Аҧсны Аҳәынҭқарра Ахада

 

Ашколқәа раушьҭымҭацәа рыдныҳәалара

27.06.2018

Рашәарамза 27 рзы Аҧсны Аҳәынҭқарра Ахада Рауль Ҳаџьымба 2018 шықәсазтәи Аҧсны ашколқәа раушьҭымҭацәа дрыдныҳәалеит.

Адныҳәаларатә цҳамҭаҟны, ҷыдала, иҳәоуп:

«Акыр иаҧсоу аушьҭымҭацәа, ҳаҷкәынцәа, ҳаӡҕабцәа!

Шәышьҭахьҟа иаанхеит игәырҕьахәу, аха аџьабааи агәацҧыҳәареи згым  ашколтә ҵарашықәсқәа. Шәара шәабиҧара роуп ҳаҧхьаҟа ишьҭызхраны иҟоу ихьыҧшым Аҧсны аҳәынҭқарра амчхара, аҧеиҧш!

Ҩашьара ақәым иҵегь ишеихашәҳауа шәҵара, шәдырра! Ишаашәырҧшуа аихьӡара ҿыцқәа  иалышәхраны иҟоу азанааҭқәа рҿы!  Агәра згоит шәырҵаҩцәеи шәҭаацәеи лацәааихьшь ҟамҵа, акыр шықәса  ишәырҭоз агәцаракра ду  шәара шәшаҧсахо зегь рыла: дыррала, ҧышәала, ҽазышәарала!
Анцәа ишәаҭәеишьааит агәыхәтәыхьӡара, – шәдырра аизырҳараҿы ақәҿиара ҿыцқәа! Гәык-ҧсыкала ишәзеиҕьасшьоит аманшәалара, аразҟы бзиа, агәамч ҕәҕәа!

Илашазааит, шәҭышла иқәҵазааит шәызныло аҧсҭазааратә мҩа!


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT