Аҧсны Аҳәынҭқарра Ахада

 

Ахада Шьамтәыла аҧшьаҭыԥқәа дырҭааит

05.09.2018

Ахада Шьамтәыла аҧшьаҭыԥқәа дырҭааит

Цәыббрамза 5 рзы Аԥсны Аҳәынҭқарра Ахада Рауль Ҳаџьымба,  Шьамтәыла иреиҳау аҵарадырра аминистр Аҭеф Наддафи официалтә делегациа алахәцәеи ицны Шьамтәылатәи Арабтә Республика аҭоурыхтә ҭыԥқәа дырҭааит.

  Аҳәынҭқарра Ахада днеит Омеиадаа рџьаамаҟны. Ахадеи аделегациа алахәцәеи ирзеиҭарҳәеит аџьаама аҭоурых. Рауль Ҳаџьымба Аҳаҭыртә шәҟәаҿы иаанижьит агәалашәаратә цәаҳәақәа, Шьамтәыла ажәлар аҭынчреи аҭышәынтәалареи рзеиӷьашьаны.

Аҳәынҭқарра Ахада, иара убас,  Дамаск аҭоурыхтә центр аҿы дырҭааит аҭоурыхтә хыбрақәа, Шьамтәыла атәылауааи иареи еицәажәеит.  

Ахада даҭааит Саеднаиа ақалақь, ижәытәӡатәиу, адунеи аҿы зегьы иреиҳау аҳәса рмонастыр-Аҭыҧҳа Цқьа Мариа лмонастыр.

«Амонастыр ахылаԥшҩи Шьамтәыла аепископ аб Лукеи Рауль Ҳаџьымба аԥсшәа иарҳәеит. Дара иазгәарҭеит, ас еиԥш асас дахь идкылара ҳаҭыр дуны ишырыҧхьаӡо. Ахада изеиҭарҳәеит амонастыр аҭоурых.

 «Ҳара ҳзы ҳаҭыр дууп Шәара иахьа абра шәахьыҟоу.  Шәкыла асаламқәа рзыҳацҳауеит шәыуаажәлар. Ари аҭыԥ-Иерусалимтәи  ақьырсиантә ҳаџьра анаҩс, аҩбатәи аҭыԥ ааннакылоит.  Арахь иаауеит еиуеиԥшым ауаа, ақьырсианцәагьы,  апсылманцәагьы.  Бзиала шәаабеит ҳәа шәаҳхәоит иҧшьоу ари адгьыл аҟны»-рҳәеит  дара.

Ахада иазгәеиҭеит, Аԥсны Аҳәынҭқарра аделегациа ари аҭыԥ ԥшьаҿы рыҟазаара агәахәа шырнаҭо.

«Шьамтәыла ижәытәӡатәиу аҭоурых амоуп, араҟа аҭынчреи аилибакареи зыбжьоу адинхаҵарақәа еиларсуп,. Аԥсынтәылагьы ақьырсиан динхаҵара иадҳәалоу зеиӷьыҟам аҭоурых даҟьақәа амоуп.  Ҳарҭгьы ахақәиҭра ҳазықәԥон, иахьа Шьамтәыла ахақәиҭра ишазықәԥо еиԥш. Анцәа иҳәааит, Шьамтәыла ажәлар ишырҭаху еиԥш аҭагылазаашьа ҟало»-иҳәеит, ҷыдала, аҳәынҭқарра Ахада.

Ахада дыздызкылаз аган иҟанаҵаз ааԥхьарала, иара убас даҭааит Маалула ақалақь,  ароуп иахьыҟоу Ацқьа Фекла  лыхьӡ зху аҳәса рмонастыр.

A65A0374.JPG

553.JPG

557.jpg

 735.jpg



Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT