Аҧсны Аҳәынҭқарра Ахада

 

Ахада агәабзиарачаҧарҭатә хәыҷтәы лагер “Ажәеиҧшьаа” даҭааит

03.08.2018

Нанҳәамза 3 рзы Аҧсны Ахада Рауль Ҳаџьымба Аҵареи аҭҵаарадырреи рминистрреи Асоциалтә ҧгаҧсеи аџьа ахьчареи рфонди иеиҿыркааз агәабзиарачаҧарҭатә хәыҷтәы лагер “Ажәеиҧшьаа” даҭааит.
Алагер еиҿкаауп Риҵатәи арелиқттә милаҭтә парк аҩныҵҟа. Ахада алагер аҟны иҟоу ахәыҷқәа драцәажәеит, дахәаҧшит иара аиҿкаашьа.
«Ари ус бзиоуп ҳәа исыҧхьаӡоит. Аҳәынҭқарра азы мацара акәым, хаҭа-хаҭала ахәыҷқәа зегьы рзы. Ара аҩызцәа дырҳауеит. Ахәыҷқәа аҧсабара, аекологиа, акультура азыҟазаашьа ддырҵоит. Ари ҳтәылазы ирымоу адыррақәа ирыцырҵоит», - иҳәеит аҳәынҭқарра Ахада.
Аҵареи аҭҵаарадырреи рминистр Адгәыр Какоба апроект ахықәкы хадақәа дрылацәажәеит.
«Ашьха имаацыз, аратәи аҧсабара зымбац ахәыҷқәа маҷҩымкәа иҟоуп. Ари аус ҳалагап ҳәа ҳаӡбеит, иагьеиҿаҳкааит Асоциалтә бгаҧсеи аџьа ахьчареи рфонд иҟанаҵаз афинанстә цхыраара иабзоураны. Алагер аҟны иҟоуп ҳтәыла араионқәа зегьы рыҟнытә ахәыҷқәа. Реиҳараҩык ареспубликатә Олимпиадақәа, Аспартакиадақәа, егьырҭ аицлабрақәа ирылахәыз ахәыҷқәа роуп. Актәи агәыҧ иалахәуп ҩынҩажәаҩык ахәыҷқәа. Егьырҭ агәыҧқәа ирылахәхоит ахшарарацәазмоу аҭаацәарақәа рыҟнытә ахәыҷқәа, ашкол-интернатқәа рыҟнытә аҵаҩцәа. Сара иҭабуп ҳәа расҳәоит ахәыҷқәа ирхылаҧшуа ааӡаҩцәа. Дара зегьы аҟәатәи алицеи-интернат аусзуҩцәа роуп. Аҧхьаҟагьы ас еиҧш иҟоу алагерқәа рацәаны еиҿаҳкаалоит ҳәа сгәы иаангоит. Ашьха аҧсшьара ахәыҷқәа ргәабзиара иазеигьуп», - иҳәеит Адгәыр Какоба.
Алагер иалахәу ахәыҷқәа ашьха рыҧсшьара шымҩаҧысуа атәы иалацәажәеит.
«Даара исгәаҧхеит аратәи аҧсабара. Даара аҭагылазаашьа бзиа аҧҵоуп аҧсшьаразы. Сара асахьаҭыхра бзиа избоит азы ари аҭыҧ аҿы даҽаџьара иеиҧшымкәа аусура сгәаҧхоит», - лҳәеит Очамчыратәи ашкол-интернат №1 аҵаҩы Алиона Степаненко.
Алагер аҟны аамҭа шырхырго атәы рҳәеит иара убас Аҧсны аҭоурых иазкыз аицлабра «Нарҭаа» аҟны аиааира згаз Баграт Агәмааи Глеб Аџьбеи.
«Зегьы ҳгәаҧхоит. Ара амилаҭтә хәмаррақәа мҩаҧаҳгоит. Ҩынтәны ныҟәара ҳцахьеит, даҽаџьарагьы ҳцараны ҳаҟоуп. Аӡиа Мзы аҟынӡа ҳхалеит, зынӡа, 14 километр ҳныҟәеит. Убла хнакуеит ари аҭыҧ аҧшӡара», - рҳәеит дара.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT