Аҧсны Аҳәынҭқарра Ахада

 

Ахада Аҵареи аҭҵаарадырреи рминистр дидикылеит

31.08.2018

Ахада Аҵареи аҭҵаарадырреи рминистр дидикылеит


Аҵареи аҭҵаарадырреи рминистр Адгəыр Какоба Ахада аҭагылазаашьа зеиҧшраз изнеигеит.

„Атəылаҿы иҟоу 156 школ аҵаҩцəа рыдкылара иазхиоуп. Ашкол ахь ицоит ҩ-нызқьи хəышəҩыки бжаки инареиҳаны актəи акласс аҵаҩцəа, иҟоуп 1950-ҩык аклассқəа роушьҭымҭацəа. Хымҧада, ашколқəа зегьы еиҧшны иазыҟаҵам.  50 инареиҳаны школқәа рырҿыцра,  аиҭашьақəыргылара аҭахуп. Иҟоуп шьаҭанкыла арҿыцратә усурақəа зҭаху ашколқəа. Ари ашықəс азы ашкол ҿыцқəа ҩба рыргыларазы аусурақəа ирыцҵоуп, Гагра ақалақьи Очамчыра араион Ҭхьына ақыҭаҿи. Ҳара лассы-лассы урҭ аҭыҧқəа ҳарҭаауеит. Аусурақəа бзианы имҩаҧысуеит, ҳгәыҕуеит 2019 шықəсазы ахəыҷқəа ашкол ҿыцқəа рыҟны аҵаразы аҭагылазаашьа роуп ҳәа. 

Аҵареи аҭцаарадырреи рминистрразы зегь реиҳа ихадароу проблемоуп арҵагатə литература. Аҧсны Аҵареи аҭҵаарадырреи рминистрра абжьаратә ҵараиурҭақәа ирыднагало арҵага шәҟәқәа хиоуп, ашколқәа зегьы ирызшоуп. Урыстәылатәи арҵага шәҟәқәа рызҵаара даҽакала иҟоуп, урҭ аҧсныҟа иаауеит коммерциатә хырхархарҭала. Иҟоуп зыхә ҳараку акыр. Урҭ макьана аҭаацәа иаархәароуп. Ари аганахьала аусура мҩаҧаҳгоит.  Аҭыжьырҭақәа «Дрофи» «Аҵаралашареи» ҳдыргәыҕит афтортә зинқәа шҳарҭо ала, ҳреспубликаҟны аҭыжьра ҳалшарц азы. Усҟан, ҳара ишаҳаҧхьаӡаз ала, рыхәқәа акыр иеиҵахоит аахәараан. 

Ишыжәдыруеиҧш, сынтәа ашколқәа зегьы рзы ашколтә форма алаҳгалеит. Иҟан аҭаацәарақәа зхала арҭ аформақәа ззамхәоз,  араионтә ҟәшақәа иҳарҭаз асиақәа рыла  480   форма ркомплект ааҳхәеит, иацы урҭ рызшаны ҳалгеит. Сгәы иаанагоит, ари азҵаара ӡбоуп ҳәа.   

Имҩаҧган аквалификациа ашьҭыхразы акурсқәа. Урыстәылатәи Афедерациа Аҵареи аҭҵаарадырреи рминистрреи ҳареи иҳабжьаз аиқәшаҳаҭрала ҳара ҳашҟа иаашьҭын Аҩада-Кавказтәи афедералтә университет аспециалистцәа. Иацы актәи  ахәҭа хыркәшан, жьҭаарамзазы абас еиҧш акурсқәа азҧхьагәаҭоуп егьырҭ арҵаҩцәа рзы. 

“Ихыркәшоуп Аҵараиуразы Азакәан аус адулара. Ҳасаб рызун Аиустициа аминистр иазгәаҭақәа, амчыбжь аҩныҵҟала ари Азакәан апроект шәыдаҳгалоит ахәаҧшразы», - иҳәеит Адгәыр Какоба.

Ахада иазгәеиҭеит ашколтә форма алагалара ҷыдала хшыҩзышьҭра аҭаны ишазнеитәу.  

«Ари азҵаара даара ҳасаб азуны шәазнеироуп. Ииашоуп, ашколтә форма ахәыҷқәа еиҿнакаауеит, рлеишәа аҳәаақәҵара иацхраауеит. Аха аӡбамҭа аншәыдышәкыла ашьҭахь аҭаацәарақәа агәынамӡарақәа зауз ҟалеит, зегьы ирылшаӡом уи аахәара рҳәоит. Ари агәыҧ иаҵанакуа аҭаацәарақәа ҳасаб рзыжәуроуп», - иҳәеит Ахада.

Аминистр иҳәеит ари аусбарҭа иааиуа ашықәс абиуџьет аҧсахрақәа аланагалараны ишыҟоу.  

 4.JPG

 


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT