Аҧсны Аҳәынҭқарра Ахада

 

Ахада Урыстәылатәи Афедерациаҟнытә ақыҭанхамҩатә техника адкылара иазкыз аусмҩаҧгатә далахәын

20.07.2018

Ахада Урыстәылатәи Афедерациаҟнытә ақыҭанхамҩатә техника адкылара иазкыз аусмҩаҧгатә далахәын

Ҧхынгәымза 20 рзы Аҧсны Аҳәынҭқарра Ахада Рауль Ҳаџьымба Урыстәылатәи Афедерациаҟнытә иааз ақыҭанхамҩатә техника адкылара иазкыз аусмҩаҧгатә далахәын.

Рауль Ҳаџьымбеи Урыстәылатәи Афедерациа Ахада Владимир Путини реицәажәара инақәыршәаны, Аҧсны Аҳәынҭқарра иаҭан ақыҭанхамҩатә техника 57 цыреи 136 цыра ацраҳәага мыругеи, иааизакны, 200 миллион мааҭ рыхә.

«Иахьатәи ахҭыс даҽазныкгьы агәра ҳнаргоит Урыстәылатәи Афедерациеи ҳареи аусеицуразы иалаҳхыз амҩа иашаны ишылаҳхыз. Ари - аиқәшаҳаҭра хадеи уи арҿиара иазку егьырҭ аиқәшаҳаҭрақәеи рыла иҳабжьоу аимадара, ҳусеицура иалҵшәахеит. Ҳара Урыстәылатәи Афедерациа ахадара иҭабуп ҳәа раҳҳәоит ҳҭахрақәа иашаны иахьеилыркаауазы, ҳанхаҩы абас еиҧш иҟоу атехника имазарц азы алшарақәа ахьаҧырҵаз азы.

Иара убас, иҭабуп ҳәа расҳәоит ари аус иацхраауаз Урыстәылатәи ақыҭанхамҩа аминистрра. Агәра згоит ари аусбарҭа уаанӡатәи анапхгаҩи ҳареи ҳусеицура аԥхьаҟагьы аҿиара шаиуа.

Иахьа иҳазҳәаӡом атехника аганахь ала аиԥҟьара ҳамоуп ҳәа. Уажәшьҭарнахыс ҳмахәҿақәа еилҳәаны, ҳтәыла аизҳазыҕьаразы аусуроуп иаҭаху», -ҳәа азгәеиҭеит Ахада.

Урыстәылатәи Афедерациа Ақыҭанхамҩа аминистр актәи ихаҭыԥуаҩ Џьамбулат Хатуов аусмҩаԥгатә иалахәыз зегьы аԥсшәа реиҳәеит.

«Азин сышәҭозар, Урыстәылатәи Афедерациа Ахадеи Аиҳабыра Ахантәаҩи ақыҭанхамҩа аминистр Дмитри Николаи-иԥа Патрушев иҿаԥхьа иқәдыргылаз ауснагӡатәқәа рынагӡара иадҳәаланы ишәзааишьҭыз азеиӷьашьарақәа сырзааҭгылоит. Шәара ижәбартә еиҧш аҭагылазаашьа шәымоуп урыстәылатәи ақыҭанхамҩа иҭнажьуа аалыҵ. Иахьа ақыҭанхамҩа аихьӡарақәа, зегь раԥхьа иргыланы, амодернизациа иадҳәалоуп. Урҭ аихьӡарақәа ауҭраҭых аарыхреи абаҳча ааӡареи рзы адгьыл аус адулараҟны ҳаамҭа иақәшәо атехнологиа иабзоуроуп.

Иазгәаҳҭарц ҳҭахуп, аԥснытәи аалыҵ урыстәылатәи аџьармыкьаҿы акыр ахархәара шамоу. Агәра ҳгоит, Ахада дызлацәажәоз аимпульс, Аԥсны Аҳәынҭқарра аарыхҩцәа рхашәалақәа рышьҭыҵраҟнеиҧш, урыстәылатәи аџьармыкьаҿы ауҭраҭыхқәеи ашәырқәеи рыхкқәа реизырҳараҟынгьы ианыҧшуа иҟалоит», - иҳәеит Урыстәылатәи Афедерациа Ақыҭанхамҩа аминистр Актәи ихаҭыԥуаҩ Џьамбулат Хатуов.
A65A1395.JPGA65A1405.JPG


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT