Аҧсны Аҳәынҭқарра Ахада

 

Ахада Урыстәылатәи Афедерациаҟны иҟоу Шьамтәылатәи Арабтә Республика Аҷыдалкаатәи Амчнаӡазмоуи Ацҳаражәҳәаҩ Риад Хаддад диҧылеит

20.11.2018

Ахада Урыстәылатәи Афедерациаҟны иҟоу Шьамтәылатәи Арабтә Республика Аҷыдалкаатәи Амчнаӡазмоуи Ацҳаражәҳәаҩ Риад Хаддад диҧылеит

Абҵарамза 20 рзы Аҧсны Аҳәынҭқарра Ахада Рауль Ҳаџьымба Урыстәылатәи Афедерациаҟны иҟоу Шьамтәылатәи Арабтә Республика Аҷыдалкаатәи Амчнаӡазмоуи Ацҳаражәҳәаҩ Риад Хаддад диҧылеит.

Аҳәынҭқарра Ахада асас аҧсшәа иеиҳәеит.

«Бзиала шәаабеит ҳәа шәасҳәоит Аҧсны. Шәара ижәдыруеит ҳара Шьамтәылатәи Арабтә Республикаҟны ҳшыҟаз. Ирыҵаҩын Шьамтәылеи Аҧсни рыбжьара аполитикатәи аекономикатәи еизыҟазаашьақәа рырҿиара хықәкыс измаз акрызҵазкуа адокументқәа.

Ҳара Шьамтәыла анапхгара иҭабуп ҳәа раҳҳәар ҳҭахуп афырхаҵара аарҧшны Аҧсны азхаҵаразы аӡбамҭа ахьаднакылаз азы. Иахьа уснагӡатә хаданы ҳҿаҧхьа иқәгылоуп арҭ аиҧыларақәа раан иазгәаҳҭаз анагӡара.

Ҳара иаабон Шьамтәыла Ареспубликеи уи ажәлари фырхаҵарыла имҩаҧыргоз ақәҧара. Иаҳбеит иара убас ажәлар аибашьра ирыннаҵаз ахәрақәа рырҕьара, атәыла аиҭашьақәыргылара ишазхиоу.

Иреиҕьу азеиҕьашьарақәа рзаҳкуеит Башар Асад ихьӡала гәык-ҧсыкала иаҳҧылаз анапхгареи шьамтәылатәи ажәлари», - иҳәеит Ахада.

Шьамтәылатәи Арабтә Республика Аҷыдалкаатәи Амчнаӡазмоуи Ацҳаражәҳәаҩ Риад Хаддад Ахада иҭабуп ҳәа иеиҳәеит иҟаиҵаз адкыларазы.

«Сара сышәҭааит ҳтәыла анапхгараҟнытә,  иаҳаракыра Башар Асад ихьӡала салам шәысҭарц азы. Шәара ҳтәылаҟны шәыҟазаара ҳнапхгареи ҳажәлари даара агәахәара рнаҭеит. Шьамтәыла анапхгара есқьынгьы Аҧсны адгылара шаҳҭо атәы рҳәоит, уи зырҵабыргуа акәны иҟалоит гәык-ҧсыкала иҳабжьоу аиҩызара, иара убас шәусуратә визит аан изҵаҩыз аиқәшаҳаҭрақәа. Ацҳаражәҳәарҭа аҳасабала, ҳара ҳусура ҩ-жәларыки ҩ-напхгараки реизыҟазаашьақәа арҕәҕәара.

Гәахәара дула исыдыскылеит анапҟазацәа рцәыргақәҵа. Ари ҳара амҩа иаша ҳшану атәы аҳәоит. Иҭабуп ҳәа шәасҳәоит ари аиҧыларазы, Шәара шәвизит азы. Шәтәыла иазеиҕьасшьоит аизҳазыҕьара, аҿиара».


5.jpg

4.jpg


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT