Аҧсны Аҳәынҭқарра Ахада

 

Ахада Крым Ареспублика Аминистрцәа рхеилак Ахантәаҩы ихаҭыԥуаҩ Георги Мурадов дидикылеит

15.11.2018

Абҵарамза 15 рзы Аԥсны Аҳәынҭқарра Ахада Рауль Ҳаџьымба Крым Ареспублика Аминистрцәа рхеилак Ахантәаҩы ихаҭыԥуаҩ - Урыстәылатәи Афедерациа Ахада иҿы иҟоу Крым Ареспублика Еснагьтәи Ахаҭарнак, ахәаахәҭра-економикатә, аҭҵаарадырра -техникатә, агәыҳалалратә усеицуразы Аԥсны Аҳәынҭқарреи  Крым Ареспубликеи Реиҳабырабжьаратәи акомиисиа Ацхантәаҩы Георги Мурадов дидикылеит.

Аҳәынҭқарра Ахада Георги Мурадов аԥсшәа иеиҳәеит.

«Крыми иааидкыланы, Урыстәылатәи Афедерациеи ҳареи ҳаизыҟазаашьа ҳара ҳзы акраҵанакуеит. Аекономикатә усеицура арҿиара аимадарақәеи алшарақәеи рзырҳара ҳадгылоит. Сгәы иаанагоит, шәара азеиԥш Комиссиа анапхгараҟны шәыҟазаара ари аус иацхраауеит ҳәа», - иҳәеит Ахада.

Георги Мурадов Ахада иҭабуп ҳәа иеиҳәеит дахьидикылаз азы.

«Ҳара уажәы азеиԥш комиссиа раԥхьатәи аилатәара мҩаԥаҳгоит. Даур  Џьумка-иԥа Аршбеи ҳареи ҳаицәажәеит ус баша ҳаиашьаратә еизыҟазаашьақәа ҳрылацәажәо мацара акәымкәа, азеиԥш зҵаарақәа ҳарзааҭгыларц. Ус еиҧш иҟоу азҵаарақәа рацәоуп. Ҳара иаҳҭахуп ҳҳәынҭқарреи ҳажәлари ирыхәо аусқәа ҟаҳҵарц, рыԥсҭазаара еиӷьхарц азы. Абарҭ ахшыҩзцарақәа ҳаманы шәара шәахь ҳааит, шәаргьы ҳаргьы ҳгәаанагарақәа ахьеиқәшәо азҵаарақәа ҳарзааҭгыланы аицәажәара мҩаҧаҳгарц, уи алҵшәа бзиақәа аиурц азы», -иҳәеит Георги Мурадов.

Аиԥылара ахыркәшамҭазы агәаларшәагатә ҳамҭақәа еимырдеит .

 



Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT