Аҧсны Аҳәынҭқарра Ахада

 

Аҧсны Ахада Адыгеиа Ареспублика Ахада Мураҭ Кумпилов диҧылеит

21.07.2018

Аҧсны Ахада Адыгеиа Ареспублика Ахада Мураҭ Кумпилов диҧылеит

Ҧхынгәымза 21 рзы Аҧсны Аҳәынҭқарра Ахада Рауль Ҳаџьымба Адыгеиа Ареспублика Ахада Мураҭ Кумпилов диҧылеит.

Аҳәынҭқарра Ахада Мураҭ Кумпилов аҧсшәа иеиҳәеит.

"Бзиала шәаабеит, ҳәа шәасҳәоит Мураҭ Каральби-иҧа, аҧсуа дгьыл аҿы. Сгәы иаанагоит, Адыгеиа Ареспубликеи ҳареи зырҿиара ҳаҿыз аимадарақәа аҧхьаҟагьы иеихаҳҳалоит ҳәа. Хымҧада, уи ҳара ҳзы акраҵанакуеит, иара убас Адыгеиа Ареспублика азгьы. Ҳара ҳаиашьаратә еимадарақәа азқьышықәсақәа иргәылсны иаауеит. Ҳара ҳаиҿцаалароуп есқьынгьы, аамҭа уадаҩқәа раан мацара акәымкәа.
Ибзианы иаҳгәалашәоит, Аҧсны Аџьынџьтәылатә еибашьраан (1992-1993ш.ш.) имҩаҧысуаз ахҭысқәа рҿы Адыгеиантәи хатәгәаҧхарала иааз аибашьцәа рлагала. Уажәшьҭа даҽа ҧсҭазаароуп зышьақәыргылара ҳаҿу, уи ҳажәларқәа рҭагылазаашьа аиӷьтәура иазкуп. Жәаҳәарада, ари аус аҟны рџьабаа рацәоуп Адыгеиа уаанӡатәи анапхгаҩцәа, ҳаизыҟазаашьақәа рҭоурых иузаҟәымҭхо иалоу, Аслан Џьаримов инаиркны анаҩстәи анапхгаҩцәа рҟынӡа.
Ҳара ҳзы даара акраҵанакуеит ҳаиашьаратә жәлари ҳареи ҳаигәныҩра, ҳаибабара, урҭ аҧхьаҟагьы аҿиара роуроуп. Ҳарҭ аиҩызара ҳабжьоуп, хымҧада, арҭ ҳаизыҟазаашьақәа иҵегьы рыҽдырҭбаароуп аекономика, акультура, агәабзиарахьчара, аҵарадырра ахырхарҭақәа рҟынгьы. Аусеицура ахьаҭаху аусхкқәа маҷӡам"- иҳәеит Ахада.

Мурат Кумпилов Ахада иҭабуп ҳәа иеиҳәеит иҟаиҵаз адкыларазы.

«Рауль, Џьумка-иҧа, иҭабуп идуӡӡаны. Хымҧада, раҧхьаӡакәноуп, Шәара иҟашәҵаз ааҧхьарала Шәара шәышҟа ҳаара шыҟалаз. Ҳара, Адыгеиа Ареспублика иқәынхо ауааҧсыра зегьы, ажәлар зегьы реиҧш, Аҧсны Аҳәынҭқарра гәыкала ҳазыҟоуп. Ииашаны иазгәашәҭеит, ҳара аиашьаратә жәларқәоуп, еишьцәаҵас ҳаизыҟоуп. Ҳәарада, аҧсҭазаара аганқәа зегьы рыла ҳаизыҟазаашьақәа ҿиалароуп. Убри аҟнытә иахьа ҳара арахь ҳаара акраҵанакуеит. Аиашазы, сара исыцу аделегациа ҳҳәынҭқарраҿы акрызҵазкуа уаауп: Апарламент Ахантәаҩы, Шәара шә-Министрцәа реилазаара, Аҧсны Аҳәынҭқарра Аиҳабыра аус рыцызуа, Аиҳабыра Ахантәаҩи Аминистрцәеи. Убри аҟнытә иахьа еиуеиҧшым ахырхарҭақәа рыла ҳусеицура ҳалацәажәараны ҳаҟоуп.
Ҳаҭыр ду шәықәысҵоит, убри аҟнытә, ҷыдала иаҵшьны иазгәасҭарц сҭахуп, ареспублика аделегациа хазы иалаҳкааит, Аиааира 25-шықәса ахыҵра аныҳәа азгәаҭара аҧхьа гәыблыла ишәҭаарц азы. Иҭабуп идуӡӡаны», - иҳәеит Мураҭ Кумпилов.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT