Аҧсны Аҳәынҭқарра Ахада

 

Ахада ааигәа зынхарҭа ҭыҧ аҟны археологиатә маҭәахәқәа зыԥшааз, Аҷандара ақыҭан инхо Русҭам Чхебелиа дидикылеит

02.08.2018

Нанҳәамза 2 рзы Аԥсны Аҳәынҭқарра Ахада Рауль Ҳаџьымба ааигәа зынхарҭа ҭыҧ аҟны археологиатә маҭәахәқәа зыԥшааз, Аҷандара ақыҭан инхо Русҭам Чхебелиа дидикылеит.

Аиԥылара алагамҭазы Акультуреи аҭоурых-культуратә ҭынхеи рыхьчаразы аминистр ихаҭыԥуаҩ Баҭал Кобахьиеи Русҭам Чхебелиеи аҭоурых-культуратә ҭынха ахьчара ахыбра ахархәаразы аҭынхахьчаратә хыдҵа рнапы аҵарҩит.

„Аҵыхәтәантәи 25 шықәса ирылагӡаны ҳара ҳмузеи ас еиԥш аҵак ду змоу аԥшааратә лагаламҭа амоуцызт. Ҳара иаҳҭахуп ҳажәлар ирдыруазарц аҭоурых-культуратә ҭынха аобиектқәа ишрызныҟәатәу, ижәытәӡатәиу ҳадгьыл иаҵаҵәахны иаанаго. Аҭоурых-культуратә ҭынха азакәан инақәыршәаны, аҳәынҭқарратә усбарҭеи ақьырагаҩи мамзаргьы ахатәтәҩи рыбжьара ахьчаратә хыдҵақәа рзы анапаҵаҩра аҧҟара ыҟоуп. Рыцҳарас иҟоу, ас еиԥш аҭыԥқәа ирыдҳәалоу ауаа анапаҵаҩра рацәак ирҭахым. Сара сзы гәахәара дуп, иахьа ари адокумент ҳнапы ахьаҵаҳҩыз. Уи иаҳәоит, ари культуратә ҭынханы ишыҟоу, архелогиатә ԥшаарақәа ишреиуоу, еиҷаҳарала ишазнеитәу, аԥхьаҟагьы ас еиԥш иҟоу адгьылтә усурақәа рзы ахьчара знапы иану аҳәынҭқарратә усбарҭақәа адырра шрыҭалатәу, хымҧада, уи азы еснагь аимадара ыҟазароуп“, - ҳәа азгәеиҭеит анапаҵаҩра анаҩс Баҭал Кобахьиа.

Аҳәынҭқарра Ахада инаҵшьны иазгәеиҭеит Русҭам Чхебелиа иҟаиҵаз аҧсадгьыл азыҟазаашьазы иреиҕьу аҿырҧшыгақәа ишреиуоу.

„Ари даара хҭыс дууп ҳара ҳтәылазы. Хымԥада, иазгәаҭатәуп ари ауаҩ аҭагылазаашьа дшазныҟәаз. Иара архелогиатә усқәа инапы шрылакымгьы, иҩны ақыҭанхамҩатә усқәа дахьырҿыз, абас еиԥш иҟаз амаҭәахәқәа ибеит. Раԥхьа иргылеит иԥсадгьыл аинтересқәа, аҭоурыхтә ҭҵаарадырра. Ари хәы змаӡам ҧшаахымҭоуп, ижәытәӡатәиу ҳҭоурых адырразы акырӡа ицхыраагӡоуп. Иҭабуп идуӡӡаны. Ари зегьы рзы ҿырԥшы бзиоуп“, - ҳәа азгәеиҭеит Ахада.

Русҭам Чхебелиа атәыла Ахада ҭабуп ҳәа иаҳәо иазгәеиҭеит, ахҭыс аҟны ихымҩаԥгашьа ҵак дуӡӡаны аманы ишимԥхьаӡо.

«Иҭабуп даара, сара, уеизгьы-уеизгьы, уамак ҟасымҵеит“, - иҳәеит Русҭам Чхебелиа.

Аԥснытәи аҳәынҭқарратә музеи адиректор Аркади Џьапуа Русҭам Чхебелиа иҭабуп ҳәа иеиҳәеит аҧшаахымҭақәа аҳәынҭқарра иахьаиҭаз азы.

„Ламысла ихы мҩаԥигеит, аҳәынҭқарра ианеишьеит хәы змоу археологиатә аԥшаахымҭақәа. Иҳаҩсыз ашықәсқәа рзы ари адгьылҵакыраҿы аԥшаарақәа мҩаԥаҳгахьан. Иара ари разҟыс иман, зеиӷьыҟам амаҭәарқәа иԥшааит. Иахәҭоу аҭҵааратә усурақәа зегьы анхыркәшахалак анаҩс, урҭ Амузеи аҿы иаԥсоу аҭыԥ ааныркылоит. Сара сыхьӡала, амузеи аусзуцәа зегьы рыхьӡала иҭабуп идуӡӡаны ҳәа иасҳәоит“, - иҳәеит Аркади  Џьапуа.

Аиԥылара ахыркәшамҭаз, Аҳәынҭқарра Ахада Русҭам Чхебелиа аԥаратә, агәаларшәагатә ҳамҭақәа ианеишьеит.

 


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT