Аҧсны Аҳәынҭқарра Ахада

 

Аҧсны Аҳәынҭқарреи Шьамтәылатәи Арабтә Республикеи рыбжьара наҟ-ааҟтәи азхаҵареи адипломатиатә еизыҟазаашьақәа рышьақәыргылареи инарымаданы Ахада иҟаиҵаз Ааҧхьара

29.05.2018

Лаҵарамза 29 рзы Аҧсны Аҳәынҭқарра Ахада Рауль Ҳаџьымба Москва усуратә визитла иҟазааран Аҧсны Аҳәынҭқарреи Шьамтәылатәи Арабтә Республикеи рыбжьара наҟ-ааҟтәи азхаҵареи адипломатиатә еизыҟазаашьақәа рышьақәыргылареи инарымаданы ааҧхьара ҟаиҵеит.

***

2018 шықәса лаҵарамза 29 Аҧсны Аҳәынҭқарреи Шьамтәылатәи Арабтә Республикеи ирыларҳәеит аҩ-тәылак рыбжьара наҟ-ааҟтәи азхаҵареи Ацҳаражәҳәара аҩаӡараҟны адипломатиатә еизыҟазаашьақәа рышьақәыргылареи. Ари ианыҧшуеит дара аусхкқәа зегьы рыҟны аизыҟазаашьақәа рырҿиаразы ирымоу азеиҧш хықәкы.

Ари ахҭыс аҧхьа Аҧсны Аҳәынҭқарра Адәныҟатәи аусқәа рминистрра, Аҧсны Аҳәынҭқарраҟны иҟоу Урыстәылатәи Афедерациа Ацҳаражәҳәарҭа, егьырҭ Аҧсны Аҳәынҭқарра аусбарҭақәа рыҟны аусура мҩаҧган. Имҩаҧысит аҧснытәии шьамтәылатәии аофициалтә хаҿқәа реиҭанеиааирақәа, аимадарақәа шьақәыргылан.

Лаҵарамза 28 рзы Урыстәылатәи Афедерациаҟны имҩаҧысит Аҧсны Аҳәынҭқарреи, Шьамтәылатәи Арабтә Республикеи, Алада Уаҧстәылатәи Ареспубликеи х-ганктәи реиҧылара. Аиҧылараан Ацҳаражәҳәаҩцәа еизыразны ирыдыркылеит атекст, иеибырҳәеит акоммиунике аҭыҵра арыцхә, иақәнагоу анотақәа еимырдеит.

Ҳара ахә ҳаракны иаҳшьоит Шьамтәылатәи Арабтә Республика иҟанаҵаз ашьаҿа, агәра ҳгоит ҳаизыҟазаашьақәа аҳаҭыреиқәҵареи аусеицуреи рҟазшьақәа рыманы ишыҿиало. Сгәы иаанагоит, хара имгакәа, шьам дгьыл аҟны аҭынчра шшьақәгылоит ҳәа, уи ажәларгьы аҭынч ҧсҭазаара аргылара напы адыркуеит ҳәа.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT