Аҧсны Аҳәынҭқарра Ахада

 

Ахада Аҧсны Аџьынџьтәылатә еибашьраҟны Аиааира агара 25 шықәса ахыҵра Амш азгәаҭара аҽазыҟаҵара иазку Акомиссиа аилацәажәара мҩаҧигеит

18.09.2018

  Ахада Аҧсны Аџьынџьтәылатә еибашьраҟны Аиааира агара 25 шықәса ахыҵра Амш азгәаҭара аҽазыҟаҵара иазку Акомиссиа аилацәажәара мҩаҧигеит

Цәыббрамза 17 рзы Аҧсны Ахада Рауль Хаџьымба Аџьынџьтәылатә еибашьраҟны Аиааира агара 25 шықәса ахыҵра Амш азгәаҭара аҽазыҟаҵара иазку Акомиссиа аилацәажәара мҩаҧигеит.

Аиԥылара алагамҭазы Ахадеи Акомиссиа алахәцәеи Аҧсны аҧыза-министр Геннади Гагәылиа минуҭктәи аҿымҭрала дыргәаладыршәеит.

Аилацәажәара иалахәыз цәыббрамза 25 рзы имҩаҧысраны иҟоу аныҳәатә усмҩаҧгатә “Аиааиргаҩцәа Реизара ду” амҩаҧгара иазку аиҿкааратә зҵаарақәа ирылацәажәеит.
Акультуреи аҭоурых-культуратә ҭынхеи рыхьчаразы аминстр Ельвира Арсалиа илҳәеит аусбарҭа цәыббрамза 26 рзы имҩаҧысраны иҟоу Аҧсны Аџьынџьтәылатә еибашьраҟны Аиааира агара 25 шықәса ахыҵра иазку асахьақәа рцәыргақәҵа аартра ишазхиоу.
Аҟәа Администрациа Ахада ихаҭыҧуаҩ Леон Кәарҷиа Ахада иҟынӡа инеигеит аҳҭнықалақь анапхгара Аҟәа ахақәиҭтәра Амш иазку аныҳәатә усмҩаҧгатәқәа ишрызхиоу.
Цәыббрамза 29 рзы Очамчыра ақалақь аҟны имҩаҧысуеит Аҧсны Аџьынџьтәылатә еибашьраҟны иҭахаз рбаҟа аартра.
Арратә парад иалагаанӡа цәыббрамза 30 рзы Ахақәиҭра ашҭа иқәсраны иҟоуп Аџьынџьтәылатә еибашьра аветеранцәа, иазгәеиҭеит аҳәынҭқарра Ахада аилацәажәараҟны:
"Аибашьра аветеранцәа ашҭа иқәсуеит арратә парада иалагаанӡа. Дара роуп аиааира згаз, убри аҟнытә раҧхьа дара ықәсуеит. Урҭ инарышьҭагыланы, асааҭ 11 рзы рҿынархоит ашьаҟауаа, атехника, авиациа".
Аџьынџьтәылатә еибашьра аҳәса-аветеранцәа р-Ассоциациа Ахантәаҩы Лариса Ҭарба аилацәажаәара иалахәыз адырра рылҭеит акциа “Ҧсразқәым аполк” иалахәхараны ишыҟоу зқьи бжаки рҟынӡа ауаа. “Ҧсразқәым аполк” Ахақәиҭра ашҭа иқәсуеит апарад анхыркәашахалак иаразнак.
Аҭҵаарадырреи аҵареи рминистр ихаҭыҧуаҩ Медеиа Ченгелиа аилацәажәараҿы илҳәеит ашколхәыҷқәа рколоннақәак Ахақәиҭра ашҭа ақәсра ишазхиоу арратә паради “Ҧсразқәым аполки” анықәслак анаҩс.
Аҳәынҭқарра Ахада аилацәажәара иалахәыз ҷыдала иазхьаирҧшит ашәарҭадара азҵаара. Иақәнагоу ауснагӡатәқәа рзықәыргылоуп Аҩныҵҟатәи аусқәа рминистрра, Аҳәынҭқарратә Шәарҭадара Амаҵзура, Аҳәынҭқарра ахьчаратә маҵзура, азинхьчаратә усбарҭақәа аус рыцуразы Ахада Иабжьгаҩ Леонид Ӡаҧшьба иаиҭо ахылаҧшрала.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT