Аҧсны Аҳәынҭқарра Ахада

 

Ашықәсбжа аихшьаалақәа ирызку Ахада ипрессконференциа

30.08.2018

Ашықәсбжа аихшьаалақәа ирызку Ахада ипрессконференциа

Нанҳəамза 30 рзы имҩаҧысит ашықəсбжа аихшьалақәа ирызкыз Аҧсны Аҳəынҭқарра Ахада Рауль Ҳаџьымба имҩаҧигаз апресс-конференциа.

Шьамтәыла аганахь ала иҟаҵаз адипломатиатə зхаҵара иазкыз азҵаара аҭак ҟаҵо, Ахада Шьамтәылатәи Арабтə Республикеи ҳареи ҳусеицура иадҳəалоу аааигәа имҩаҧысраны иҟоу аусура атәы далацәажәеит:

„Азхаҵара анаҩс, аиҩызареи аусеицуреи рзы Аиқəшаҳаҭра анапаҵаҩра ҟалароуп, анаҩс аекономикеи ахəаахəҭреи русхк ала аиқəшаҳаҭра анапаҵаҩра азҧхьагәаҭоуп, Шьамтәылеи ҳареи ҳабжьара адəныҟаполитикатə усбарҭақəа русеицура иадҳəалоу азҵаарақəа аус рыдулахоит“.

Ашықəсбжа аҩныҵҟа аекономикатə згəаҭақəа ирызку азҵаара аҭак ҟаҵо, Ахада иҳəеит:

„Аплан аиқəыршəараан, ҳҿаҧхьа иқəҳаргылоз аҳасабтәқәа излауала иреалтəу аҟазшьа рымазар акәын. Иазгəаҭаз амҽхак ҳалацəажəозар, уи 5 миллиардки 209 миллион мааҭи ыҟоуп, ҳхатə ҧарақәа. Ҳара ҳзы уи зегь раасҭа акрызҵазкуа хырхарҭоуп. Ҳарҭ ҳҽазҵəылхны ҳхатə ресурсқəа ирыдҳəалоу азҵаарақəа аус рыдаҳулароуп. Иҟоу атенденциақəа ҳалшарақәа шеизҳаз аҳәара азин ҳарҭоит.

Ашьапылампыл асразы имҩаҧгаз Адунеи Ачемпионат аан иааз ауаа рхыҧхьаӡара еиҵахеит аҟнытә ҵыҧхтəи ашықəс аахыс аҭагылазаашьа бзиан ҳазҳәом. Раҧхьатəи ашықəс азбжа алҵшәақәа рыла, иҟоуп аиҵахарақəа, аха уи иаанагаӡом зегь бааҧсуп ҳəа.

Ашəахтə аганахь ала иарбаз аҟаҵарбақəа нагӡоуп 102% рыла. Ашықəс аҧхьатəи азбжазы Ареспубликатə биуџьет ахатəы хашəалақәа еизырҳауп 47,4 миллион мааҭ рыла. Ахашəалақәа рыплан нагӡоуп 90% рҟынӡа. Аҳəынҭқарратə биуџьет ахатəы хашəалахəқәа иартəеит ҩ-миллиардк рҟынӡа“.

Аҳəынҭқарра Ахада, иара убас, атəыла ахатə биуџьет аизырҳараҿы аҭыҧ хада аанызкылаз ауснагӡатәқәа ирызкыз азҵаара аҭак ҟаиҵеит абас:

„Ари - анапхгараҭара, акыр шықəса раахыс иаҳцәыҵәахыз аобиектқәа раргаматəра уҳәа ирыдҳəалоу азҵаарақəа роуп. Ари апроцесс мариаӡам, аҿагылара ыҟоуп. Аха даҽакала ӡбашьа амаӡам ари азҵаара аҳəынҭқарраҿы. Убри аҟынтə арҭ ахырхарҭақəа ирыцҵаны аусура мҩаҧгахоит. Даҽазныкгьы иазгəасҭарц сҭахуп, ашəахтə усбарҭақəа русура алҵшəа бзиақəа ҳарҭоит, аҳазалхратə еилазаарақəа рыҿгьы аҭагылазаашьа аҽаҧсахуеит“.

Ахада, иара убас дахцәажәеит Урыстəылатəи Афедерациаҟны имҩаҧысыз иусуратə визит:

«Ҩ-ҳәынҭқаррак реизыҟазаашьа аизҳара амҩа ҳақәуп. Агәрагьы згоит Урыстәыла шҳадгыло, ишҳацхраало. Аха ҳаргьы еилаҳкаароуп,  ацхыраара есымша иҟалаӡом. Есымша даҽа џьоукы ҳрықәгәыҕуа ҳҳәынҭқарра ҳзыргылаӡом. Иахьагьы иҳамоуп ацхыраара. Егьырҭ ашықәсқәа ирыҿурҧшыр, усҟан иҟаз ацхыраареи иахьа иҟоу ацхыраареи еиҧшӡам. Усҟан, 2009-2014 шш. рыҩныҵҟала иаланагалеит 27 млрд мааҭк инареиҳаны.

Уи ҩ-ганк рыла иаланагалеит: усҟан иҟан Аинвестпрограммеи Акомплекстә Плани ҳәа. Убри аганахьала 13 млрд раҟара аланагалеит. Ауалафахәы азы  ацхыраара иҳарҭоз ала, аусбарҭақәа рҭагылаазаашьа аиҕьтәразы 8, 5 млрд инарыцны иаланагалеитт.Убри адагьы, Аинвестпрограммеи Акомплекстә плани алагаанӡа 2009-20010 ашш раан иҳауит 4,5 млрд мааҭ рҟынӡа. Иааизакны иҟалоит 27,5 млрд мааҭ.

Убысҟантәи аамҭазы ҳбиуџьет, ари сықәгыларақәа рҿы есқьынгьы  иазгәасҭоит, амультипликативтә еффект зыҟамлаӡеит, ҳбиуџьет ахьыҟац иҟан, иазымҳаӡеит.   

2015-тәи аш. инаркны иахьа ҳарҭ иҳауит 13 млрди 200 млни мааҭи инарыцны, урҭ рҟынтәи 5 млрдки 400 млни  аинвестпрограмма ала, 7 млрдки 700 млн мааҭи инарыцны абарҭ ауалафахәқәа рзы иҳауит. Хышықәса рыҩныҵҟала иумбарц залшаӡом ауалафахәқәа инарыдҳәаланы аҭагылазаашьа шеиҕьхаз. Ҳҭагылазаашьа хазынахеит узҳәаӡом, аха ишеиҕьхаз убартә иҟоуп.

Рызегьы ашықәсқәа ааилауҵар, 2009 ш. инадыркны иахьа уажәраанӡа 40 млрд мааҭ иреиҳаны иҳауит. Имаҷӡам ари. Аха иҟоуп даҽа хырхарҭак, атәанчахәқәа.

 2014 шықәсанӡа  атәанчаҩцәа ироуаз иартәеит 10 млрдки 700 млни. 2014 ш. инаркны иахьа уажәраанӡа 12 млрд мааҭ инарыцны. Арагьы иумбарц залшаӡом атәанчаҩцәа ироуагьы ашьҭыҵра ишаҿу. Иашоуп, уигь азхаӡом, аха абарҭ ахырхарҭақәа аус шыруа умбарц залшаӡом.

Хымҧада, ари ҳҳәынҭқарра иахәоит, хымҧада, ари адагьы ҧсыхәа ҳамаӡам макьана. Аха раҧхьа иргыланы, аҧхьан ишысҳәаз еиҧш, иҟалароуп ҳара ҳҧара, ҳара иҳарҳауа аҧара. Аинвестпрограммала  хышықәса рыҩныҵҟала иааиз 5 млрдки 400 млн мааҭ аҧара иунарбоит аинвестпрограммала иҳауз аасҭа ҳбиуџьет шеиҳахаз, ари ахырхарҭақәа зегьы рыла акәымкәа, ауааҧсыра русурҭақәа, руалафахәқәа рышьҭыхра азҵаара инамаданы. Абас иҟоуп аҭагылазаашьа».

Аҳəынҭқарра Ахада Ахада ихаҭыҧуаҩ имаҵзура ааныжьра иазкыз азҵаара аҭак ҟаиҵеит:

„Ари ахҭыс сара сазыразым. Уи Ахада ихаҭыҧуаҩ иӡбамҭоуп. Ари аҭагылазаашьаҿы даҽа мҩак збом аусура ада. Аӡəгьы иҳəом, аполитикатəи аекономикатəи усурақəа аанкылахоит ҳəа“.

Аконституциатə ҧсахрақəа рымҩақəҵара иазкыз азҵаара аҭакс, Ахада иазгəеиҭеит:

Аӡəгьы изы имаӡам, аконституциатə ҧсахрақəа рганахьала иҟаҳҵаз шмаҷым. Аусӡбаратə еиҭакрақәа, иаҧҵоуп Аконституциатə усӡбарҭа. Апарламент ахь ишьҭуп, акырҵуеит, алхратə система иазку апроект. Ҳара ҳазхиоуп еилаҧсоу асистемахь аиасра. Рыцҳарас иҟалаз, апарламент аҿы ари азҵааразы аусура макьана ҽеила имҩаҧысуам. Абри ахəҭа, аҩбатəи ахəҭа шхыркəшахалак, ахҧатəи ахəҭа алацəажəарахь ҳаиасуеит-азинмчқәа реихшарахь. Адунеи аҿы иҟоу аҧышəа уеизгьы-уеизгьы ахыҧшылара ҳҭахӡам. Ҳҳəынҭқарра ишазеиҕьхо ала ҳхатə знеишьа аҳҭар ҟалоит.

Аҳəынҭқарра Ахада имаҵзураҿы дзыхьӡази, дызхьымӡази азҵаара аҭак ҟаиҵеит:

„Абыржəы шəзызҵаауаз аконституциатə еиҭакрақəа ртәы ҳҳәозар. Иҟалоит аҭагылазаашьа еиҕьхар, абри апроцесс аҧхьаҟагьы иацҵахар. Рыцҳарас иҟалаз, ауаа реидкылара ҳалымшеит, уа “утəы - са стəы“ апринцип ала ҳшымныҟəазгьы. Анагӡаратə мчқəа рҿы иаанхеит аполитикатə позициас ирымазаалак аусура зылшаз.

Ҳтəыла азхаҵара аганахьала иҟаҳҵаша рацəоуп. Урыстəыла адəныҟаполитикатə усбарҭақəеи ҳареи ҳусеицуразы имаҷымкəа изыхəҭоу адокументқəа ирыҵаҩуп. Иҟаҵоу маҷӡам. Шьамтәыла ҳахьазханаҵаз-еицымҩаҧаҳгаз аусура иалҵшəоуп.

Аусӡбаратə приставқəа раҧҵара, аусӡбаратə системаҟны мҽхакы ҭбаала аиҭакрақәа мҩаҧгоуп. Аҭагылазаашьа аҽаҧсахит. Ааи, ари ахырхарҭаҿы еиҳа ирџьбараны аусура аҭахуп.

Иҳəатәуп, Аконституциатə усӡбара аҧҵара атәы. Уажəазы иақəнамго ахыбраҿы иҟоуп. Аха, аҧхьаҟа ишахəҭоу еиҧш зегьы ҟалоит.

Ашәахтә усхк аҟны аҭагылазаашьа аҽшаҧсахуа убаратәы иҟаӡами, Афон ҿыцтəи аҳаҧы аҿы, Риҵатəи аҳəырҧссарраҿы, аҧсшьарҭатə ҭыҧ „Пицунда“ ала. Арҭқəа зегьы ыҟамызҭгьы, уажə иҳамоу абиуџьет аҩыза ҳмоур ҟалон.

Гал аҭагылазаашьа. Гал араион иахьа акреминогентə ҭагылазаашьа атәы ҳҳәозар, зегь реиҳа иҭынчу араионқәа ируакуп. Ҳара иаҳаркит аиасырҭатə пунктқəа, анҭыҵынтə аҿагыларақəа шыҟазгьы. Уи аҭагылазаашьа бзиа аҧҵаразы алшара ҳнаҭеит.

Абанктə системаҿы шьаҭанкыла аҧсахрақəа ҟалеит. Ҳара уи ҩышықəса инарзынаҧшуа ҳаҿын. Уа аҭагылазаашьа уадаҩын, уажəгьы имариам. Абанктə структураҿы аусқəа еиҕьхо иалагеит. Ус еиҧш ахаан иҟамлацызт, раҧхьаӡа акəны, Абанк аҳəынҭқарра иахыҧхьанаӡалеит 22 миллион мааҭ. Абанки уи аилазаара, иара убас Апрокуратура аусбарҭақәеи аусӡбаратә усбарҭақәеи ракәӡами акредитқəа рыргьежьра иаҿу? 485 миллион мааҭ инареиҳаны аҧара ырхынҳəуп, 30 миллион инареиҳаны - аусӡбаратə усбарҭақәа рыбзоурала.

Ҳара ҳауаажəлар ракәӡами, шəареи ҳареи ҳами аихамҩатә, абанктə кредитқəа зшəо. Иахьазы ишəоуп 1 миллиардки 145 миллиони мааҭ. Абри аҭагылазаашьаҿгьы ҳтəыла аҩнуҵҟа абиуџьетə хыдҵақəа реиҧш, арҭ акредитқəа рзы иҳақəыз ахыдҵақәагьы рынагӡара ҳаҿуп. Аҳəынҭқарра 1 миллиардки 145 миллиони анапаҿы ианыҟаз иаман алшара иеиуеиҧшым ахырхарҭақəеи рҟны аҭагылазаашьа аҧсахразы.

Ҳара Аҧареизакырҭа аусура иалаҳаргеит. Ари згәамҧхо рацәаҩуп. Изҧырхагоу ыҟоуп. Апроцесс мариаӡам, аха иара аусура иалагеит.

Аханатә исҳәаз еиҭа иазгәасҭар сҭахуп, ҳтәыла абиуџьет иазҳаит. Џьоукы ари шрыдыркылазаалак, ишахцәажәазаалак, ишырҳәо еиҧш иҟаӡам. Ааи, иуадаҩуп, аинфлиациа ыҟоуп, акурсқәа еиҟараӡам. Аха абарҭ ауадаҩрақәа шыҟоугьы, арбагақәа реизырҳаразы алшарақәа ҳамоуп».

Қырҭтәылеи ҳареи ҳабжьара аҳәааҟны иҟоу ахәаахәҭразы азҵаара аҭак ҟаҵо, Ахада абас иҳәеит:

«Сара изныкымкәа ари салацәажәахьеит. Ари апроцесс ыргаматәуп. Егры аӡиас ала аҳәааҿы Қырҭтәылеи ҳареи ҳабжьара имҩаҧысуа аусқәа, иҟоуп изакәаным аизыҟазаашьақәа, ҳганахь иаауа иарбанзаалак атауар ҳџьырмыкьаҟны демпинг (ахәҧса аиҵатәра) аҧнаҵоит. Ҳара ҳаалыҵ аҵахоит аицлабраҟны, Қырҭтәылантәи иаауа атауар ахә еиҳа иеиҵоуп урҭ аҳәааҿы изхысраны иҟоу аҧҟарақәа акагьы иқәныҟәаӡом аҟнытә..

Сара сгәаанагарала, абас ада ҧсыхәа ыҟаӡа. Ари имараиоу усӡам, аха иара ҟаҵатәуп. Қырҭтәылантәи иаауа атауар ашәҟәы иҭагалазароуп. Ҳара аибашьра ашьҭахь иаразнак аҳәааҿы аҳазалхрақәа мҩаҧаҳгон. Ашьҭахь ари мап ацәктәуп ҳәа иҳаҧхьаӡеит. Џьоукы амал дырҳауеит, ҳхәынҭқарра убри аан уи ацәыӡуеит. Ас иҟамлароуп!».

Ахада аҭак ҟаиҵеит Ахада ихаҭыҧуаҩ напхгара ззиуаз акомиссиақәа аҧхьаҟатәи русуреи уи анапхгаҩи инарымаданы иқәыргылаз азҵаара.

«Ари апроблематика иалацәажәо даара ирацәаҩуп. Аха ауаҩы амаҵура иаҭара ҟалоит Аусҧҟа инақәыршәаны. Уи деилкаауп, сгәы иаанагоит иаҭахо иусура ахаҭабзиара еицәахом ҳәа. Ахада ихаҭыҧуаҩ напхгара ззиуаз акомиссиақәа зегьы русура иацҵахоит».

Аҳәынҭқарра Ахада иара убас афымцамчтә усхк аҿиара иазкыз азҵаара аҭак ҟаиҵеит.

«Ари аҟәша ачынуаа русбарҭақәа рыла мацара иаҳзеиқәырхаӡом. Ҳауаажәлар абри азҵаара даҽакала иазнеилароуп. Ацифрақәа шәзаазгоит. Гагра арион мацараҿы, аҭагылазаашьа цәгьам-бзиам еиҳа иахьеиҕьу, акурортқәа инарыдҳәаланы, «Амшынеиқәафымцамч» иаиураны иҟаз 130 миллион мааҭ рахьтә актәи ашықәсбжазы 16 миллион мааҭ роуп иршәаз. Ари цхыраагӡа дуӡӡоуп «Амшынеиқәафымцамч» азы, азҵаарақәа жәпакы рыӡбара алшон. Аха, ибзианы, Урыстәыла аганахьала иҳауз ацхыраара иабзоураны аиҵастанциақәа рыҟны аҭагылазаашьа аҧсахра ҳалшеит. Аҵыхәтәантәи 3-4 шықәса рыҩныҵҟа, игәашәҭазар ҟалап, афымцамч аҟны иаалырҟьаны аҽеиҭакрақәа, арцәарақәа ыҟаӡам. Аха афымцамҩанызго ацәаҳәақәа, 220-тәиқәа ҳәа изышьҭоу, аҩныҵҟатәи акаҭақәа рҭагылазаашьа уашәшәыроуп. Ари аҭагылазаашьа аҧсахразы апрограмма анагӡара ҳамацара иҳалшаӡом. Уи азы инвесторцәа аҭахупы. Ари аҧара рацәаны иаҭахуп. Аминистрцәа реилазаараҟны апрограмма иҳамоу иазҧхьагәанаҭоит 10 миллиард мааҭк рҟынӡа, аха зны 3 миллиард мааҭк рыла ҳалагоит азҵаарақәак рамхразы. Астанциа маҷқәа ртәы макьана иаҳҳәартә ҳаҟаӡам. Аҧхьаҟатәи Аинвестпрограмма иалаҳҵеит, адгылара арҭо арымҭо макьана иҳаздырӡом, Гал араион аҟны амҩангагатә станциақәа аус рыдуларазы. Ари акыр азҵаарақәа аӡбон. Иааизакны, еиҭасҳәоит, аҭагылазаашьа макьана иуадаҩуп.

Ахада иара убас аҟәатәи аҳаиртә баҕәаза аартра инамаданы азҵаара ирҭеит.

«Уажәы иҟалараны иҟоу атәы салацәажаәар сҭахӡам, аха аусура мҩаҧысуеит. Заа ахырхарҭақәа ртәы аҳәара сҭахӡам. Урыстәыла Ахадеи сареи ари азҵаара ҳалацәажәеит».

Аҳәынҭқарра Ахада иара убас изҵааит Қырҭтәыла НАТО имҩаҧнаго арратә ҽазыҟаҵарақәа рзы.

«Иџьашьатәуп, Қырҭтәыла ҳара иҳаҕаӡам ҳәа абжьқәа го иахьалагаз, аизыҟазаашьақәа ҳабжьаҳҵароуп ҳәа ахьырҳәо. Аӡәыр инапы аҵаиҩхьоума амчра ахамырхәаразы адокумент. Иаҳхашҭуа ҳалагама Қырҭтәыла арҭ азҵаарақәа еибашьрала аӡбара ишазхиоу. Ҳара ахаангьы Қырҭтәыла ҳаҵанакӡомызт. Уи мчыла иаҧҵаз шьақәгыларан усҟан, уахь шьҭа хынҳәышьа ҳамаӡам.

НАТО аҽазыҟаҵарақәа ртәы акәзар, дара урҭ аҽазыҟаҵарақәа мҩаҧыргоит, ҳара урыстәылатәи архәҭақәеи ҳареи ҳҽеимаданы имҩаҧаҳгоит».


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT