Аҧсны Аҳәынҭқарра Ахада

 

Нанҳәамзазтәи аибашьра жәашықәа ахыҵра инамаданы Анатоли Бибилов ишҟа ааҧхьара

08.08.2018

Нанҳәамза 8 рзы Аҧсны Аҳәынҭқарра Ахада Рауль Ҳаџьымба Алада Уаҧстәыла Ареспублика ахада ишҟа ааҧхьара дәықәиҵеит аибашьра жәашықәа ахыҵра инамаданы.

Ааҧхьараҟны, ҷыдала, иҳәоуп:


«2008 шықәс нанҳәамза 8 рзы, ауаҧс жәлар рнырҵәара еиҭа зҽазызшәаз Қырҭтәыла ажәылара иадҳәалоу ахҭыс бааҧсқәа ахааназы Аҧсны жәлар ирхашҭраны иҟаӡам. Ари амш аҽны ихацыркын хәымыш ицоз аибашьра, иҭахеит хыҧхьаӡара рацәала ауаа..  
Аҧсны жәлар ибзианы иргәалашәоит аибашьра иннажьуа ахәра хьанҭақәа. Илахьеиқәҵагоу абри амш аҽны шәхьаа шәыцеиҩшо, иаҳгәалаҳаршәоит Алада Уаҧстәыла арҧарцәеи аҭыҧҳацәеи, ақырҭуа агрессор ижәылараан иҭахаз. Хаҵара згым ауаҧс жәлар аибашьра ду иалҵны, иззықәҧоз аиааира  агара рылшеит рыҧсадгьыл ахақәиҭтәреи ахьыҧшымреи рзы ақәҧараҿы. Иахьа иаҿуп зхы иақәиҭу идемократиатәу аҳәынҭқарра, аҧеиҧш бзиа аргылара амҩа ианылеит.  
Ажәларқәа рықәхра иаҿагыланы, агрессор иаанкылара зхы иадызҵаз Урыстәылатәи Афедерациа аганахьала иҟаҵаз акрызҵазкуа ашьаҿа иабзоураны, Аҧсни Алада Уаҧстәылеи иахьа аҭынч ҧсҭазаара аргылара иаҿуп.
Ҳаҭыр зқәу Анатоли Илиа-иҧа, Шәаргьы, Алада Уаҧстәыла ажәлар зегьи ишәзеиҕьасшьоит аҭынчра, аманшәалара, аизҳазыҕьара».


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT