Аҧсны Аҳәынҭқарра Ахада

 

Ахада Очамчыра араион Администрациа аколлектив араион Ахада инапынҵақәа назыгӡо дыдирдырит

27.07.2018

Ахада Очамчыра араион Администрациа аколлектив араион Ахада инапынҵақәа назыгӡо дыдирдырит

Ҧхынгәымза 27 рзы Аҧсны Аҳәынҭқарра Ахада Рауль Ҳаџьымба Очамчыра араион Администрациа аколлектив араион Ахада инапынҵақәа назыгӡо Гиви Допуа дыдирдырит.

«Ҧасатәи араион Ахада ииҩыз арзаҳал инақәыршәаны имаҵураҟнытә ихы дақәиҭтәуп. Ари игәабзиаратә ҭагылазаашьа иадҳәалоуп, аха сгәы иаанагоит, Хьрыҧс Џьапуа аҧхьаҟагьы атәылазы дхәарҭахап ҳәа. Иацы изыхәҭоу аицәажәарақәа рышьҭахь, араион дацхраап ҳәа иҧхьаӡаны, Очамчыра араион Администрациа Ахада инапынҵақәа рынагӡаразы Гиви Допуа иаҭара иазку Аусҧҟа снапы аҵазҩит. Гиви Допуа ҧаса аус ахьиуаз аҭыҧқәа рыҟны аихьӡара бзиақәа иман. Сгәы иаангоит, ари аус аҟынгьы шәаргьы адгылара ишәҭап ҳәа. Араион аҟны иҟаҵоу маҷӡам, аха иҟаҵатәу рацәоуп аҧхьаҟагьы. Убри аҟнытә ҳалшарақәа еибыҭаны аус еицаауроуп зегьы», - иҳәеит Ахада.
Хьрыҧс Џьапуа Очамчыра араион Администрациа Ахада имаҵураҟны иусура аихшьала ҟаиҵеит.
«Есышықәса, ирацәамзаргьы, ҳбиуџьет аизырҳара ҳалҳаршон. Очамчыреи Аҟәеи рыбжьара амашьынамҩа аиҭашьақәыргылара акыр узеигәырӷьаша хҭысны иҟалеит. Ақыҭақәа жәпакы рҿы амҩақәа акаҭран рықәырҭәоуп. Аӡымҩангагақәа рышьақәыргылара ус бзиахеит. Шәара ибзианы ижәдыруеит Мықә ақыҭаҿы аибашьра ааилгазар ақыҭауаа аӡы шрымамыз. Уи даара ипроблема ӷәӷәан. Иахьа уаҟа ҩнаҭацыԥхьаӡа акранқәа рҟынтәи аӡы аауеит. Ҷлоу ақыҭа инхо ауааԥсыра ӡыла реиқәыршәаразы аусқәа лассы ихыркәшахоит. Ҭхьына ақыҭаҿы ҩ-еихагылак змоу ашкол аргылара иаҿуп ҳаамҭазтәи астандартқәа инарықәыршәаны, 140-ҩык аҵаҩцәа рҭыԥ амоуп. Аҽгәара ақыҭан ашкол аиҭашьақәыргылара иаҿуп. Очамчыра ақалақь аҿы ахәыҷбаҳча аргылара нап аркуп. Иара убас, Аԥсны Аџьынџьтәылатә еибашьраҿы иҭахаз аибашьцәа рыхьӡала амемориал аргыларазы аусурақәа мҩаԥысуеит. Уи аартхоит Аиааира 25ш. Ахыҵра аныҳәа инақәыршәаны“, - ҳәа азгәеиҭеит Хьрыԥс Џьапуа.
Уи иазгәеиҭеит Гиви Допуа ҳџьынџьуаа рыҧсадгьыл ахь рырхынҳәразы илшаз шырацәоу. Хьрыҧс Џьопуа араион Администрациа Ахада имаҵураҟны ақәҿиарақәа изеиҕьеишьеит.
Гиви Допуа анапхгара иҭабуп ҳәа реиҳәеит ирҭаз агәрагаразы.

«Хьрыԥс Радион-иԥа иҟаҵаз аусқәа ртәы далацәажәеит, аха ҳаԥхьаҟа иҟаҳҵараны иҟоу акыр иеиҳауп. Аибашьра ҳалҵзар, иҳалымшо иарбану. Ҳазегьы ҳажәҩахырқәа еибыҭаны аус ҳуроуп. Агәра згоит, ҳаидгыланы аус анеицаҳу, ҳҿаԥхьа иқәгылоу азҵаарақәа зегьы рыӡбара шҳалшо“, - иҳәеит Гиви Допуа.
05.jpg


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT