Аҧсны Аҳәынҭқарра Ахада

 

Ахада аныха хыбра аргыларазы ахарџьқәа реизгара иазкыз агәыҳалалратә марафон аартра далахәын

04.08.2018

Нанҳәамза 5 рзы Аҧсны Аҳәынҭқарра Ахада Рауль Ҳаџьымба Тҟәарчал ақ. аҟны ац. ааӡаб ду Еустаҭ Аҧсилтәи (Амаршьан) ихьӡ зху аныха хыбра аргыларазы ахарџьқәа реизгара иазкыз агәыҳалалратә марафон аартра далахәын.

Тҟәарчал араион Администрациа ахада Аида Чачхалиаҧҳа амарафон аҿы иеизаз бзиала шәаабеит ҳәа раҳәо, дықәгылеит.

"Иахьа Тҟәарчал иҟоу ахҭыс аҭоурыхтә ҵакы амоуп. Иара аҭоурыхи иахьа ҳазҭагылоу аамҭеи еимаздо акоуп. Аныха ҳауаажәлар рыҩныҵҟа абзиара аихаҳара, аҳаҭыреиқәҵара, аҳәоуеиқәшәара арҕәҕәара иацхраауеит. Аныха аргылара хацыркхоит ҳақалақь иқәынхо ауааҧсыра ргәы азыҳәаны, ирҭахны. Иара аргыларагьы аҧшьызгаз тҟәарчалаа роуп. Ари аус адгылара аиҭеит Акультура-гәыҳалалартә фонд "Ашана"аҧҵаҩы Беслан Шьакаиа. Аҧсны Ақьырсиантә иашахаҵаратә ныха ақәныҳәаны, Аиааира 20-шықәса ахыҵра аламҭалазы ахаҳә шьҭаҵаны ашьапы кын. Иахьа Акультура-гәыҳалалартә фонд "Ашанеи" ац. цҳаражәҳәаҩ Симон Кананити ац. ааӡаб ду Еустаҭ Аҧсилтәии рфонд иҟанаҵаз адгыларала Тҟәарчал ақалақь аҟны агәыҳалалратә марафон мҩаҧысуеит. Иҭабуп ҳәа шәасҳәоит ари аус бзиа иақәҿызҭыз зегьы. Аныха ақалақь аҧсы ҭанаҵоит, ақьырсиануаа аднаҧхьалоит. Иара аргылара ахаҭагьы аусурҭа ҭыҧқәа аҧнаҵоит. Сгәы иаанагоит хара имгакәа, ақалақь доуҳала, економикала аиҭаҿиара иалагоит ҳәа", - лҳәеит Аида Чачхалиаҧҳа. 

Ахада аусмҩаҧгатә иалахәыз аҧсшәа реиҳәеит.

"Ҳаҭыр зқәу амарафон иалахәу, иаҳҭааз асасцәа, аныха аргыларазы раҧхьатәи ашьаҿақәа ҟазҵо зегьы! Ҳара ҳдоуҳатә уасхыр есааира арҕәҕәара, аихаҳара аҭахуп ҳәа исыҧхьаӡоит. Ҳара ҳажәлар ракрала аҧсуа ҳәынҭқарра аргылара шрылшо агәра ҳдыргеит. Анцәа сиҳәоит, ҳажәлар гәыла-ҧсыла ицқьаны, иаӡәыкны, адоуҳамч рыманы, ҳабацәа, ҳашьцәа рус ҧхьаҟа анагара рылшартә иҟаиҵарц азы", - иҳәеит Ахада. 

Акультура-гәыҳалалартә фонд "Ашана"аҧҵаҩы Беслан Шьакаиа амарафон зҽалазырхәыз зегьы иҭабуп ҳәа реиҳәеит.

"Раҧхьа иргыланы, иҭабуп ҳәа расҳәарц сҭахуп аблокада иҭакыз Тҟәарчал ахьчара зхы ақәызҵаз 246-ҩык аибашьцәа-фырхацәа рыхьӡала, урҭ рахьтә 136-ҩык Тҟәарчал иалҵыз ракәын, аныхатә комплекс аргылара адгылара аҭаразы имҩаҧысуа агәыҳалалратә марафон аҟны иеизаз зегьы. Сгәы иаанагоит, ҳтәыла ахақәиҭразы иҭахаз рыхьӡ акамыршәразы, наунагӡа ргәалашәаразы аныха аргылара иеиҳау ус ыҟам ҳәа. Асимволтә ҵакгьы амоуп аныха аибашьҩы, ааӡаб ду Еустаҭ Аҧсилтәи Маршьанаа рхылҵшьҭра змаз ихьӡ ахьахыло", - иҳәеит Беслан Шьакаиа. 

Аҧсны Ақьырсиан иашахаҵаратә ныха Ахада аҧшьаҩыеиҳабы Бассариан (Аҧлиаа) агәыҳалалратә марафон аиҿкааҩцәеи иалахәыз зегьи дрықәныҳәеит.

 IMG_9335.JPG

 


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT