Аҧсны Аҳәынҭқарра Ахада

 

Ахада Ҟабарда-Балкариа Ареспулика аҟынтә аделегациа идикылеит

30.09.2018

Ахада Ҟабарда-Балкариа Ареспулика аҟынтә аделегациа идикылеит

Цәыббрамза 30 рзы Аԥсны Аҳәынҭқарра Ахада Рауль Ҳаџьымба Аԥсны Аџьынџьтәылатә еибашьраҿы Аиааиреи Ахьыԥшымреи 25 ш. рхыҵра иазкыз аныҳәа зхы алазырхәырц Ҟабарда- Балкариатәи Ареспублика аҟынтә иааз аделегациа дырԥылеит.

Ҟабарда-Балкариатәи Ареспублика Ахада Иусбарҭа анапхгаҩы Муҳамед Кодзоков Рауль Ҳаџьымба аҭоурыхтә хҭыс идиныҳәалеит, Аԥсны жәлар аҭынчра рзеиӷьеишьеит.

«Ҳарҭ еснагь аԥсуа жәлар рааигәара ҳаҟан, аринахысгьы ҳаҟазаауеит. Иаҳбоит атәыла аҿиара ишаҿу, аихьӡарақәа шамоу. Ҳтәыла анапхгара ҿыц аҳәара ҟарҵеит ишәаҳҳәарц аԥхьаҟагьы ҳаизыҟазаашьақәа еиҳагьы аҽшарӷәӷәало.
Иахьатәи аныҳәа даара иаҳгәаԥхеит, иаҳгәаԥхеит апарад. Зегь реиҳа ихадароуп ауаа рхы-рыҿқәа лашаӡа иахьыҟоу, агәцԥыҳәара ирымоу, уи зегы иреиҳауп,»- иҳәеит Муҳамед Кодзоков.

Ахада асасцәа аԥсшәа реиҳәеит:

«Ҳара ҳзы гәахәра дуӡӡоуп иахьатәи аныҳәамш аҽны шәахьҳавагылоу. Аҟабарда жәлар еснагь иҳавагылоуп, аамҭа уадаҩқәа раан еиԥш. Аибашьра аамҭазы шьхала ихыҵны арԥарцәа аӡәырҩы ҳадгыларц иааит, раԥхьа еиҿкааз агәыԥқәа ирылалеит, анаҩс архәҭақәа. Аԥсны еиқәхарц азы аҭагылазаашьа аԥырҵон. Аԥсуа жәлар азин рымаӡам афырхацәа рхашҭра, ирхашҭрангьы иҟаӡам жәҩахыркны иҳавагыланы еибашьра ицоз. Усҟантәи аамҭазы Аԥсны аӡбахә адунеи аҿы инарҭбааны ираҳарц азы акыр рылшамта рацәоуп Сулҭан Сосналиев, Муса Шанибов реиԥш иҟоу ауаа хатәрақәа. Сулҭан Сосналиев ипатритизмреи, арратә процессқәа рганахьала имаз азыҟазаашьеи акыр иџьашьатәуп. Хымԥада, ҳарҭ иҳабжьоу аимадара есааира ирҿиалатәуп, ирӷәӷәалатәуп. Ҳажәларқәа акыр шықәса раахыс еимадоуп, уи Аԥсны ԥхьаҟа изго аҿар аихарҳара иалагароуп».
3 кбр (2).jpg


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT