Аҧсны Аҳәынҭқарра Ахада

 

Ахада Гәдоуҭа араион ахада иҧылара мҩаҧигеит

11.05.2018

Ахада Гәдоуҭа  араион ахада иҧылара мҩаҧигеит

7F5A1057-11-05-18-11-58.JPG

Лаҵарамза 11 рзы Аҧсны Аҳәынҭқарра Ахада Рауль Ҳаџьымба аусуратә еиҧылара мҩаҧигеит Гәдоуҭа араион Ахада Руслан Ладариа далархәны.

 Руслан Ладариа Ахада изҵаарақәа рҭак ҟаҵо, аҳасабырба ҟаиҵеит 2017 шықәсатәи абиуџьет анагӡара инадҳәаланы. 

«Гәдоуҭа араион абиуџьет еиҳарак шьақәгылоит акурорттә аамҭа инадҳәаланы. Убри аҟнытә ҵыҧхтәи ашықәсзы иазҧхьагәаҭаз 422 миллион мааҭ рҭыҧан инагӡан 385 миллион мааҭ. Имааиӡеит – 37 миллион, урҭ рхыҧхьаӡараҟны иҟоуп 24 миллион – Афонҿыцтәи аҳаҧи Риҵатәи амилаҭтә парки рыҟнытәи иааираны иҟаз. Ари ҟалеит арҭ аҭыҧқәеи, иааизакны ҳраиони ирҭаауаз аҧсшьаҩцәа рхыҧхьаӡара ахьылаҟәыз иахҟьаны. 37 миллион  – маҷӡам. Ари аицҵалыҵ ахархәарала аҵараиура, агәабзиарахьчара, иара убас ақыҭа адгылара аҭара ирыдҳәалоу апроектқәа рынагӡара ҳақәгәыҕуан. Амзызқәагьы ыҟан, -  атурист ишьра, Приморское ақыҭаҟны иҟалаз артҟәацра. Ареспубликатә биуџьет аҟнытә есышықәса иҳауаз ацхыраарала Гәдоуҭа араион абиуџьетуаа руалафахәқәа ианаамҭаз ашәара алҳаршеит. Аминистрцәа реилазаара аганахьала иҭабуп ҳәа раҳҳәар ҳҭахуп иҟаз ауадаҩрақәа рнаҩсангьы, ианаамҭаз ацхыраара ахьҳарҭоз азы. Ҳгәыҕуеит сынтәа аҭагылазаашаь еиҕьхап ҳәа ҵыҧх аасҭа», - иҳәеит Руслан Ладариа.

Аҳәынҭқарра Ахада иаҵшьны иҳәеит, ашәахтәқәа ршәара зықәнагоу аобиектқәа раарҧшразы аусура шырҕәҕәатәу. Лассы-лассы асасааирҭатә комплексқәа аҭааҩцәа рацәаны измоу, асааирҭақәа раҳасабала ишадырбо.  

«Арҭ аобиектқәа зегьы ашәҟәы иҭагалазароуп, аҳәынҭқарраҟны ирықәу ашәахтәқәа ршәалароуп. Ара аусура ду мҩаҧгазароуп ашәҟәҭагалареи аконтроль ҟаҵареи рзы», - иазгәеиҭеит Ахада.

Руслан Ладариа иҳәеит иашьашәалоу аусбарҭақәа русзуҩцәа злахәу акомиссиа Гәдоуҭа араион аҟны аобиектқәа ашәҟәы рҭагалара шымҩаҧырго адгьыл азы ашәахтә араион аҟны ихаҭәааны иахьшәам азы.   Аҳәынҭқарра Ахада иазгәеиҭеит ламысцқьала ашәахтәқәа зегьы зшәо атәылауаа алкааны ишазгәаҭатәу, урҭ ҿырҧшыганы ишыҟаҵалатәу. 

Гәдоуҭа араион Ахада аҳасабырба ҟаиҵеит иара убас  ареспубликатәи араионтәи биуџьет ахархәарала асоциалтә-економикатә ҿиаразы Аинвестициатә программа анагӡара азҵаарақәа рзы.

«Аинвестпрограммала иазҧхьагәаҭаны иҳамоу аусура амҽхак дууп. Уи аиҳарак 2019 шықәсазы ихыркәшахароуп. Аҵараиура аусхк аҟны –  Лыхни Гәдоуҭеи ақыҭақәа рыҟны ашколқәа ҩба, ахәыҷбаҳача - Афон ҿыц иҟоу. Аусура ду мҩаҧысуеит  ақыҭақәеи ақалақьқәеи ӡыла реиқәыршәаразы. Ақалақь аҟны реиҭашьақәыргылара мҩаҧысуеит амҩақәа ҧшьба: Ӡиӡариа имҩа, март 4-амҩа, Арӡынба имҩа, Афырхацәа рымҩа ду. Иҧсахуп аӡымҩангагақәа, ацрыҵ царҭақәа, аӡымҩангара асистема шьақәыргылоуп.  Амҩақәа ҩба рыҟны ҩымчыбжьа рыҩныҵҟала акаҭран ақәҵаразы аусура иалагараны иҟоуп», - иҳәеит Руслан Ладариа.

Ахада иара убас дазҵааит Аҧсны Аџьынџьтәылатә еибашьра амузеи аргыларатә усурақәа рымҩаҧысшьа атәы.  Руслан Ладариа иҳәеит аусура финансла аиқәыршәараҿы ауадаҩрақәа ахьыҟоу иахҟьаны аамҭала аусурақәа шаанкылоу. Ҳазҭагылоу аамҭазы афасад ашәра иазхиоуп, ахыбра аҩныҵҟа аусурақәа реиҭахыцыркра дшазхиоу афинансзоужьра аныҟала нахыс. Ахада иаҵшьны иҳәеит афинанстә зҵаарақәа шыӡбахо, араион Ахада иганахьала Амузеи аҟны имҩаҧысуа аусура зҿлымҳара ду аҭаны ахылаҧшра шаҭаху.   

7F5A1100-11-05-18-11-58.JPG


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT