Аҧсны Аҳәынҭқарра Ахада

 

Ахада Ашәарҭадаратә хеилак аилатәара мҩаҧигеит

07.06.2018

Ахада Ашәарҭадаратә хеилак аилатәара мҩаҧигеит

Рашәарамза 4 рзы Аҧсны Аҳәынҭқарра Ахада Рауль Ҳаџьымба Ашәарҭадара Ахеилак аҩныҵҟатәии адәныҟатәии аполитиказы аилацәажәара иазку аилатәара мҩаҧигеит.

Аҧсны Аҳәынҭқарреи Шьамтәылатәи Арабтә Республикеи русеицура азҵааразы аҳәынҭқарра Ахада Адәныҟатәи аусқәа рминистр идиҵеит аҳәынҭқаррақәа рыбжьара адипломатиатә еизыҟазаашьақәа ҵакыла ргәылырҭәаара, ҷыдала, ихацырктәуп Шьамтәылеи Аҧсни реиҧылара аҽазыҟаҵара, аиҧылара ахьымҩаҧгатәу аҭыҧи егьырҭ азҵаарақәеи рзы шьамтәылатәи аган ргәаанагара ҳасаб азуны.

Адәныҟатәи аусқәа рминистр Даур Ақаҩба Ахада адырра ииҭеит аҳәынҭқарра Ахада шьамтәылатәи аган Аиқәшаҳаҭра апроект рақәшаҳаҭхаразы инапы ианҵаз аусура шымҩаҧысуа атәы. Лаҵарамза 4 рзы имҩаҧысит Аҧсны Аҳәынҭқарраҟны иҟоу Аҷыдалкаатәии Азимчзмоуи Урыстәылатәи Афедерациа Ацҳаражәҳәаҩи Урыстәылатәи Афедерациаҟны иҟоу Аҷыдалкаатәии Азимчзмоуи Шьамтәылатәи Арабтә Республика Ацҳаражәҳәаҩи реиҧылара. Ари аиҧылараҟны иалацәажәан Аҧсны Аҳәынҭқарра Ахада Шьамтәылаҟа иусуратә ныҟәара алыршара, иара убас Башар Асад Рауль Ҳаџьымба иҟнытә ашәҟәы изышьҭын Аҧсны Аҳәынҭқарра аҭааразы ааҧхьара иҭаразы.

Аҧсны Аҳәынҭқарра Адәныҟатәи аусқәа рминистр шьамтәылатәи аган ашҟа Аҧсны Аҳәынҭқарреи Шьамтәылатәи Арабтә Республикеи рыбжьара “Аиҩызареи аусеицуреи рзы” аиқәшаҳаҭра апроект дәықәиҵеит.

Аилацәжәараҟны иара убас ирылацәажәан атәылаҟны акриминогентә ҭагылазаашьеи, азинлеишәеи, ашәарҭадареи рызҵаарақәа.

«Иазгәасҭарц сҭахуп аҵыхәтәантәи аамҭазы аҭыҧ змаз ацәгьоура бааҧсқәа раартраҟны алҵшәа бзиақәа шыҟоу. Ишьақәыргылоу аҿҳәарақәа раан ахара зыдҵоу зегьы рус ӡбазароуп. Азинхьчаратә усбарҭақәа рнапхгаҩцәа рнапы ианысҵоит акриминал аҿагыларазы русеицура дырҕәҕәарц.

Аҩныҵҟатәи аусқәа рминистр аҧхын амаҵзура амҩаҧгара арҕәҕәаразы иҳадигалаз азҧхьагәаҭа еиламгакәа дықәныҟәароуп. Атуристцәа ршәарҭадара – ихадароу ҳуснагӡатәқәа ируакуп. Аҳәынҭқарратә автоинспекциа аусура ҷыдала хылаҧшра аҭазароуп.

Аӡәгьы ихамышҭроуп акурорттә аамҭа шааиуа, ари аамҭа ҳара ҳуааҧсыра даара ргәыҕрақәа адырҳәалоит. Аҧснынтәи ицо иарбанзаалак иҵоурам аинформациа хара имгакәа ирылаҵәоит, ахҟьа-ҧҟьа бааҧсқәагьы ахылҵуеит. Ҳгәылара – ҳаиҩызаратә ҳәынҭқарраҟны имҩаҧысраны иҟоуп адунеитә ҵакы змоу аныҳәа – Адунеи ачемпионат. Ари аусмҩаҧгатә инадҳәалангьы ҳадгьыл аҿы еиҿагыларак ҟамлароуп. Аӡәгьы азин иаҳҭаӡом ҳреспубликаҟны аҭагылазаашьа аруадаҩра, аҭышәныртәалара аилагара. Амчрақәагьы аоппозициа аҧхьагылаҩцәагьы ирдыруазароуп аконструктивтә диалог ада даҽа мҩакы шыҟам. Даҽакала аӡәы ахҭысқәа рырҿиара иақәикыр – уи азинеилагаратә акциақәа ралмыршаразы амчқәа ҳамоуп», - иҳәеит Ахада.

 


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT