаацәоуп. Агәра шәсыргоит абри аганахьала азҵаарақәа  зегьы рынагӡара шалыршахо.

Иара убас ишьҭыхын абахҭа ахыбра аргылара азҵаара. Ауаажәларра рыҩныҵҟа ари азҵаара лассы-лассы иалацәажәоит. Ари атема ҳалацәажәоижьҭеи акыр ҵуеит, аха иахьа иаараны иҟоуп Урыстәыла Аиустициа аминистрра ахаҭарнакцәа, иаҭаху аусурақәа ирылагоит, ауаа ахьҭаку ҳәа мацара акәымкәа, аусуратә процесс радҧхьаларазы ауснагӡатәқәа рыӡбара алыршаразы. Апрограмма акорпус аргылара мацара акәымкәа, абаандаҩцәа аусуратә процесс ралагаларагьы азҧхьагәаҭоуп. Сгәы иаанагоит уи аҟаҵара ҳалшоит ҳәа. Ауаҩы шықәсыла акгьы ҟамҵо, акамера дҭатәаны иҟамлароуп, акрура абаандаҩы изеиҕьхоит. 

Ақыҭанхамҩа аминистрра атемагьы ҳалацәажәон. Шәара ижәдыруеит сынтәа ацхыраара ду шҳауз. Урыстәылатәи Афедерациа Ахада адҵа ҟаиҵеит Урыстәыла Ақыҭанхамҩа аминистрра аганахьала Аҧсны Ақыҭанхамҩа аминистрра ацхыраара аҭаразы. Абарҭ ахырхарҭақәа рыла аусурақәа мҩаҧысуеит. Хара имгакәа Аиҳабыра анапхгара лассы инагӡатәу аусмҩаҧгатәқәа ирылацәажәараны иҟоуп. Сара агәра згоит ҳтәылазы ари шхәарҭахо.

Аинвестпрограммеи Аинвестициатә усбарҭеи ртема атәы ҳҳәозар, зегьы еилыркаауазар сҭахуп, иарбанзаалак баша иурҭо уск ыҟаӡам. Арҭ апроблемақәа зегьы уадаҩуп, нас аиҧыларақәа рышьҭахь «Аҧсны Ахада Урыстәыла Ахада аинформациа иашамкәа ииҭеит» анырҳәо, ари аинформациа ишакәхалак ираҳартә ианыҟарҵо, ари иаанаго, раҧхьа иргыланы, рых ҳаҭыр ақәырҵом ауп иаанагаго. Аҧсны Ахада ус изыҟаҵаӡом, ари аинформациа ҭырҵаауеит, уи аӡәгьы иузицәыҵәахӡом. Иҟаҵоу – ҟаҵоуп, иаҳзыҟамҵаз заҳзыҟамҵаз азы амзызқәа ыҟоуп. Уи апроект-харџьынҵатә документқәа роуп, уи атәгьы ҳҳәахьеит. Уажәы азҵаара ықәгылоуп апроект-харџьынҵатә документқәа урыстәылатәи ахаҭарнакцәа алархәны рымҩаҧгаразы, адокументқәа рдәықәҵара ауадаҩрақәа ахылымҵларц азы. Ус еиҧш ауадаҩрақәа ыҟоуп, иҟаӡам ҳәа аӡәгьы имҳәаӡеит.

Аҧарақәа рхархәара рызҵаара акәзар, хархәара рыҭоуп шаҟа азоужьу еиҧш, аха агәрамгара, азҵаара уҳәа ыҟазар, уи азы ҳҳәынҭқарраҟны аусбарҭақәа ыҟоуп, уахь идҵаалааит, аҭак рырҭоит.

Ирылацәажәан атәылахьчаратә цәаҳәа, аҳәааҟны ашәарҭадара алыршара азҵаарақәа. Адунеи аҟны имҩаҧысуа, Қырҭтәыла, Украина НАТО атемала имҩаҧырго ақәгыларақәа ҳасаб рзуны, ари ҳаргьы зҿлымҳара аҳҭароуп Урыстәылатәи Афедерациагьы, сара 94 усмҩаҧгатә ртәы салацәажәеит. Иҟоуп имаӡоу азҵаарақәа, иаартны зылацәажәара ҟамло. Уаҩы ибартә иҟаӡами арҭ ашықәсқәа зегьы имҩаҧысуаз аусурақәа? Зыӡбахә сымоу Аҧсни Урыстәылеи рыбжьара арратә еилазаарақәа русеицура ашьақәыргыларазы арратә ҽазыҟаҵарақәа роуп. Ари аус даара ибзианы имҩаҧысуеит».

 


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT