Аҧсны Аҳәынҭқарра Ахада

 

Ахада Арцах аделегациа идикылеит

29.09.2018

Ахада Арцах аделегациа идикылеит

Цәыббрамза 29 рзы Аԥсны Аҳәынҭқарра Ахада Рауль Ҳаџьымба Адәныҟатәи аусқәа рминистр Масис Маилиан хадара ззиуа Арцах аделегациа идикылеит.

Рауль Ҳаџьымба: Шәбара сеигәырӷьоит ҳныҳәа аламҭалазы ҳаԥсадгьыл аҿы, гәык-ԥсыкала шәыжәлари шәреспубликеи ҳшырзыҟоугьы азгәасҭрц сҭахуп. Акыр аамҭа Арцахи ҳареи ҳусеицзура алыршо, адунеитә уаажәларра ҳреспубликақәа реизыҟазаашьақәа рбартә еиԥш аҭагылазаашьақәа раԥҵара ҳаҿуп.
Сара сыҟан Арцах, даара угәы азнарҳауеит атәыла аҿиара иахьаҿу, аекономика, асоциалтә зҵаарақәа, иара убас ашәарҭадара азҵаара рыӡбараҭагылазаашьа аԥҵа ҷыдала иахьазнеиуа. Ҳара ҳзы акраҵанакуеит ҳаизыҟазаашьақәа рыӷәӷәахара, ҳажәларқәа рыбжьара аизыҟазаашьа бзиақәа рышьақәыргылара. Даҽазныкгьы бзиала шәааеит ҳәа шәасҳәоит. Ҳазлацәажәаша ҳамоуп, иҟоуп ахырхарҭақәа аԥхьаҟагьы ирҿиалатәу.

Масис Маилиан: Ҳаҭыр зқәу Ахада, азин сышәҭ, ҳҳәынҭқарра Ахада Баако Саакиан ихьӡала Ахақәиҭра амш, Аиааира амш шәыдныҳәаларазы. Ҳара ҳзы акраҵанакуеит ҳаиашьаратә Республикаҿы - Аԥсны ҳахьыҟоу, аԥсуа жәлар риааира амш рыдаҳныҳәалартә еиԥш алшара ахьҳамоу. Сара ара сыҟан Аиааира жәашықәса ахыҵра аназгәашәҭоз, уижьҭеи 15 ш. ҵит. Иҟоу аиҭакрақәа среигәырӷьоит. Усҟан аҳҭнықалақь аибашьра ахҟьа-ԥҟьақәа анубаало иҟан, уажәы иаҳбоит ахыбра ҿыцқәа, амҩа ҿыцқәа. Уи, хымԥада, агәахәа ҳнаҭоит. Ҳашьцәа аԥсуа жәлар акыр ҳреигәырӷьоит. Адәныҟатәи аусқәа рминистрреи ҳареи акыр аизыҟазаашьа бзиақәа ҳамоуп, аимадара ҳабжьоуп. Ҳара ҳганахьала аусуратә идеиақәак ҳамоуп, урҭ ҳҳәынҭқарра Ахада аполитикатә дгылара зиҭаз, сгәы иаанагоит Шәара шәганахьала урҭ ԥынгыла рмоуп ҳәа. Уи ҳаҭыр зқәу Аконсулцәа русбарҭа алагалара ауп. Анаҩс, сынтәатәи ашықәс ҳазааҭгылозар, ҳгәы иҭоуп Жәларбжьаратәи аконференциа амҩаԥгара, Аԥснытәи аҳәынҭқарратә университети Адәныҟатәи аусқәа рминистрра ахаҭарнакцәеи рааҳаԥхьара ҳазхиоуп. Иааиуа ашықәс иазԥхьагәааҭны иҳамоуп- аспортә туризм азы Жәларбжьаратәи аицлабра амҩаԥгара. Даара акраҵанакуеит ҳҿар аимадара рыбжьаҵара, уи азы аҳра аҭагылазаашьақәа аԥаҳҵоит. Даҽазныкгьы аныҳәа шәыдаҳныҳәалоит. Ҳара ҳзы агәахәроуп аныҳәа аламҭалазы Аԥсны ҳахьыҟоу.

Рауль Ҳаџьымба: Иҭабуп. Ҳаҭыр зқәу Аконсулцәа русбарҭа азҵаара аганахьала, Адәныҟатәи аусқәа рминистрреи ҳареи ҳаицәажәахьеит. Ҳара ҳақәшаҳаҭуп, анаҩс еиҳа ихадароу азҵаарақәа ҳрыӡбара ҳлагоит. Шәарҭи ҳареи аԥхарра зцу аизыҟазаашьақәа ҳабжьоуп, аҳәынҭқарратә еилазаарақәа русеицуразы ҳусура еиҳа ирццакны иалагатәуп. Хымԥада, сара адгылара шәысҭоит, ари ахырхарҭала аус еицура ҳалагоит.
кр 2.jpg


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT