Аҧсны Аҳәынҭқарра Ахада

 

Рауль Ҳаџьымбеи Владимир Путини еиԥылеит

24.08.2018

Рауль Ҳаџьымбеи Владимир Путини еиԥылеит

2.jpgНанҳәамза 24 рзы Аԥсны Аҳәынҭқарра Ахада Рауль Ҳаџьымба усуратә визитла Урыстәылатәи Афедерациаҿы иҟазаараан имҩаԥысит Урыстәылатәи Афедерациа Ахада Владимир Путини Аԥсны Аҳәынҭқарра Ахада Рауль Ҳаџьымбеи реиԥылара.

Владимир Путин: Шәбара сеигәырӷьоит, бзиала шәаабеит Москва. Ҳарҭ ҳазегьы еицазгәаҳҭоит Аԥсны Аҳәынҭқарра Ахьыԥшымра Урыстәылатәи Афедерациа иазханаҵеижьҭеи жәашықәса ахыҵра. Ари даара аҵакы змоу, насгьы иҭоурыхтәу хҭысуп шәҳәынҭқарразы, иара убас Урыстәылатәи Афедерациазгьы аҵакы маҷӡам ари аныҳәа.
Иазгәасҭарц сҭахуп, арҭ ашықәсқәа ирылагӡаны акыр аиҭакрақәа шыҟалаза ҳаизыҟазаашьақәа рганахьала, аҳәынҭқаррабжьаратәи еимадарақәа акыр рышҽдырӷәӷәаз. Ҳарҭ азҿлымҳара ӷәӷәа аҳҭоит Аԥсны Аҳәынҭқарра ашәарҭадара алыршаразы ҳусеицура. Уахь иаҵанакуеит арбџьарымчқәеи аҳәаахьчаратә маҵзурақәеи инарымаданы ҳусеицурагьы. Аусура шьақәыргылоуп, сара сызлахәаԥшуа ала, алҵшәа бзиа амоуп. Уажәаԥхьа имҩаԥысыз шәареи ҳареи ҳаиԥылараҿы, зҿлымҳара зышәҭоз ауадаҩрақәа, аҳәааҿы агәаҭарҭатә ҭыԥқәа реизырҳара, шьыбжьхьаан имҩаԥгаз аицәажәараҿы Шәареи сареи иеицазгәаҳҭаз, абзиара аганахь ала аҭагылазаашьа аҽаԥсахит.
Сгәы иаанагоит, аԥхьаҟагьы ари ахырхарҭала ҳусура иацаҳҵоит ҳәа, адәныҟатәи ацәаҳәа рӷәӷәо, Аԥсны Аҳәынҭқарреи Урыстәылатәи Афедерациеи рыбжьара агәаҭарҭатә ҭыԥқәа рҟны аҭагылазаашьа еиӷьтәуа. Ҳарҭ, аекономикаеи, аинфрастуктура аҿиара аус аҟни ҳусеицура иазҳарҳауеит. Арҭ азҵаарақәа зегьы нҭырҳәыцааны уажәы ҳрылацәажәап ҳәа сгәы иаанагоит.

Рауль Хаџьымба: Ҳаҭыр зқәу Владимир Владимир-иҧа, иҭабуп ҳәа шәасҳәоит ааҧхьара иҳашәҭаз азы, Урыстәылатәи Афедерациа аганахьала Аҧсны Аҳәынҭқарра ахьыҧшымра азхаҵара 10-шықәса ахыҵра аламҭалазы ҳаиҧылара ахьалыршахаз. Ҳтәыла азхаҵара – ҳажәлар ашәышықәсақәа раахыс изеигәыҕуаз рыгәҭакы ауп, хымҧада, ари ҳара ҳзы акрызҵазкуа хҭысуп.
Иахьа ирыҵаҩуп еиуеиҧшым ахырхарҭақәа рыла азҵаарақәа рыӡбара ҳалзыршо 130 инареиҳаны ҩ-ганктәи адокументқәа. Ари Аҧсны асоциалтә-економикатә ҿиара, иаку атәылахьчаратә цәаҳәа аҧҵара, адәныҟаполитикатә усура аусхк аҟны аусеицура азҵаарақәа ирызкуп. Аусеицура мҩаҧысуеит Урыстәыла адәныҟатәи аусқәа рминистрреи ҳара ҳабжьара. Иазгәаҭатәуп, Аидгылареи астратегиатә еиҩызареи рзы аиқәшаҳаҭра ианаҵаҩха инаркны арҭ азҵаарақәа инарымаданы аҭагылазаашьа аҽшаҧсахыз. Иҵегь аусура ырццакызар сҭахын, ҷыдала, асоциалтә-економикатә, адәныҟаполитикатә, атәылахьчара, ашәарҭадара ахырхарҭақәа рыҟны. Сгәы иаанагоит, иахьатәи аиҧылара арҭ азҵаарақәа жәпакы рылацәажәаразы алшара ҳнаҭап ҳәа. Иҭабуп.




Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT