Аҧсны Аҳәынҭқарра Ахада

 

Аҧсны Аҳәынҭқарра Ахада Урыстәылатәи Афедерациа Ацҳаражәҳәаҩ иҟнытә аофициалтә шәҟәы иҭара иазку ацеремониа

15.05.2018

Аҧсны Аҳәынҭқарра Ахада Урыстәылатәи Афедерациа Ацҳаражәҳәаҩ иҟнытә аофициалтә шәҟәы иҭара иазку ацеремониа


Лаҵарамза 15 рзы имҩаҧысит Аҧсны Аҳәынҭқарра Ахада Рауль Ҳаџьымба Урыстәылатәи Афедерациа Аҷыдалкаатәи Азинмчызмоуи Ацҳаражәҳәаҩ Алексеи Двинианин иҟнытә агәраргагатә шәҟәы иҭара иазку ацеремониа.

***

Рауль Ҳаџьымба: «Ҳаҭыр зқәу Алексеи Аркади-иҧа, азин сышәҭозар гәык-ҧсыкала бзиала шәаабеит Аҧсныҟа ҳәа шәаҳәаны, амаҵура аанкылара шәыдысныҳәаларц сҭахуп.

Сынтәа Аҧсны Урыстәыла нанҳәамза 2008 шықәсазы иаднакылаз аҭоурыхтә зыӡба 10 шықәса ахыҵра азгәанаҭоит. Ари аӡбамҭа Аҧсни Алада Уаҧстәылеи рҭоурых еиҧш, Урыстәылатәи аҳәынҭқарразы акрызҵазкуа хҭысны иҟалеит.

Ҳҳәынҭқарра ахьыҧшымра азхаҵара иашьҭанеиуа ашықәсқәа рыҩныҵҟала Аҧсны Аҳәынҭқарра иалшеит жәларбжьаратәи ауаажәларразы зыгәрагоу, аҭакҧхықәра ныҟәызго партниорны ишыҟоу ашьақәырҕәҕәара. Аҧсны аҧхьаҟагьы зхәыцрыла, ҭакҧхықәрала аусеицура иазхиоуп аҧсны-урыстәылатәи астратегиатә еизыҟазаашьақәа ганрацәала реизырҳара аҭахны ишыҟоу аарҧшуа.

Урыстәыла-аҧснытәи аизыҟазаашьақәа аҿиара ишаҿу азы гәыҩбара ыҟаӡам. 10 шықәса рыла ҩ-ганктәи аусеицуразы азинтә уасхыр ҕәҕәа шьҭаҵоуп, аидгылареи астратегиатә партниоррреи рзы Аиқәшаҳаҭрагьы убрахь иналаҵаны.

Иахьа ҿыҕәҕәала иуҳәар ҟалоит, урыстәыла-аҧснытәи аҳәынҭқаррабжьаратә еимадарақәа аҵак ҷыда шьҭырхуеит ҳәа, Нхыҵкавказ аҭагылазаашьа аҿиара инадҳәаланы агәреибагараҟны, аҭышәынтәалараҟны, ашәарҭадараҟны ароль ду нарыгӡоит.

Иҳаҩсыз ашықәсқәа рзы Урыстәылатәи Афедерациа знысыз ашьақәгылара амҩа мариамызт. Убас шакәызгьы Урыстәыла иалшеит иҕәҕәоу, ихьыҧшым атәыла астатус ашьақәырҕәҕәара, шәышықәсала иааиуа аҳәынҭқарра аҵасқәа реиқәырхара.

Аҧсны ахә ҳаракны иршьоит Урыстәылатәи Афедерациеи ҳареи иҳабжьоу аидгыларатә еизыҟазаашьақәа, аҧсны-урыстәылатәи аинырра ганрацәала арҵаулара аҵак ду арҭоит.

Ҳара аиҩызареи аилибакаареи рымацара ракәӡам еидызкыло. Шәареи ҳареи аҭоурыхи адемократиеи, ҳҳәынҭқаррақәа аҧхьаҟагьы реизҳазыҕьара иузаҟәымҭхо иадҳәалоу ҳфырхаҵаратә ҭоурых еидҳәалоуп. Сгәы иаанагоит ҳалшарақәа еицҵаны шьаҿ-шьаҿала ҳастратегиатә партниорра ашьақәырҕәҕәара амҩа ҳацәхьаҵуам ҳәа.

Ҳаҭыр зқәу Алексеи Аркади-иҧа, Шәара шәнапы алашәкуеит ибзианы ижәдыруа адипломатиатә усура. Шәнапы иануп акырџьара ҳтәылақәа ирзеиҧшу азҵаарақәа рыҟны рҿаҧхьа иқәгылоу ауснагӡатәқәа рыӡбара.

Ҳаҭыр зқәу Алексеи Аркади-иҧа, ишәыду аҭакҧхықәра ҳаракы зцу аус аҟны ишәзеиҕьасшьоит аихьӡара дуқәа.

Бзиала шәаабеит ҳәа шәаҳҳәоит Аҧсны!»


Алексеи Двинианин: «Ҳаҭыр зқәу Ахада, ҳаҭыр зқәу Рауль Џьумка-иҧа, ҳаҭыр зқәу Адәныҟатәи аусқәа рминистр Даур Владимир-иҧа, ҳаҭыр зқәу Аҧсны Аиҳабыра!  Сара сзы ҳаҭыр дууп Аҧсны иҟоу Урыстәылатәи Афедерациа Ацҳаражәҳәаҩыс саҭара. 13 шықәса ззыскыз атәыла, раҧхьа аҧсны-қырҭтәылатәи аизыҟазаашьақәа рҭышәныртәалара азҵаарақәа, анаҩс 2008 шықәса нанҳәамза 26  инаркны, Аҧсны Аҳәынҭқарра Урыстәылатәи Афедерациа ианазханаҵа ашьҭахь шәреспублика иахьатәи аамҭа иақәшәо, идемократиатәу, иеизҳазыҕьо ганрацәала аҿиара  ацхыраара аҭара саҿын.  Урыстәылатәи Афедерациа Ахада Урыстәылатәи Афедерациа Адәныҟатәи аусқәа рминистрра абжьгарала ари амаҵура санаиҭоз снапы ианиҵеит Рауль Џьумка-иҧа ишиҳәаз еиҧш, ихадароу ҩ-ганктәи аиқәшаҳаҭрақәа шьаҭас измоу ахырхарҭа адгылара аҭара. Сара зыӡбахә сымоу «Аиҩызареи, аусеицуреи, аицхыраареи рзы” 2008 шықәсазтәи Аиқәшаҳаҭра, иара убас 2014 шықәса абҵарамза 24 аҟнытә «Аидгылареи астратегиатә усеицуреи рзы» Аиқәшаҳаҭра ауп.

Агәра ганы сыҟоуп, аиҩызаратә еизыҟазаашьақәа, аицхыраара, ҳҳәынҭқаррақәа реизҳазыҕьара ахырхарҭа аҧхьаҟагьы ишацҵахо. Ҳаҭыр зқәу Ахада, агәра шәсыргар сҭахуп,  Урыстәылатәи Афедерациа Ахада Владимир Владимир-иҧа Путин ари ахырхарҭа ганрацәала арҭбааразы исыдиҵаз азы исылшо зегьы шыҟасҵо. Ҳәарада, аҧхьаҟатәи сусураҿы сара ганрацәалатәи аусеицура, аҧснытәи аганахьала аицхыраара  сақәгәыҕуеит. Иҭабуп».

 

1.JPG 


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT