Аҧсны Аҳәынҭқарра Ахада

 

Ахада Аҧсуа телехәаҧшра 40-шықәсахыҵра иазкыз аныҳәатә усмҩаҧгатә далахәын

06.11.2018

Абҵарамза 6 рзы Аҧсны Аҳәынҭқарра Ахада Рауль Ҳаџьымба Аԥсуа телехәаҧшра аҧҵеижьҭеи 40 шықәса аҵра иазкны Аҧснытәи аҳәынҭқарратә филармониаҟны имҩаҧысыз аныҳәатә усмҩаҧгатә далахәын.

Аҳәынҭқарра Ахада Аҧснытәи Аҳәынҭқарратә телерадиоеилахәыра аколлектив аиубилеитә рыцхә рыдиныҳәалеит:

«Ҳаҭыр зқәу Аҧснытәи Аҳәынҭқарратә Телерадиоеилахәыра аусзуҩцәа!
Ажурналистцәа, арежиссиорцәа, аоператорцәа, анџьныртә-техникатә усзуҩцәа!

Ҩынҩажәа шықәса рыҩныҵҟа шәара шәызнысыз амҩа – ихьыҧшым Аҧсны аҳәынҭқарра аполитикатә ҭоурых ҿыц иахәҭакуп. Аҧсуа телехәаҧшра аира, ашьақәгылара иадҳәалоуп ахақәиҭреи, ахьыҧшымреи рзы ҳажәлари ҳинтеллигенциеи рықәҧара.

1977 шықәсазы Москваҟа идәықәҵаз еицырдыруа ашәҟәы иаанартит адаҟьа ҿыц ҳреспублика аҿиарамҩаҿы.

Ишыжәдыруа еиҧш, Қарҭаа акыраамҭа иаҿагылан ҳмилаҭтә телехәаҧшреи ҳуниверситети раартра, избанзар ирдыруан урҭ рҵакы, рроль, ридеологиатә нырра, рымҽхак.

1978 шықәсазын аамҭалатәи асхемала аусура иалагаз Аҧсуа телехәаҧшра иахьа акырӡа ҵакылагьы, формалагьы аҽарҭбааит. Аус руеит ауаажәларратә-политикатә, акультуратә-сахьаркыратә, адокументалтә уҳәа ахырхарҭақәа аазырҧшуа аҟәшақәа. Сгәы иаанагоит, аринахысгьы агәцаракра ҷыда роуп ҳәа аҳәынҭқарра бызшәа аиқәырхареи, аларҵәареи ирызку апрограммақәа, аҿар злахәу адырраҭарақәа, асоциалтә-економикатә зҵаарақәа рзы актуалтә еиҿцәажәарақәа.

Иаҧсоу ахәшьара ҳаракы аиухьеит Аҧсуа телехәаҧшреи Аҧсуа радиои 1989 шықәсазын, иара убас Аҧсны жәлар Рџьынџьтәылатә еибашьраан аидеологиатә фронтаҿы ирылдыршаз аихьӡарақәа. Рџьабаа ҳаҭыр ду ҳзақәуп ҳтелехәаҧшра раҧхьатәи анапхгаҩцәа, аиҿкааҩцәа: Шамиль Ԥлиа, Гурам Амқәаб, Михаил Мархолиа, Рауль Лашәриа, Владимир Занҭариа, Руслан Ҳашыг, Иури Қәҭарба, Амиран Гамгьиа, Леонид Агрба, Даур Корсаиа, Даур Киут; раԥхьатәи аԥсуа дикторцәа: Емма Адлеиԥҳа, Кама Џьапуаԥҳа, Зураб Аргәын, Леонид Хышба, Рауф Чепиа.

Хьтәы нбанла рыхьӡқәа ануп ҳҭоурых ҿыц ашықәсҩыраҿы аибашьраан зыҧсадгьыл зхы ақәызҵаз насгьы аибашьра ашьҭахь изаамҭамкәа здунеи зыԥсахыз ҳтелехәаҧшра аусзуҩцәа: Ахра Акаба, Валери Ажьиба, Лаврент Бранӡиа, Авҭандил Гәарамиа, Гарри Дбар, Асланбеи Камкиа, Анзор Кәарҷелиа, Асҭамыр Саӡба, Анатоли Шониа, Џьамбул Џьопуа.

Аҧсуа телехәаҧшра ацәырҵра, ателехәаҧшра аефир аҟнытә иааиҩуаз раҧхьатәи ажәабжьқәа ҳажәлар даара ргәы шьҭырхуан, ргәы азҭарҵон. Ари акрызҵазкуаз хҭысны иҟалеит ашьақәгылара иаҿыз ҳҳәынҭқарразы.

Акыр иаԥсоу аҩызцәа!
Шәиубилеитә ныҳәамш аҽны гәык-ҧсыкала ишәзеиҕьасшьоит агәамч ҕәҕәа, арҿиаратә гәалаҟара бзиа, ҧхьаҟатәи ақәҿиара ҿыцқәа».







Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT