Аҧсны Аҳәынҭқарра Ахада

 

Ахада Гагра ақалақь даҭааит усуратә визитла

13.11.2018

Ахада Гагра ақалақь даҭааит усуратә визитла

Абҵарамза 13 рзы Аҧсны Аҳəынҭқарра Ахада Рауль Ҳаџьымба Гагра ақалақь даҭааит усуратә визитла. 

Аҳəынҭқарра Ахада аусуратә визит аан дахəаҧшит Гагратəи актəи абжьаратə школ аргылара шымҩаҧысуа.
Аҳəынҭеилазаара «Аҧсныргылара» адиректор хада Ҭемыр Тҟьебучаа Ахада изеиҭеиҳəеит Аҧсны асоциалтә-економикатə ҿиара аинвестициатə программа аҳəаақəа ирҭагӡаны имҩаҧысуа аргыларатә усурақəа ртәы:

«Аргыларақəа ирылагеит ҵыҧх, нанҳəамзазы. Абри аамҭа иалагӡаны ҳахьӡеит ажəытə школ ықəганы амонолиттə конструкциа ашьақəыргылара. Ари ашықəс азы ахыб ҟаҵаны ҳалгеит, афымцацəаҳəақəа алаҳдеит ҳҳәар ҳалшоит, аҭыӡқəа шьҭаҳхит, иаҳшьыхит, адашьмақəа ықəаҳҵеит, ихыркəшоуп авентелиациа, 50% рҟынӡа адəныҟатəи аҧенџьырқəа шьақəыргылоуп. Аплан аҿы ишарбоу еиҧш, аусурақəа цоит, финансла аиҵахара аныҟамла, иазыҧҵəоу аамҭа инақəыршəаны ахыбра рыҭахоит».

Аҵареи аҭҵаарадырреи рминистр Адгəыр Какоба иазгəеиҭеит ашкол ахыбра ҿыц аҵакы:

«Ажəытə хыбра аҭагылазаашьа бааҧсын, убри аҟынтə иӡбан иара ахьгылаз аҭыҧ аҟны иргылазарц зегь рыла ҳаамҭазтəи анормақəеи астандартқəеи ирықəшəо ашкол. Ари аҩыза апроект змоу ашкол Аҧсны иҟаӡам. Хаҭабзиарала арҵара апроцесс  иацхраауа, аҵаҩцəа рзы иманшәаланы иҟаҵоуп. Ҳара иаҳбарҭоуп аусурақəа қəҿиарала ацара ишаҿу, агəыҕрагьы ҳамоуп иааиуа аҵарашықəс ҿыц азы ашкол шаартхо азы» .

Ахада иара убас даҭааит аҧсуа инвестор анаплакҩы Динар Сыҷынаа еиҭашьақəиргылаз агәабзиарачаҧарҭа-курортə комплекс «Амра», уи еицырдыруеит XXVII-тəи апартеизара ахьӡ зху КПСС Ацентртә Комитет ҧасатәи агәабзиарачаҧарҭа ҳәа.
Ахада изеиҭарҳəеит агәабзиарачаҧарҭаҟны аусурақəа шцо атәы.

«Ари ахыбра инвестициала иазоужьын 200 млн мааҭ. 150 уада амоуп, 300-ҩык ауаа акуеит. Ҳазҭагылоу аамҭазы ара иҩноуп 40-ҩык. Иазгəаҭатəуп, Ашықəс Ҿыц азы аномерқəа зегьы шаанкылоу. Абассеин еиқəыршəоуп, апарк ҧшӡа амоуп. Аиҭашьақəыргылара анаҩс, 100 инарзынаҧшуа усурҭа ҭыҧ аҧҵоуп. Арҽеиратә усурақәа раан еиқəырхоуп ахыбра адəныҟатəи ахаҿра, џьара-џьарагьы еиқəырхоуп аҩнымаҭəа. Асасааирҭа иамоуп ахатəы цхыраара лас амашьына. Еиуеиҧшым анализқəа рымҩаҧгара ҟалоит, аультрабжьтəы диагностика аппарат ыҟоуп. Иара убас, арахь идҵаалалар рылшоит ақалақь ауааҧсырагьы. Ҳара иҭабуп ҳҳәар ҳҭахуп аҳəынҭқарра иаҳнаҭаза ацхыраазы», - иҳəеит Динар Сыҷынаа.

 Агәабзиарачаҧарҭаҿы иҟоуп амбулатортə цхыраареи аҧсшьарҭа-курорттə ҽыхəышəтəреи рыхкқəа зегьы.

Аҳəынҭқарра Ахада дахəаҧшит аинвестор Динар Сыҷынаа зыргылара мҩаҧиго ахəаахəҭратə центр аргыларҭа аҭыҧ. Анаплакҩы еиҭеиҳəеит аргыларақəа шцо атəы:

«Зегьы хиоуп, шамахамзар, иаанхаз атехника иадҳəалоу усурақəак роуп, афымцацəаҳəа алгара, асантехника уҳəа. Ахыбра иамоуп аҩаӡарақəа хҧа, аҩнаҵаларҭа адагьы, афатәҵәахырҭеи ашьҭаҵарҭеи ирызку. Иара убас, ачаӡырҭа аҟаҵара ҳгəы иҭоуп, насгьы акондитертə аалыҵқəа рҭыжьра».

Ахада иазгəеиҭеит арҭ ахыбрақəа араиони аҳəынҭқарреи рекономиказы ирымоу аҵакы: «Иахьа ҳара иаҳбарҭоуп Урыстəылатəи Афедерациаҟнытә иҳауа ацхыраарагьы нацҵаны лшарақәас иҳамоу. Лассы-лассы иҳаҳауеит ҳара ҳахь аинвесторцəа ааӡом ҳəа. Иахьа иаҳзаауа иалагеит Урыстəыла аус зуа ҳџьынџьуаа, иахьа ирылшо зегьы ҟарҵоит ара Аҧсны. Агәабзиарачаҧарҭа «Амра» аҿы иаҧҵоуп акурортолгиеи ауаа рыҧсшьарази ҳаамҭа иақəшəо аҭагылазаашьақəа зегьы, ишьақәыргылоуп ҳаамҭа иақəшəо амыруга амедицинатə цхыраара рыҭаразы аҧсшьаҩцəа реиҧш, ақалақьуаагьы. Иахьа ҳазхəаҧшыз ахыбрақəа абиуџьеттə лшарақәа ирыцырҵоит Гагра ақалақь азеиҧш, аҳəынҭқарразгьы».
2.JPG
22.jpg23.jpg


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT