Аҧсны Аҳәынҭқарра Ахада

 

Ахада «Аҧсни Урыстәылеи аҧхьагылаҩцәа ҿарацәа: ҧхьаҟа ацара» захьӡыз Москва имҩаҧысуаз афорум далахәын

17.06.2018

Ахада «Аҧсни Урыстәылеи аҧхьагылаҩцәа ҿарацәа: ҧхьаҟа ацара» захьӡыз Москва имҩаҧысуаз афорум далахәын


Рашәарамза 15 рзы Аҧсны Аҳәынҭқарра Ахада Рауль Ҳаџьымба Аҧсны Аҳәынҭқарреи Урыстәылатәи Афедерациеи рҿар реиҿкаараақәа русеицура абжьаратә еихшьалақәа, иара убас аҧхьагылаҩцәа ҿарацәа реимадарақәа рырҕәҕәаразы аҧшьгара ҿыцқәа ирызкыз Москва имҩаҧысуаз «Аҧсни Урыстәылеи аҧхьагылаҩцәа ҿарацәа: ҧхьаҟа ацара» захьӡыз афорум далахәын.

Аҳәынҭқарра Ахада иқәгылараҟны афорум иалахәыз ихы рықәкны иҟаиҵаз ажәахә аҟны иҳәеит:  

«Иахьа аҿарацәа гәацҧыҳәарала ҳҳәынҭқаррақәа рыҧсҭазаара рҽаладырхәуеит. Аҧхьагылаҩцәа ҿарацәа ҳәа ахьӡ аҧсахара, ҳтәылақәа рыҩныҵҟа аҭагылазаашьақәа рыҧсахра хықәкыс измоу аҿарацәа реиҿкаарақәа раҧҵара - арҭ зегьы, хымҧада, уаҩы дзыргәырҕьо усқәоуп. Аҧхьагылаҩ – аҧхьа игыланы ауаа амҩа иаша дзырбо, игәра ганы ишьҭалаз ауаагьы иаргьы еидгыланы ажәлар зызиргәыҕыз анагӡара зылшо иоуп, уи атәыла аизҳазыҕьаразы илшо зегьы ҟаиҵоит. Ҳәарада, абас еиҧш аҟазшьақәа змоу ауаа иҟоу ауадаҩрақәа рыӡбара рылшоит. Даара ирацәоуп ҳара ҳҿар зыӡбара рылшо азҵаарақәа. Иахьатәи аамҭа ус иаҭахны иқәнаргылоит, иаҭахны иҟанаҵоит аҿар аполитика ралархәра, аҿар анаплакратә усура амҩаҧгаразы иҵегьы алшарақәа рыҭара. Аҳәынҭқарра акәзар, абизнес маҷи абжьаратәи абизнеси знапы алаку аҿар реизааигәатәразы зыда ҧсыхәа ыҟам аҭагылазаашьақәа раҧҵара алшароуп. Аха убри аан, абиҧара ҿыцқәа рганахьалагьы максималла алҵшәагьы ыҟазароуп аҳәынҭқарра шьақәгыларц азы.  

Ҳара ҳтәыла аҭагылазаашьа мариаӡам. Аха аибашьрашьҭахь 25 шықәса имҩаҧысуаз аҳәынҭқарра аргылареи иахьа иҳамоу жәларбжьаратәи азхаҵарақәеи агәра удыргоит амҩа иаша ҳшану. Урыстәыла адгылара ҳнаҭоит, афинанстә, аекономикатә лшарақәа ҳзаҧнаҵоит. Аха сара изныкымкәа исҳәахьеит, аҩыза ицхыраара акраҵанакуеит, аха ҳәынҭқаррак аҳасабала инагӡаны ашьақәгылара ҳалшароуп.

Аҧсны Урыстәыла иҟанаҵо ацхыраара ахархәара алшоит ҳреспублика аекономика ахырхарҭа хадақәа рырҿиараҟны. Ари, ҳәарада, атуризми аграртә сектори роуп. Урҭ ирыбзоураны ҳара ҳекономика ашьақәыргылара ҳалшоит.

Хымҧада, арҭ апроцессқәа зегьы ирылахәзароуп аҿаргьы. Иахьа сара агәра ганы исҳәар сылшоит, аҳәынҭқарратә мчхара асистемаҟны аҿар аӡәырҩы шыҟоу. Урҭ гәацҧыҳәарала аус руеит, иеиуеиҧшым аилазаарақәа ирыдҧхьалоуп, ачын ҳаракқәа ааныркылоит. Иаҳҳәап, аекономика аминистр. Арҭ аҿарацәа аҳәынҭқарратә усураҿы изызнеиз рдыруеит, рнапы иану аус азы аҭакҧхықәра ашьҭыхра иазхиоуп. Сара гәыкала сеигәырҕьоит Аҧснеиҧш, Урыстәылагьы ҳтәылақәа реизҳазыҕьара ахьӡала аусура иазхиоу аҿар ахьҳамоу. Ҳара Аҧсны иҳамоуп Аҿартә политиказы аҳәынҭқарратә еилакы, Адипломатцәа ҿарацәа рхеилак, дара зегьы иеиуеиҧшым аусхкқәа рыҟны аус руеит. Аҧхьагылаҩцәа ҿарацәа ирызҳалароуп, иҿиалароуп аҧхьаҟа дара анапхгара рыҭара алыршахарц азы. Сара ус ишыҟало агәра згоит.

Ҳара ҳзы акраҵанакуеит Урыстәылеи ҳареи ҳабжьара аизыҟазаашьақәа рышьақәыргылара. Иароуп ҳара раҧхьа ҳазхазҵаз, стратегиатә партниорсгьы иҳамоу. Ҳара ҳәынҭқаррак аҳасабала ашьақәгылара ҳалшароуп, Урыстәылатәи Афедерациаҿгьы адунеи зегьы аҿгьы аҵыхәтәантәи ашықәсқәа рзы имҩаҧысуа ахҭысқәа баша ишыҟамлаз рбартә еиҧш. Урыстәылазы 2008 шықәса нанҳәамзазтәи ахҭысқәа рышьҭахь аҭагылазаашьа уадаҩын. Ҳара Урыстәыла шиашоу ашьақәырҕәҕәара ҳалшароуп. Уажәааигәа Шьамтәыла ҳазханаҵеит. Адунеи зегьы ари аҳәынҭқарра иаҿагылоуп, Урыстәылоуп иара иадгылоу. Шьамтәыла Аҧсни Алада Уаҧстәылеи разхаҵара иацәымшәаӡеит. Макьана егьырҭ атәылақәа ирылшаӡом ари аҩыза ашьаҿа аҟаҵара, аха иаалырҟьаны адунеи зегьы ҳазхарҵароуп ҳәа иҳаҧхьаӡаӡом. Адәныҟатәи аусқәа рминистрреи Урыстәыла анапхгареи русеицурала ҳара абри аганахьала аихьӡарақәа ҳауеит ҳәа сгәы иаанагоит. Аҵыхәтәан, ҳара зегьы ақәҿиарақәа ҳзеиҕьасшьарц сҭахуп, ҳусеицура арҕәҕәара, ҳәарада, Урыстәыла иеизаку акоманда ашьапылампыл асразы Адунеи ачемпионат аҟны - аиааира», - иҳәеит Ахада, иажәа хыркәшо. 

Аҿар русқәа рзы Афедератлтә усбарҭа анапхгаҩы ихаҭыҧуаҩ Екатерина Драгунова афорум иалахәыз ирылалҳәеит Урыстәыла аҿартә политика ахырхарҭа хадақәеи аҧснытәии урыстәылатәии аҿар иеицырзеиҧшу апроектқәеи ртәы, ҷыдала, анаплакра аусхк аҟны.

«Иҭабуп ҳәа шәасҳәарц сҭахуп аҿари ҳзеиҧш проектқәеи ирышәҭо адгыларазы. Сгәы иаанагоит ҳусура еиҳагьы гәыцҧыҳәарала иацҵахоит ҳәа»,- иазгәалҭеит лара. 

Аҿартә политиказы аҳәынҭқарратә еилакы Ахантәаҩы Ҭемраз Кәакәасқьыр далацәажәеит Аҧсны аҿартә политика ахырхарҭа хадақәа ртәы. Уи иара убас иазгәеиҭит Аҿар русқәа рзы Урыстәылатәи афедералтә усбарҭа аҧышәеимдара ишазхиоу, уи Аҧсны Аҳәынҭқарра аҷыдарақәа ҳасаб рзуны, Аҳәынҭеилакы аусураҟны хархәара шанаҭо.

Урыстәылатәи Аҿар Реидгыла Ахантәаҩы Павел Красноруцки Ахада изеиҭеиҳәеит Аҧсны Аҳәынҭқарра аделегациа Шәача имҩаҧысуаз Адунеизегьтәи аҿари астудентцәеи рфестиваль қәҿиарала ишалахәыз, иара убас аиҿкаара имҩаҧнаго апроекттә усура атәы. Ажәалагалагьы ҟаиҵеит аҩ-тәылак рыҟны атуризм арҿиара хықәкыс измоу аҧсны-урыстәылатәи аҿар ртуристтә центр аҧҵаразы. 

Урыстәыла Адәныҟатәи аусқәа рминистрра Адипломатцәа ҿарацәа рхеилак ахантәаҩы ихаҭыҧуаҩ Арег Агасариан Ахада иҭабуп ҳәа и еиҳәеит Аҧсны Адәныҟатәи аусқәа рминистрра Адипломатцәа ҿарацәа рхеилак Шәача имҩаҧысуаз Адунеизегьтәи аҿари астудентцәеи рфестиваль ралахәраҿы иҟаиҵаз адгыларазы, далацәажәеит Аҧсни Урыстәылеи Адипломатцәа ҿарацәа рхеилак русеицура ахьымҩаҧысуа ахырхарҭақәа ртәы.

Аҧсны Аҳәынҭқарра Адәныҟатәи аусқәа рминистрра Адипломатцәа ҿарацәа рхеилак ахантәаҩы Инар Ладариа авидеоконференциа аформат аҳәаа инҭагӡаны афорум иалахәыз ирзеиҭеиҳәеит Шәача имҩаҧысуаз Адунеизегьтәи аҿари астудентцәеи рфестиваль атәы, аиҿкааратә еилакы иалахәу иҭабуп реиҳәеит лыҵшәа змоу русуразы.

Афорум аҟны ирылаҳәан Аҧсны Аҳәынҭқарреи Урыстәылатәи Афедерациеи рҿартә политикаҟны аусеицура арҕәҕәара иазкыз акымкәа аҧшьгарақәа, ҷыдала, Аҧсны аҿар рпарламент аҧҵареи уи иеиҧшу Урыстәылатәи аилазаара аус ацуреи, «Аҧсны аҧхьагылаҩцәа» захьӡу урыстәылатәи аицлабра иеиҧшу аицлабра аиҿкаареи». 

Ахада идгалаз аҧшьгарақәа дрыдгылеит, иара убас иазгәеиҭеит урҭ аҿар аҳәынҭқарра аҧсҭазаара ралархәразы аҭагылазаашьа рызҭо акы акәны ишыҟоу.

12.JPG

 

 


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT