Аҧсны Аҳәынҭқарра Ахада

 

Ахада Атәылахьчара аминистрраҟны аилацәажәара мҩаҧигеит

14.09.2018

Ахада Атәылахьчара аминистрраҟны аилацәажәара мҩаҧигеит

Цәыббрамза 14 рзы Аԥсны Аҳәынҭқарра Ахада Рауль Ҳаџьымба аусуратә еилацәажәара мҩаԥигеит Аԥсны Аҳәынҭқарра Атәылахьчара аминистрраҟны.

Аиԥылара алагамҭазы, Ахада, Атәылахьчара аминистр, Аминистрра аофицартә еилазаара Геннади Гагәылиа минуҭктәи ҿымҭрала дыргәаладыршәеит.
Атәылахьчара аминистр Мираб Қьышьмариа, Аҳәынҭқарра Ахада иҟынӡа инеигеит Аиааира Амш иазку апарадтә ҽазыҟаҵаратә усурақәа шцо.
«Ԥхынгәымза 2018 ш. рзы Шәара ишьақәшәырӷәӷәеит Аԥсны Аџьынџьтәылатә еибашьраҿы Аиааира 25ш. ахыҵра азгәаҭара иазку апарад асхема иеиқәшәоу шьаҿала аршьаҟауаа рколонна ақәсреи, ииашоу ацәаҳәа ақәгылареи рзы, убри ианақәыршәаны апарад хаҭабзиарала амҩаԥгаразы иахәҭоу аҽазыҟаҵарақәа зегьы мҩаԥысуеит. Ԥхынгәымза 6 инаркны 10-нӡа Аҟәа ақалақь Аиааира ашҭаҿы имҩаԥган аршьаҟауаа рколонна злахәыз аҽазыҟаҵарақәа жәаба. Агәырӷьаратә усмҩаԥгатәқәа ирылагаанӡа даҽа ҩ-ҽазыҟаҵарак мҩаԥысраны иҟоуп.
Арратә парад иадыԥхьало хаҭалатәи аилазаара азеиԥш хыԥхьаӡара 1406-ҩык ыҟоуп, арратә техника азеиҧш хыҧхьаӡара акәзар-119. Апарад иалаху хаҭалатәи аилазаара зегь рыла еиқәыршәоуп, иазгәаҭоу аамҭазы ишақәнагоу еиԥш иазхиахоит».
Атәылахьчара аминистрра аԥхьаҟатәи аусура далацәажәо, Ахада инаҵшьны иазгәеиҭеит, аусбарҭа амч-алша зегьы Аԥсны Аҳәынҭқарра атәылахьчара арӷәӷәара ишазырхатәу.
«Ҳара ҳазгәдууп ар маҭәа зшәу аруаа ахьҳамоу, ианаҭахха Аԥсадгьыл ахьчара иахьазхиоу. Аԥхьаҟагьы ҳастратегиатә дгылаҩцәеи ҳареи ҳтәыла арбџьарымчқәа рырӷәӷәара амҩа ҳанызароуп. Аха, иазгәасҭарц сҭахуп даҽакы, иааизакны шәареи ҳареи ҳауп иҳарҭо ацхыраара ииашаны ахархәаразы аҭакҧхықәра раҧхьа иргыланы изду. Иҭахаз рыхьӡала, ҳаԥсадгьыл аԥхьаҟатәи аԥеиԥш азы, ҳарҭ иҳалшо зегьы ҟаҳҵароуп ари аҳәынҭқарратә еилазаара аусура аиҿкаара аҩаӡара ҳаракы амазарц азы».
Аиԥылара цонаҵы, Ахада аофицарцәа атәылахьчаратә политика, урҭ Аԥсны Аџьынџьтәылатә еибашьраҿы Аиааира 25 ш. ахыҵра иадҳәалоу аусмҩаҧгатәқәа, Шьамтәылатәи Арабтә Республикахь аофициалтә ныҟәареи ирызкыз рызҵаарақәа рҭакқәа ҟаиҵеит.
«Шьамтәыла даара аҭагылазаашьа хьанҭоуп. Убас ишыҟоугьы, атәыла акультура аҩаӡара шыҳаракыз ҳбартә иаарҧшын. Ҳара иаҳбеит Шьамтәыла анапхгареи ауаажәларреи аӡәыкны ишыҟоу. Рҿаԥхьа иқәгылоу ахықәкы аҟны аӡәк иеиҧш иеидгылоуп, уи атеррористцәа рҟынтә рыдгьыл ахақәиҭтәреи рҳәынҭқарра арӷәӷәареи ирызкуп. Аибашьра иахҟьаны иԥыххаа ишьҭоу ақалақьқәеи, араионқәеи, аҳаблақәеи, уахгьы- ҽынгьы реиҭашьақәыргыларазы аусурақәа мҩаҧысуеит.
Уа ҳаҟазаара аԥхьатәи амш азы ҳара ҳнапы аҵаҳҩит аиҩызареи аусеицуреи рзы Аиқәшаҳаҭра ду, анаҩс ирыҵаҳҩит ҳҳәынҭқаррақәа рыбжьара аекономикатә усеицура иазку даҽа ҩ-документк. Шьамтәыла дареи ҳареи ҳаизыҟазаашьақәа рышьақәыргылара акыр иазҿлымҳауп. Ҳара ҳбаӷәазақәеи ҳаихамҩақәеи рахь ацәырҵразы алшарақәа рзаҧҵазар рҭахуп, уи Урыстәылеи дареи аимадара рыбжьанаҵоит. Ари Шьамтәыла мацаразы акәӡам, Аԥсны аекономика аҿиара аусгьы иацхраауеит.
Шьамтәыла абизнес аԥсы ҭоуп, уи аусура аанкылаӡам. Уи лабҿаба иубартә иҟан Дамаск имҩаԥысуаз аҳәынҭқаррақәа жәпакы аҭҵаарадырреи, атехникеи, ааглыхреи рҿы реихьӡарақәа ахьаарҧшыз Жәларбжьаратәи ацәыргақәҵа алагьы,.
Ҳара ҳзы акраҵанакуеит, ҳазхазҵаз Шьамтәылатәи Арабтә Республика аҩызара, уи аныҟәгара, хымԥада, уи ҳара иҳалшоит ҳәа сгәы иаанагоит.
Шьамтәыла Ахада - иуникалтәу хаҭароуп. Шәара ибзианы ижәдыруеит Асовет Еидгыла анхыбгалаз аамҭа, аполитикатә аренаҿы Владислав Арӡынба ицәырҵра, аибашьра анцозгьы уи ашьҭахьгьы ҳшызиҟаз. Убасҵәҟьа шьамтәылажәлар Шьамтәылатәи анапхгара ирзыҟоуп. Мраҭашәаратәи амассатә информациа хархәагақәа рыбжьара Шьамтәыла ауаажәларратә ҳәоуеиқәшәара ыҟам ҳәа иҟоу ауҳәан-сҳәанқәа зегьы мцуп
Ҳара Кавказтәи адиаспора ахаҭарнакцәа ҳарԥылеит. Дамаск иқәынхо ауааҧсыра иҳарҳәеит, уа инхо ҳашьцәа бџьаршьҭыхла ари адгьыл дара рыҧсадгьыл еиҧш ишырыхьчо. Ҳџьынџьуаа Шьамтәыла имҩаԥысуа аԥсҭазаара активла иалахәуп, аибашьраҿеиԥш, егьырҭ аҳәынҭқарратә зҵаарақәа рҿгьы. Урҭ згәы аарту, агәаҕьра змоу уаауп. Даара ҳгәы шьҭнахит Кавказаа аҳәынҭқарраҟны иааныркыло аҭыҧ, инарыгӡо ароль.
Шьамтәылажәлар ирзеиӷьаҳ шьоит ахачҳара ижәытәӡатәиу аҭоурых змоу рҳәынҭқарра аргылараҿы».
Аиԥылара ахыркәшамҭазы Атәылахьчара аминистр Мираб Қьышьмариа иаҵшьны иҳәеит Аҳәынҭқарра ахада рҿаҧхьа иқәиргылаз ауснагӡатәқәа зегьы шынагӡахо.
1 (4).JPG


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT