Аҧсны Аҳәынҭқарра Ахада

 

Ахада 1992-93 ш.ш Аҧсны Аџьынџьтәылатә еибашьраҿы Аиааира 25 ш. ахыҵра азгәаҭара аҽазыҟаҵаразы Акомиссиа аихшьаалатә еилацәажәара мҩаҧигеит

03.10.2018

 Ахада 1992-93 ш.ш Аҧсны Аџьынџьтәылатә еибашьраҿы Аиааира 25 ш. ахыҵра азгәаҭара аҽазыҟаҵаразы  Акомиссиа аихшьаалатә еилацәажәара мҩаҧигеит

Жьҭаарамза 3 рзы Аҧсны Аҳәынҭқарра Ахада Рауль Ҳаџьымба 1992-93 ш.ш Аҧсны Аџьынџьтәылатә еибашьраҿы Аиааира 25 ш. ахыҵра азгәаҭара аҽазыҟаҵаразы Акомиссиа аихшьаалатә еилацәажәара мҩаҧигеит. 

Аҳәынҭқарра Ахада Акомиссиа иалахәыз иҭабуп ҳәа реиҳәеит имҩаҧгаз аусуразы:
 "Аусура дуӡӡа мҩаҧган. Ҳажәлар зегь арҭ амшқәа рзы аусмҩаҧгатәқәа реиҿкаараҿы иҳадгылаз иҭабуп ҳәа расҳәоит. Ақалақь адгьылҵакырақәа рыцқьан, аамҭа кьаҿк иалагӡаны иҟаҵоу маҷӡам.
 Аибашьраан зыҧсадгьыл гәыла-ҧсыла ишазыҟаз аазырҧшыз иҭахаз аибашьцәа ранацәа рҿаҧхьа схырхәоит.
 Иҭабуп ҳәа расҳәоит зегьы аныҳәатә усмҩаҧгатәқәа хырхарҭа рацәала аиҿкаара иалахәыз. Ахә ҳаракны исшьоит Акультура аминистрра аусура, Ҭемыр Кәакәасқьыр иусура, иара убас даҽазнык аибашьратә хҭысқәа ҳаргәылазырҧшыз, ҳҧеиҧш ҳаззырхәыцыз ақәыргыламҭа ду иалахәыз зегьы. 
 Аинформациатә маҵзурақәа русзуҩцәа. Ажурналистцәа зегьы, ателехәаҧшра аусзуцәа ааҧсарак ҟамҵакәа гәацҧыҳәарала аус зуаз.
 Зегьы раасҭа ихадароу, астадион аҿы, иара убас апарад амҩаҧгараан, иааидкыланы, ауаажәларратә леишәа хылаҧшра бзиа ахьаҭаз. Уи Аҩныҵҟатәи Аусқәа рминистрра, Аҳәынҭқарра Ашәарҭадара Амаҵзура, Аҳәынҭқарра Ахьчаратә маҵзура аусзуҩцәа, арҭ амшқәа рзы аус зуаз зегьы аныҳәатә усмҩаҧгатәқәа ҭынч имҩаҧысырц азы.
 Иҭабуп ҳәа расҳәоит аусбарҭақәа рнапхгаҩцәа, аминистррақәа, араионтә усбарҭақәа рнапхгаҩцәа, иааидкыланы, аусмҩаҧгатә ҩаӡара ҳаракыла еиҿызкааз зегьы. 
 Ҷыдала иазгәасҭарц сҭахуп Мақсим Фадеев абри ахҭыс азы ҷыдала ииҩыз ашәа Хьыбла Герзмаа иналыгӡаз, уи , аныҳәатә концерт лалахәхара иамаз аҵакы. 
 Аҧсны Абыргцәа реилазаара ахантәаҩы Аполлон Шьынқәба еихшьаалақәак ҟаиҵеит, лымкаала ахә ҳаракны ишьеит Аҧсны Аиааиреи Ахьыҧшымреи иазкны ахәылбыҽха имҩаҧгаз аныҳәа, Ҭемыр Кәакәасқьыр еиҿикааз:
 "Араионқәа зегьы рҿы аныҳәа ҩаӡара ҳаракыла имҩаҧысит. Аҳәаанырцәтәи ҳасасцәа ҳақалақьқәа рыцқьара азгәарҭеит. Хымҧада, еснагь ус еиҧш иҟазар бзиоуп, уи амҩа ҳақәуп ҳәа сгәы иаанагоит. 
 "Аҧсны Анацәа Асоциалтә иашареи аҭынчреи рзы" аиҿкаара ахантәаҩы Гәыли Кьычҧҳа аныҳәатә усмҩаҧгатәқәа рзы лгәаанагара лҳәеит:
 " Иҭабуп ҳәа шәасҳәарц сҭахуп иҭахаз ранацәа амедалқәа ахьранашәшьаз. Аиааира амш ныҳәа акәзар, даара иҳаракыз аҩаӡара аманы имҩаҧысит. Сара хаҭала аҭел сизасит Ҭемыр Кәакәасқьыр, ҭабуп ҳәа иасҳәеит аконцерт азы. Уа ахҭысқәа угәы ҭызшьаауаз дырбан. Ҷыдала иалыскаарц сҭахуп моментк, аекран аҿы ицәырҵыз иҭахаз рфотосахьақәа зегьы еидкыланы Аҧсны Аҳәынҭқарра Ахада Владислав Арӡынба исахьа ахьалҵыз. Сара агәра згон зегьы шьахәла ишымҩаҧысуаз, избанзар Аиааира амш ныҳәа еиҳау ахааназгьы изыҟалом".
2.JPG
3.JPG


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT