Аҧсны Аҳәынҭқарра Ахада

 

Ахада Ҟарачы-Черқьестәи Ареспублика аделегациа идикылеит

30.09.2018

Ахада Ҟарачы-Черқьестәи Ареспублика аделегациа идикылеит

Цәыббрамза 30 рзы Аԥсны Аҳәынҭқарра Ахада Рауль Ҳаџьымба Аԥсны Аџьынџьтәылатә еибашьраҿы Аиааиреи Ахьыԥшымреи рныҳәа зхы алазырхәырц Ҟарачы-Черқьестәи Ареспублика аҟынтә иааз аделегациа дырԥылеит.

Ахада асасцәа аԥсшәа реиҳәеит:

«Ҳарҭ шәбара ҳаигәырӷьоит, ҳарзгәыдууп Ҟарачы-Черқьески ҳареи иҳабжьоу аизыҟазаашьақәа. Ҳара ҳзы уи акраҵанакуеит, ҳарҭ ҳаишьцәоуп, иузеиҟәымҭхо аимадара ҳабжьоуп. Ҳтәылаҿы имҩаԥысуа апроцессқәа зегьы бзианы ижәдыруеит, аихьӡарақәа шәреигәырӷьоит, ҳазхьымӡо шәгәы шәнархьуеит. Иааидкыланы, Урыстәылеи, ҷыдала, Нхыҵ-Кавказтәи Ареспубликақәеи ҳареи ҳаизыҟазаашьақәа ихадоу аҭыԥ ааныркылоит ҳҳәынҭқрра аԥсҭазаараҿы. Ҳаимадарақәа аԥхьаҟагьы иҿиалароуп аекономика, акультура ахырхарҭақәа рыла, еиҳаракгьы аҿартә политика ахшыҩзцара аҭатәуп. Аҿар рабацәа рышьҭа ихызароуп, аимадара ӷәӷәақәа аԥырҵалароуп.

Ҳарҭ даара ҳаигәырӷьоит иахьа ара шәахьыҟоу. Акраҵанакуеит аныҳәамшқәа раан мацара акәымкәа, егьырҭ амшқәа рызгьы ҳаиара ҳҿаԥхьа иқәгылоу ауснагӡатәқәа рыӡбараҟны».

Ҟарачы-Черқьестәи Ареспублика Жәлар Реизара ахантәаҩы Алеқсандр Иванов Рашид Темрезов ихьӡала Ахада адныҳәаларақәа ҟаиҵеит.

«Иҭабуп идуӡӡаны, ҳаҭыр зқәу, Рауль Џьумка-иԥа, шәшеилахоугы аамҭа ԥшааны ҳахьшәыдышәкылаз. Атәыла Ахада Рашид Темрезов ихьӡала иаҳҭахуп Шәареи аԥсуа жәлари акрызҵазкуа аныҳәа ду шәыдаҳныҳәаларц. Ҳшәыцгәырӷьоит. Иахьа 25 ш.ҵит Аиааира жәгеижьҭеи. Ари акрызҵазкуа рыцхуп. 25 ш. рыҩныҵҟала Аԥсны акыр аиҭакрақәа мҩаԥысит, аекономика аҿиара иаҽуп.
Ҳара ҳзы гәахәароуп Аԥсны аҿиара амҩа иахьану. Атуризм, аԥсшьарҭатә бизнес аҿиара иаҿуп».

Аиԥылара ахыркәшамҭаз Ахада Ҟарачы-Черқьестәи Ареспублика адепутат, «Хатәгәаԥхарала Апсны еибашьуаз Реидгыла» ахантәаҩы Заур Ӡугов 1992-93ш.ш. Аԥсны Аџьынџьтәылатә еибашьраҿы Аиааира агараҟны илагаламҭазы ианеишьеит аиубилеитә медал «Аиааиразы».


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT