Аҧсны Аҳәынҭқарра Ахада

 

Ахада Акурортқәеи атуризми рминистр Авҭандил Гарцкиа дидикылеит

18.11.2018

Ахада Акурортқәеи атуризми рминистр Авҭандил Гарцкиа дидикылеит

Абҵарамза 16 рзы Аҧсны Аҳәынҭқкарра Ахада Рауль Ҳаџьымба Акурортқәеи атуризми рминистр Авҭандил Гарцкиа дидикылеит.

Авҭандил Гарцкиа аусбарҭа ахырхарҭа хадақәа рыла имҩаҧгоу аусуразы аҳасабырба ҟаиҵеит:

«Ҳазҭагылоу аамҭазы 2018 шықәсазтәи аихшьалақәа ҳрылацәжәар ҟалоит. Уи абҵарамза 1 азы иҳамоу арбагақәа рыла иҟауҵар алшоит, избан акәзар ашықәс нҵәаанӡа атуристцәа ҳзаалоит. Ҳтәыла 1 миллионҩык рҟынӡа атуристцәа аҭааит. Ари ахыҧхьаӡара еиҳазар ҟалоит иара убас еиҵазаргьы, зхатә машьынала мышкы ҳәа иаауа, иара убас ахатә секторгьы аҧхьаӡара уадаҩуп азы. Атуристцәа рхыҧхьаӡара иалоуп аҧсшьаразы иааз ауаа, ус иааз 550 нызқьҩык рҟынӡа ыҟоуп, иара убас аекскурсиазы мышкы иҟаз, урҭ 450 нызқьҩык ҟалоит.

2007 ш. инаркны иахьа уажәраанӡа Аҧсны 300 инарзынаҧшуа еиуеиҧшым асасааирҭақәа ргылоуп, идуқәоу, ибжьаратәқәоу, ихәыҷқәоу. Иааизакны, атәылаҟны атуристтә нхарҭатә обиектқәа 426 ыҟоуп, урҭ 25 310 ҭыҧ рымоуп. Ҳара ҳтәылазы ари маҷӡам. Урыстәыла иҟоу аҭагылазаашьа атәы ҳҳәозар, Аоимпиатә парк мацараҟны абри аҟара ҭыҧ ыҟоуп, Адәҳәыҧш ҟаҧшь (Краснаиа полиана) аҟны 45 нызқь рҟынӡа. 

Еиҳа зхашәалахәы ҳараку атуризм, иаҳҳәап, асоветтә аамҭазы иҟаз реиҧш ахкқәа рҿиалатәуп, ҳара аибашьраани уи ашьҭахьи урҭ ҳцәыӡит. Иаагозар, «Амра парк-отель» инангӡо амаҵзурақәа реиҧш иҟоу. Ари аусхк ҳара иҳамоу ахкқәа раасҭа 5-6 –нтә еиҳаны ахашәалахәы унаҭоит. Зегь раасҭа зхашәалахәы лаҟәу атуризм хкқәаны иҳамоу атуризм аплиажтә хки аекскурситатәқәеи роуп. Даҽа хаҭабзиаратә ҩаӡарак ахь ҳаиасны агәабзиарачаҧарҭатә туризм еиҳа хшыҩзышьҭра аҭара ҳалагароуп. Ҳәарада, аҳәынҭқарра дуқәагьы ирылшаӡом ишиашоу агәабзиарачаҧарҭақәа аинвестициақәа рзаужьра, аха аинфрастурктура азыҟаҵара ҳалагароуп, зхатә бизнес змоу , ари аусхк аҟны иҟаҵатәу здыруа аус рыцушьа ҳазхәыцроуп».

Аҳәынҭқарра Ахада аусбарҭа аҧхьаҟатәи аусуразы ихадароу ауснагӡатәқәа азгәеиҭеит:

«Ҳықәкыс иҳамоу атуристцәа ирыдаҳгало амаҵзура, асервис ахаҭабзиара ауп. Макьана ари атема уадаҩуп, ари зҿлымҳара аҭатәуп.

Ҳасасцәа афатә аалыҵқәа рыла еиқәыршәатәуп. Ҳара ҳаалыҵқәа аҳәаанырцәтәиқәа излареицәоу ҳәа акгьы ыҟаӡам. Ақыҭаҿы иҳамоу алшарақәеи акурорттә усхк аҟны иҟоу алшарақәеи еимадазароуп.

Зхыҧхьаӡара иацлаз аобиектқәа рганахьала, арҭ анхамҩақәа нҭырҳәыцааны хылаҧшра рымазароуп ашәахтәқәа инарыдҳәаланы. Ашәахтә еилазаарақәаеи шәареи аимадара ишәыбжьоу еилыкка иҟазароуп.

Акурортологиатә усхк атәы ҳҳәозар, ари аганахьала асоветтә аамҭазы амаҵзура ахаҭабзиара еицырдыруа иҟан. Иахьа ҳара ҳаҟны уи ыҟаӡам, уҳәар ауеит. Алшықәсаныктәи акурорттә аамҭа атәы абри аусхк ада изыҟалаӡом. Агәабзиарачаҧарҭа «Амра» азы ишәҳәаз бзиоуп. Аха ҳара Аҧсны иҟоу егьырҭ аобиектқәагьы ари аусхк иадҳаҧхьалароуп. Ари аинвестициақәа, егьырҭ аҧаратә лшарақәа ирыдҳәалоуп, аха ишәгәаласышәар сҭахуп, аӡырҧха атәы, иҳаҩсыз ашықәсқәа рзы аҳәынҭқарра аҧара шазоунажьыз. Иаҳдыруазароуп, ҳәарада, арҭ аҧаратә хархәагақәа рхархәара лҵшәас иамоу. Ҳара зегьы ҳрыцхраалароуп, аха арҭ аобиектқәа рыҟны аусура алҵшәақәа амазароуп.

Даҽазныкгьы, аҳәаа атема. Аҳәааҿы аҭагылазаашьа иҵегьы иеиҕьзароуп. Ари ҳалаҧш ахызароуп».

1.jpg

 




Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT