Аҧсны Аҳәынҭқарра Ахада

 

Ахада Ҭырқәтәыла иҟоу Аҧсуа культуратә центрқәа рфедерациа аделегациа дырҧылеит

01.10.2018

Ахада Ҭырқәтәыла иҟоу Аҧсуа культуратә центрқәа рфедерациа аделегациа дырҧылеит

Жьҭаарамза 1 азы Аҧсны Аҳәынҭқарра Ахада Рауль Ҳаџьымба Ҭырқәтәыла иҟоу Аҧсуа культуратә центрқәа рфедерациа аделегациа дырҧылеит.

Ахада аиҧылара алахәцәа аҧсшәа реиҳәеит: "Ари шәара шәыҧсадгьыл ауп, шәареи ҳареи ҳацәгьеи ҳабзиеи еилазароуп. Ҳаҧхьаҟа еицҟаҳҵаша аусқәа рацәаны ишьҭоуп.

Шьамтәыла ҳаҟазаара аан шәара ишәбарҭан уа инхо ҳдиаспора рхаҭарнакцәа ҳатрадициақәеи ҳкультуреи шырыхьчо. Ҳџьынџьуаа ахьыҟазаалакгьы Аҧсуара ахааназы идырӡуам. Ара шәыҟазаара агәахәа снаҭоит, агәра згоит аныҳәамшқәа рнаҩсангьы ҳара ҳзеиҧш ҳәынҭқарра, ҳкультура ҳшеиднакыло. Ҳажәлар аибашьраан ршьа каҭәаны иаҳзааргаз ҳахьчароуп ҳара".

Ҭырқәтәыла иҟоу Аҧсуа культуратә центрқәа рфедерациа ахантәаҩы Аҭанур Аҟәысба зҿлымҳара аиҭеит аҧсуа бызшәа ахьчареи арҿиареи рҵакы иадҳәалаз азҵаарақәа.

"Ишәыдысныҳәалоит ҳзеиҧш ныҳәа, ҳара ҳаҧсадгьыл аҿы ҳаҟоуп, аусмҩаҧгатәқәа ҳрылахәуп. Ҳара наҟ-ааҟ еицыҳаӡбаша аусқәа ҳамоуп. Иҟоуп хырхарҭақәак ҳара ацхыраара аҭара ахьҳалшо. Абызшәа аиқәырхара зегь реиҳа ихадароу зҵаараны иаанхоит. Ҳара даара ҳаигәырӷьеит иацтәи аныҳәа аҧсышәала иахьымҩаҧысыз"-иҳәеит Аҭанур Аҟәысба.

Ҭырқәтәыла иҟоу Аҧсуа Абаза жәлар Адунеизегьтәи рконгресс арегионалтә ҟәша анапхгаҩы Аҳмеҭ Ҳаҧаҭ иазгәеиҭеит, аҧсуа диаспора еснагь ишазхиоу Аҧсны аҿиареи аизҳазыӷьареи ацхыраара аҭара.
135 (1).JPG135 (2).JPG


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT