Ахада аилацəажəара мҩаҧигеит Аминистрцәа реилазаара алархəны

Ахада аилацəажəара мҩаҧигеит Аминистрцәа реилазаара алархəны

Цəыбррамза 10 рзы Аҧсны Аҳəынҭқарра Ахада аилацəажəара мҩаҧигеит Аминистрцәа Реилазаара алархəны.

Ахадеи Аминистрцәа Реилазаара алахəцəеи Геннади Гагəылиа минуҭктəи аҿымҭрала дыргəаладыршəеит.

„Арыцҳара ду ҟалеит, Аҧсни аҧсуа жəлари рзы ари цəыӡ дууп. Аҳəара ҟасҵоит, Геннади Гагəылиа минуҭктəи ҿымҭрала даҳгəалаҳаршəарц.

Иҟоу аҭагылазаашьа иага иуадаҩзаргьы, Аиҳабыреи аҳəынҭқарратə усбарҭақəа зегьи русура минуҭк иадамхаргьы иаанымгылароуп. Иазҧхьагəаҭоу аусқəа зегьы хымҧада рынагӡара аҭахуп.

Даҽа ӡбамҭак ҳадаҳкылаанӡа, аамҭала Аҧыза-министр инапынҵақəа наигӡоит актəи Аҧыза-министр Даур Аршба.

Зегьы ирдыруазароуп, аминистррақəеи аусбарҭақəеи рнапхгаҩцəа рҿаҧхьа иқəгылоу ауснагӡатәқәа ишахəҭоу еиҧш инарыгӡалар шакəу. Хара имгакәа ихыркəшазароуп Аиндикативтə план иадҳəалоу аусурақəа зегьы. Аҧыза-министр ихаҭыҧуаҩцәа дасу рхырхарҭақəа рыла русурақәа ирыцырҵароуп.

Ҳҿаҧхьа иқəгылоу ауснагӡатəқəа мариаӡам. Зегьы иаҳдыруазароуп аҭакҧхықəра ду шҳаду“, - иҳəеит аҳәынҭқарра Ахада.

 


Возврат к списку