Аҧсны Аҳәынҭқарра Ахада

 

Аԥсны Ахада арепатриациеи ҳџьынџьуаа рнаплакы ақәлареи инарымаданы инеиҵыхыз ауаажәларратә еизара далахәын

31.07.2018

Аԥсны Ахада арепатриациеи ҳџьынџьуаа рнаплакы ақәлареи инарымаданы инеиҵыхыз ауаажәларратә еизара далахәын

Ԥхынгәымза 31 рзы Аԥсны Аҳәынҭқарра Ахада Рауль Ҳаџьымба арепатриациеи ҳџьынџьуаа рнаплакы ақәлареи инарымаданы имҩаҧысыз инеиҵыхыз ауаажәларратә еизара далахәын .

«Аԥсны Аџьынџьтәылатә еибашьра ианалага, ҳашьцәа ԥшрак ҳәа ҟамҵакәа, Ҭырқәтәылантәи иааит. Иҟан урҭ рахьтә ахәрақәа зауыз, иара убас иҭахақәаз. Ҳџьынџьуаа рҭоурыхтә ԥсадгьыл ахь рыхынҳәра-акыр шықәса раахыс иуадаҩу зҵаараны иқәгылоуп.

Иҟалаз ацәгьоура инадҳәаланы, ҳарҭ аӡәк иеиҧш ҳаицҿакны ӷәӷәала ҳақәыӡбароуп иҟалаз аус. Ари уажәаԥхьа иӡбатәын. Азинхьчаратә усбарҭақәа русура ауаажәларра рҟынтәи адгылара аиуроуп. Иабаҟаз ауаажәларратә хеидкылақәа, апартиақәа, аинтеллигенциа? Аӡәгьы ақәҿиҭуамызт, аҭагылазаашьа ахала аҽарҽеиуаз џьыршьон.

Зегьы ирдыруазароуп, даҽакала ари аус ӡбашьа амаӡам, азакәани Аконституциеи ирықәныҟәатәуп. Ари ацәгьоура иалахәыз зегьы рықәнага иақәшәароуп.

Ҳара ҳашьцәа рҵасқәа,  рқьабызқәа, рхатәы бызшәа еиқәдырхеит. Уи рылшеит аҳәынҭқарратә усбарҭақәа рҟынтәи изаҟаразаалак цхыраарак рымаӡамкәа. Ари дара рџьынџь дгьыл ауп, дара рыԥсадгьыл ауп, уи зегьы ирдыруазароуп»-иҳәеит, ҷыдала, аҳәынҭқарра Ахада.

Аҧсадгьыл ахь архынҳәразы аминистр Беслан Дбар иқәгылараҿы иазгәеиҭеит 25 шықәса рыҩныҵҟа аҳәаанырцәынтәи ҳџьынџьуаа рыԥсадгьыл ахь рырхынҳәреи, аратәи аԥсҭазаара раршьцыларази аҳәынҭқарра иҟаҵанахьоу шмаҷым. Инаҵшьны иазгәеиҭеит, арепатриациа азҵаарақәа рыӡбаразы комплексла азнеишьа шаҭаху. Аминистр иара убас иазгәеиҭеит, ауаажәларратә хеидкылақәеи апартиақәеи иҟалаз ацәгьоура ишақәҿырымҭыз.

«Ҳдиаспора ахаҭарнакцәа ҳҳәынҭқарраҿы имҩаԥысуа аԥсҭазаара иалахәуп. Иҟоуп апарламент адепутатцәа, еицырдыруа анаплакҩцәа, урҭ рхыԥхьаӡараҿы ақыҭанхамҩаҿы зылшамҭақәагьы маҷым ауаа. Ҳара ҳреиҷаҳароуп, ҳаҭырла арҭ ауаа ҳрызнеироуп», - иҳәеит Беслан Дбар.

Аԥсны абыргцәа рхеилак ахантәаҩы, Аԥсны Афырхаҵа Аполлон Шьынқәба Аԥсны абыргцәа реилазаара ахьӡала ҳтәыла анапхгара рахь ааԥхьара ҟаиҵеит.

«Иҟалаз ацәгьоура ҳарҭ зегьы ҳзызхәыцша хҭысуп. Ахара зду иқәнага дақәыршәатәуп. Сара ари ааԥхьара араионқәа рыҟны иҟоу абыргцәа зегьы рыхьӡала иҟасҵоит. Азинхьчаратә усбарҭақәа иаарласны ари аус аҭыԥ иқәырҵароуп, ацәгьоуцәа рыԥшаароуп. Аринахысгьы ас еиԥш иҟоу ахҭыс бааԥс аҭыԥ амамзароуп ҳашьцәа рганахьала»-ҳәа азгәеиҭеит Аполлон Шьынқәба.

Аиԥылараҿы иара убас дықәгылеит Аԥсны Жәлар рпартиа ахантәаҩы Иақәыҧ Лакоба.

«Ҳара иреиҳау ахара рыдҵазарц аҳәара ҟаҳҵоит арепатриациа аусқәеи хаԥсыра баны зыԥсадгьыл иазыхынҳәыз ҳашьцәа рлахьынҵеи абас ала рыӡбара иақәызкыз ауаа», - ҳәа азгәеиҭеит иара.

Аиԥылара ахыркәшамҭазы уи иалахәыз зегьы ааԥхьара ҟарҵеит атәыла анапхгара рахь, аҳәаанырцә инхо ҳдиаспореи ҳареи ҳаимадарақәа рырӷәӷәареи, иара убас иҟалаз ацәгьоура иҷыдоу ахылаԥшреи рыҭаразы.

 3.JPG7.JPG5.JPG


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT