Аҧсны Аҳәынҭқарра Ахада

 

Рауль Ҳаџьымбеи Анатоли Бибилови реиԥылара

29.09.2018

Рауль Ҳаџьымбеи Анатоли Бибилови реиԥылара

Цәыббрамза 29 рзы имҩаԥысит Аԥсны Аҳәынҭқарра Ахада Рауль Ҳаџьымбеи Алада Уаԥстәыла Ахада Анатоли Бибилови реиԥылара. Алада Уаԥстәыла Ахада Анатоли Бибилов зхадараҿы дыҟоу аделегациа Аԥсны Аҳәынҭқарра иаҭааит Аԥсны Аџьынџьтәылатә еибашьраҿы Аиааиреи Ахьыԥшымреи 25 ш. рхыҵра азгәаҭара иазку аныҳәатә усмҩаԥгатәқәа рылахәхаразы.

Рауль Ҳаџьымба: Гәахәарала бзиала шәаабеит шәасҳәоит, Анатоли Илиа-иԥа, Шәареи шәделегациеи зегьи, Аԥсны Аиааиреи Ахьыԥшымреи ирызку аныҳәатә усқәа рылахәхаразы шәахьааз. Аԥсни Алада Уаԥстәылеи рыжәларқәа, изныкымкәа ишаҳҳәахьоу еиԥш, ижәытәӡатәиу аҭоурых еиднакылоит, иахьа аибашьреи уи ашьҭахьтәи аамҭеи ириааины, ҳҳәынҭқаррақәа рҽазыршәоит аекономика, асоциалтә ҵакы змоу ахырхарҭақәа рышьақәыргылара. Ҳарҭ ҳаизыҟазаашьақәа еснагь иҿиалароуп, уажәраанӡагьы иаҳҳәахьеит, ҳара ҳаԥхьа иҟаз ирымаз азнеишьақәа инарықәыршәаны, ахааназгьы ҳажәларқәа еицызароуп, аӡәыкны иҟазароуп. Ҳарҭ ҳанеидгыла ҳаззымиааиуа ус ыҟаӡам, хымԥада ҳажәлар ззыԥшу алҵшәагьы анагӡара ҳалшоит.

Анатоли Бибилов: Иҭабуп, Рауль Џьумка-иԥа. Зегь раԥхьа иргыланы, иҭабуп ҳәа шәасҳәоит арҭ амшқәа рзы шәгәырӷьара шәыцеиҩаҳшарц ааԥхьара ахьҳашәҭаз, хымԥада, Алада Уаԥстәыла ажәлар рыхьӡала, Аԥсны Аџьынџьтәылатә еибашьраҿы Аиааира 25ш. ахыҵра амш шәыдаҳныҳәалоит. Ибзианы издыруеит, аԥсуа жәлар ирыхҭыргаз, ибзианы иаҳдыруеит шаҟаҩы рыԥсҭазаара ахҭынҵоу иахьа аԥсуа жәлар Аиааира амш ныҳәа азгәарҭарц азы, хымԥада ари Аиааира дууп. Ҳәарада, ари, ҳашьцәа ирылшаз, ирымоу аихьӡарақәа ҳармеиӷәырӷьарц залшом. Ҳарҭ еициз аишьцәа реиԥш, ҳҭоурых мҩа ҳануп. Ааигәа Урыстәылатәи Афедерациа ҳҳәынҭқаррақәа рхьыԥшымра азханаҵеижьҭеи 10 ш.ахыҵра амш ныҳәа азгәаҳҭон, адипломатиатә фронт аҿы даҽа иааирак иаҩызоуп Шьамтәылатәи Арабтә Республика ҳахьазханаҵаз. Арҭ амшқәа зегьы рзы ҳгәырӷьареи ҳхьааи акоуп, убри аҟынтә даҽазныкгьы ҭабуп ҳәа шәасҳәоит ааԥхьара ахьҳашәҭаз, Алада Уаԥстәыла ажәлар зегьы рыхьӡала гәык-ԥсык ала ишәыдысныҳәалоит аҵак ду змоу шәныҳәа.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT