Агәзабзиарахьчара аминистрра аҧҵара 25 шықәса ахыҵра инамаданы Ахада иҟаиҵаз адныҳәалара

Агәзабзиарахьчара аминистрра аҧҵара 25 шықәса ахыҵра инамаданы Ахада амедицинатә усзуҩцәа дрыдныҳәалеит.

Адныҳәалараҟны, ҷыдала, иҳәоуп:

«Акыр иаҧсоу амедицинатә усзуҩцәеи агәабзиарахьчара аветеранцәеи!

Гәык-ҧсыкала ишәыдысныҳәалоит Аҧсны Аҳәынҭқарра Агәзабзиарахьчара аминистрра 25-шықәсатәи аиубилеи!

Абри амш аҽны гәыкала сшәыдныҳәаларц сҭахуп ахәышәтәра аҟазара – аҵак ду змоу, аҭакҧхықәра зцу, адыррақәа рыдагьы, ауаҩра, агәырҵҟәыл, ауаҩы ирыцҳашьара зҭаху аус зыҧсҭазаара азызкыз зегьы аӡәаӡәала. Ҳтәыла ауааҧсыра ахә ҳаракны иршьоит хамеигӡарада ргәабзиара ахьчара аус иазку шәзанааҭтә усура.

Аџьынџьтәылатә еибашьраҟны Аиааира 25 шықәса ахыҵра ашықәс азы ҷыдала иазгәасҭарц сҭахуп ҳаҧсадгьыл Аҧсназы илахьынҵаӡбагаз аамҭақәа раан фырхаҵарыла зыҧсадгьыл аҿаҧхьа зуалҧшьа анагӡара иаҿыз амедицинатә усзуҩцәа-аветеранцәа.

Иахьа ҳтәыла амедицинатә усбарҭақәа рыҟны аус руеит адырреи аҧышәа дуи змоу зыквалифицикациа ҳараку аспециалистцәа, аҳақьымцәа рабиҧара еиҳабацәа ҳаамҭа иақәшәо аҵара зауз аҿарацәа рҧышәа рымардоит, амҩа иқәырҵоит. Ари ҳмедицина аҿиара иацхраауеит, абиҧарақәа реимадара еиқәырханы.

Сгәы иаанагоит, апрофессионализми аҧышәеи, ишәымоу аицхыраареи аҧхьаҟагьы хамеигӡарак ҟамҵакәа, агәабзиарахьчараҟны ихадароу азеиҧшмилаҭтә хырхарҭақәа лыҵшәабзиала рынагӡара иацхраалоит ҳәа.

Ишәзеиҕьасшьоит шәнапы злаку аус ду аҟны аҧхьаҟагьы аихьӡарақәа, ишәзааигәоу шәҭынхацәеи ҳтәылауаа зегьи – агәабзиара, ақәранҵыра ду». 

 

 


Возврат к списку