Аҧсны Аҳәынҭқарра Ахада

 

Ахада Еиду Амилаҭқәа Реиҿкаара (ИУНИСЕФ) Ахәыҷтәы Фонд Ахада Лаила Омар Гад дылҧылеит

18.06.2018

Ахада  Еиду Амилаҭқәа Реиҿкаара (ИУНИСЕФ) Ахәыҷтәы Фонд Ахада Лаила Омар Гад дылҧылеит


Рашәарамза 18 рзы Аҧсны Аҳәынҭқарра Ахада Рауль Ҳаџьымба Лаила Омар Гад дидикылеит Еиду Амилаҭқәа Реиҿкаара (ИУНИСЕФ) Ахәыҷтәы Фонд Ахада лаҳасабала Аҧсны Аҳәынҭқарраҟны аҵыхәтәантәи лвизит инамаданы.

Лаила Омар Гад аҳәынҭқарра Ахада адырра илҭеит ИУНИСЕФ ахәыҷқәа рыхьчара аусхк аҟны, иара убас аҵараиуреи агәабзиарахьчареи русхкқәа рыҟны имҩаҧнаго апроект хадақәа рзы. Уи иазгәалҭеит Аҟәа ақалақьи, Гәдоуҭеи Гагреи араионқәа рыҟни ахәыҷқәеи аҭаацәарақәеи асоциалтә дгылара рыҭаразы амаҵзура шаҧҵаз. Ари амаҵзура аусура иалагеижьҭеи араионқәа хҧа рыҟны ицәырҵит 15 –ҩык ипрофессионалтәу асоциалтә усзуҩцәа, 250 ҭаацәара ацхыраара рыҭан, лҳәеит Лаила Омар Гад. Асоциалтә маҵзура иааиҧмырҟьаӡакәа ацхыраара зҭатәу рганахьала адгылара ҟазҵо аусбарҭақәа, Аҵареи аҭҵаарадырреи рминистрра, Агәабзиарахьчара аминистрра, Аџьеи, аусура напалакреи асоциалтә еиқәыршәареи рзы аминистрра аинформациа рырҭоит. 

Лаила Омар Гад илҳәеит зқьы инареиҳаны арҵаҩцәа ИУНИСЕФ атренингқәа ишырхысыз ҳазҭагылоу аамҭазтәи ахаҭара-хықәктәы рҵара аметодиказы. Уи иара убас иазгәалҭеит Аҵареи аҭҵаарадырреи рминистрра алархәны аҧсуа бызшәа арҿиара иазкыз азеиҧш проектқәа шымҩаҧгаз. Арҭ апроектқәа рҳәаа иҭагӡаны иҭыжьын аиҵбыратәи ашкол азы аҧсуа бызшәа иазку ацхыраагӡа шәҟәы, ахәыҷқәа рзы ипрофессионалым ашәҟәыҩҩцәа ражәабжьқәа реизга, иара убас еиҭаҭыжьын ахәыҷқәа рзы Андреи Ҷоҷуа иажәабжьқәа реизга.
Ахада арҭ апроектқәа рыхә ҳаракны ишьеит, иазгәеиҭеит аҧсуа бызшәа арҿиаразы ас еиҧш ацхыраагӡақәеи ашәҟәқәеи аҵак ду шрымоу.
Аҧсны Аҳәынҭқарра аспециалистцәа ИУНИСЕФ аҟнытә рколлегацәа жәларбжьаратәи рҧышәа рымырдар бзиоуп ҳәа азгәеиҭеит аҳәынҭқарра Ахада. Ихадароу уснагӡатәны иаҳзықәгылоуп аҧхьаҟа ҳтәыла ахала азҵаарақәа жәпакы рыӡбара алшартә еиҧш аҟаҵара, - иаҵшьны иҳәеит Ахада.
Лаила Омар Гад илҳәеит аҧхьаҟагьы Аҧсны Аҳәынҭқарра ахадареи Еиду Амилаҭқәа Реиҿкаара (ИУНИСЕФ) Ахәыҷтәы Фонди лыҵшәабзиала русеицура анагӡара алыршахоит агәыҕра шлымоу.

7F5A0167.JPG


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT