Аҧсны Аҳәынҭқарра Ахада

 

Аԥсны Аҳәынҭқарра Ахада Рауль Ҳаџьымба Нхыҵ-Кавказтәи аусқәа рзы Урыстәылатәи Афедерациа аминистр дидикылеит

17.07.2018

Аԥсны Аҳәынҭқарра  Ахада Рауль Ҳаџьымба Нхыҵ-Кавказтәи аусқәа рзы Урыстәылатәи Афедерациа аминистр  дидикылеит

Ԥхынгәымза 17 рзы Аԥсны Аҳәынҭқарра Ахада Рауль Ҳаџьымбеи Нхыҵ-Кавказтәи аусқәа рзы Урыстәылатәи Афедерациа аминистри реиҧылара мҩаҧысит.

Ахада Сергеи Чеботариов аԥсшәа иеиҳәеит:

«Аԥсны шәбара сеигәырӷьоит. Ишәыдысныҳәаларц сҭахуп Аҧсны иадҳәалахо шәмаҵзура ҿыц. Ари ахырхарҭа Урыстәылеи ҳареи ҳаизыҟазаашьақәа рҿы акрызҵазкуа аҭыԥ ааннакылоит. Сгәы иаанагоит ҳусеицзура алихьӡарақәа аманы имҩаҧыслоит,» - ҳәа азгәеиҭеит аҳәынҭқарра Ахада.

Сергеи Чеботариов Ахада иҭабуп ҳәа иеиҳәеит.

«Иҭабуп идуӡӡаны, Рауль Џьумка- иԥа! Нхыҵ-Кавказтәи аусқәа рзы министрк иаҳасабала арахь саара сеигәырҕьоит. Сара сзы гәахәароуп ари амаҵзураҿы ҳаиашьаратә Республикақәа - Аԥсни, Аахыҵ Уаԥстәылеи рганахьала хәарҭа злоу аусура амҩаҧгара. Хымҧада, шәара ишышәҳәаз еиԥш, аус еицаҳаулоит уаанӡеиԥш, еффективла. Сара сганахьала, даҽазныкгьы ишьақәсырҕәҕәоит, аиҩызареи аицхыраареи рзы иҳабжьаҳҵахьаз аиқәшаҳаҭра ду инақәыршәаны, Урыстәылатәи Афедерациа ахы иаднаҵаз ҭакԥхықәрала ишазнеиуа.
Иазгәаҭазарц сҭахуп, Аԥсны смааижьҭеи акыр ҵуеит аҟнытә избоит шәара шәнапхгара иабзоураны имҩаҧысуа аиҭакрақәа. Ицәырҵуа иалагеит ахәаахәҭырҭа ҿыцқәа, ауаажәларратә крыфарҭатә наплакқәа, аԥсшьаҩцәа рзы аҭыԥ ҿыцқәа, аԥсшьарҭаҩнқәа, амҩақәа, - Урыстәылатәи Афедерациаҿы џьар-џьара иаашәыҵашьыцыртә еиԥш иҟоуп. Абасала, иахьа Аԥсны аихьӡарақәа маҷӡам. Абарҭқәа зегьы - Шәара шәнапхгареи, Аԥсны Аҳәынҭқарра анапхгареи ирыбзоураны.
Сгәы иаанагоит, аҭагылазаашьа иҵегьы аиҕьтәразы азҵаарақәа зегьы рганхьала алшарақәа рыҧшаара ҳалшап ҳәа », - иҳәеит Сергеи Чеботариов.

Ахада, ҷыдала, абасеиԥш иҟоу ахырхарҭала иҿиалароуп иҳәеит Урыстәылеи Аԥсни русеицура.

«Сгәы иаанагоит, арҭ аизыҟазаашьақәа абри ахырхарҭала иҿиалароуп ҳәа. Даҽакала ҟалашьа амаӡам. Арҭ апроцессқәа зегьы еилыкка иҟазароуп, хылаԥшрагьы рымазароуп аҩ-ганкгьы рганахьала. Шәареи ҳареи ҳазлацәажәо азҵааарақәа Аԥсназы акраҵанакуеит. Хымԥада, иахьа иеиуеиԥшым ахырхарҭақәа рыҟны адгылара ҳазҭо Урыстәыла, Аԥсны иаиуа афинанстә цхыраара аҟнытә алҵшәа бзиақәа ирзыҧшуп»,- иазгәеиҭеит Ахада.
538.jpg546.jpg


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT