Аҧсны Аҳәынҭқарра Ахада

 

Ахада Очамчыра араион ахь аусуратә ныҟәара мҩаҧигеит

19.06.2018

Ахада Очамчыра араион ахь аусуратә ныҟәара мҩаҧигеит

Рашәарамза 19 рзы Аҧсны Аҳәынҭқарра Ахада Рауль Ҳаџьымба Очамчыра араион ақыҭақәа рахь аусуратә ныҟәара мҩаҧигеит.

Аҳәынҭқарра Ахада Ҷлоу ақыҭан аӡымҩангага аргылара шымҩаҧысуаз гәеиҭеит. Шьаҭанкылатәи аргылара аусбарҭа аиҳабы Игор Амқәаби аргыларатә усура мҩаҧызго ЗҲӘА «Проммонтаж-Сервис» аиҿкаара адиректор Џьумбер Нарманиеи аҳәынҭқарра Ахада адырра ирҭеит Ҷлоу ақыҭаҿы аӡымҩангара иазку апроект шынагӡоу азы. Ахада аргылаҩцәа ирыдиҵеит ишьақәырҕәҕәоу аграфик еиламгакәа, аусурақәа ианаамҭоу рхыркәшара.

«Шәгәышәҽанысҵоит, аусурақәа зегьы ҳазҭоу ашықәс цәыббрамзазы аграфик инақәыршәаны ианхыркәшамха, ари апроект знапы алаку зегьы аҭакҧхықәра шәыдҵахоит», - иаҵшьны иҳәеит Ахада.

Ахада иара убас дахәаҧшны ибеит Ҭхьына ақыҭаҿы азеиҧшҵараиурҭатә школ аргылара ахьымҩаҧысуа аҭыҧ. Аргыларатә фирма "Вефа-строй" адиректор Лаша Быҭәба аҳәынҭқарра Ахада аргылара шымҩаҧысуазы адырра иҭеит.

«Аҩбатәи аихагыла шьҭаҳхит. Уаҵәы ахыб ҳалагоит. Аргыларатә материал ааит, авокзал аҟны иҟоуп, иахьа иақәхны арахь иааҳгараны ҳаҟоуп. Ахыбҟаҵара ҳалгоит, анаҩс аҩныҵҟатәи аусурақәа напы дҳаркуеит. Ара 120-ҩык аҵаҩцәа рзы иазҧхьагәаҭоуп 14 класс уада», - иҳәеит Лаша Быҭәба.

Аргылара знапы иану аиҿкаара адиректор иазгәеиҭеит аобиект афинансзоужьра агымхакәа ишаауа, аусурақәа зегьы ишьақәырҕәҕәоу аграфик инақәыршәаны ишымҩаҧысуа.

Ахада иара убас дахәаҧшит Мықә ақыҭаҟны аӡы аиагаразы адгьылаҵаҟатәи аӡцарҭақәа ахьыҟоу аҭыҧ. Адгьылаҵаҟатәи аӡцарҭақәа рыҟнытә Очамчыра ақалақь аӡы аиуеит амагистралтә ӡымҩангагала. Аконструкциа ахәҭак аҧхасҭа иаиуз иахҟьаны адгьылаҵаҟатәи амкьаҭ (резервуар) ахь ақалақь зегьы иазхартә еиҧш иаҭаху аӡы знеиӡом.

Шьаҭанкылатәи аргыларатә усбарҭа аиҳабы ихаҭыҧуаҩ Асҭамыр Џьыкырба Ахада иеиҳәеит аӡымҩангага аҭыӡқәа ахьынӡабгаз агәаҭареи анаҩс урҭ реиҭашьақәыргылареи рзы  иҟоу аҭагылазаашьа инеизакны аҭҵаара шаҭаху, раҧхьа иргыланы, агидрологиатә ҭҵаарақәа шымҩаҧгатәу атәы.

Ахада иаҵшьны иҳәеит иаҭаху зегьы шыҟаҵатәу аӡцарҭақәа қәнагала рышьақәыргыларазы.

A65A9673.JPG


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT