Аҧсны Аҳәынҭқарра Ахада

 

Аҧсны Аҳәынҭқарра Ахада Рауль Ҳаџьымба аинрал-леитенант Ҳасан Лагәысҭан-иҧа Ҳаразиа ибаҟа аартра иазку иажәа

25.08.2018

Нанҳәамза 25 рзы Аҧсны Аҳәынҭқарра Аҧыза-министр ихаҭыҧуаҩ Асҭамыр Қьецба Ар Ҟаҧшь 10-тәи рҳаир-десанттә бригада акомандаҟаҵаҩ, аинрал-леитенант Ҳасан Лагәысҭан-иҧа Ҳаразиа Урыстәылатәи Афедерациа Раменское ақалақь аҟны ибаҟа аартра иалахәыз ирызкыз Аҧсны Аҳәынҭқарра Ахада Рауль Ҳаџьымба иажәа даҧхьеит. 

Атекст аҟны, ҷыдала, иҳәоуп:

«Абзиара шәымаз Ҳасан Лагәысҭан-иҧа Ҳаразиа ибиуст аартра иазку аофициалтә церемониа иалахәу, асасцәа. Иҭабуп ҳәа расҳәоит ақалақь анапхгара, аскульптор, аиҿкааҩцәа, 100-тәи Свиртәи Арҟаҧшьтә гвардиатә хысратә дивизиа аветеранцәа Рхеилаки Урыстәыла Адесантуаа Реидгылеи абас еиҧш аҵак ду змоу ахҭыс аиҿкаареи амҩаҧгареи рзы.  

Ҳара зегьы ибзианы иаҳдыруеит Аҩбатәи адунеитә еибашьраан, асовет жәлар афашисттә Германиа иаҿагыланы ианықәгылаз адунеизегьтәи аҭоурых. Аҧсны аҵеицәа, аҭыҧҳацәа аган аҿы инымхеит афашизм иаҿагыланы ақәҧараҿы. Убарҭ аҵеицәа хьӡырҳәагақәа дыруаӡәкуп Ҳасан Лагәысҭан-иҧа. Уи аҧышәа змаз офицерк иаҳасабала 1941 ш. инаркны 1945 шықәсанӡа аибашьра мҩа данысхьан. 1942 шықәсазы ахәра ҕәҕәа иоуз анаҩс иҽыхәышәтәны асовет ар деиҭанарылагылеит, дагьрылахәын изнынкымкәа иеиуеиҧшым арратә операциақәа. Лагәысҭан Ҳаразиа дрылахәын Венгриа, Австриа, Чехословакиа ахақәиҭтәразы ицоз аибашьрақәа. Уи аҧсадгьыл аҿаҧхьа илшамҭақәа атәыла анапхгара ахә ҳаракны иршьахьеит, ианашьоуп аҳәынҭқарратә, арратә ҳамҭақәа.  

Раменское ақалақь адесанттә ар ашьақәгылара иахыҵхырҭоуп ҳәа иҧхьаӡоуп. Ҳара ҳаҭыр дуны иҳадаҳкылоит ахьӡ-аҧша амҩаҟны ҳџьынџьуаҩ аинрал, Раменское ҳаҭыр зқәу атәылауаҩ - Ҳасан Лагәысҭан-иҧа Ҳаразиа ибаҟа ашьақәыргылара. 

Гәык-ҧсыкала зегьы ишәзеиҕьасшьоит агәабзиара, аҭынчра, аихьӡарақәа шәнапы злаку аус бзиақәа рыҟны».


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT