Аҧсны Аҳәынҭқарра Ахада

 

Ахада 1941-1945 шш. Аџьынџьтәылатә еибашьра дуӡӡа аветеранцәа дырҧылеит

09.05.2018

Ахада 1941-1945 шш. Аџьынџьтәылатә еибашьра дуӡӡа аветеранцәа дырҧылеит

Лаҵарамза 9 рзы Аҧсны Аҳәынҭқарра Ахада 1941-1945 шш. Аџьынџьтәылатә еибашьра дуӡӡа аветеранцәа дырҧылеит.

Аҳәынҭқарра Ахада аветеранцәа иҭабуп ҳәа реиҳәеит, иагьрыдиныҳәалеит Аиааира Амш.


***

Акыр иаҧсоу аветеранцәа!

Ишәыдысныҳәалоит иҧшьоу аныҳәа – Аиааира Амш!

Иазгәаҳҭо аныҳәа ду агәырҕьареи алахьеиқәреи зцу ныҳәоуп. Ари аныҳәа 73 шықәса раҧхьа ҳапланета иқәу ажәларқәа зегьы еиднакылеит.

Акыр иаҧсоу аветеранцәа! Шәара даҽаӡәы иеиҧшымкәа ижәдыруеит ари Аиааира аагара шаҟа иуадаҩыз. Иахьа ҳхырхәоит уи аибашьра хлымӡаах иалаӡыз миллионҩыла ауаа ргәалашәара аҿаҧхьа.

Аџьынџьтәылатә еибашьра дуӡӡа иалахәын 55 нызқьҩык Аҧсны аҵеицәеи аҭыҧҳацәеи. Урҭ рахьтә 17,5 нызқьҩык Аҧсадгьыл ахьчаразы игылаз, рхәышҭаарақәа рахь изыхнымҳәӡакәа, аибашьра адәқәа рҿы иҭахеит, рыҧсадгьыл еиҧш, ауаатәыҩса зегьы рхақәиҭра иазықәҧо.

Акраҵанакуеит Аҧсны Кавказ ахьчара аиҿкаара аус аҿы инанагӡаз ароль. 46-тәи архәҭақәеи, аҭыҧантәи анырҵәаратә баталионқәеи ирыбзоураны, хацәнмырха аибашьра ашьҭахь аҕа иаанкылара алыршахеит, шьҭахьҟагьы дыҧхьацан. Абри анаҩс Гитлер ир Кавказ агаразы ирымаз апланқәа зегьы хырбгалан.

Иҳаҩсыз аҧхынразы ашьха қыҭа Ҧсҳәы хьӡы-ҧшала анышә иамадан 1942 шықәсазы аҕа имца иаҿагыланы аибашьраҿы иҭахаз 33 – ҩык арҟаҧшьаа рыбаҩ. Аҧшааратә експедициақәа ирыцҵатәын Асовет ар асолдаҭцәа ззықәҧоз Кавказ ашьхақәа рымҵан рызқәаҭыҧ рыҧшааразы.

Рыхьӡ кашәара ақәым хацәнмырха аҕа иҿагылаз афырхацәа!

Ибзианы иаҳгәалашәоит иара убас атыл аҟны ааҧсарак ҟамҵакәа атәылахьчараҿы аибашьҩыцәа иарҕьажәҩаны ирывагылаз. Аҭагылазаашьақәа мариамызт ашахтиорцәа рықалақь Тҟәарчал иааиҧмырҟьаӡакәа Амшынеиқәа афлоти Нхыҵкавказ анаплакқәеи былтәыла ианеиқәнаршәоз. Аҧсны ауааҧсыра имаҷымкәа ҧарала ацхыраара ҟарҵеит атанктә колоннақәеи, аибашьыга ҳаирпланқәеи, аторпедатә катерқәа рыргыларазы. Аџьынџьтәылатә еибашьра дуӡӡаан Аҧсны ахи-аҵыхәеи 46 арратә хәышәтәырҭақәа еиҿкаан.

Хьӡи-ҧшеи рыгымзааит анацизм иаҿагыланы абиҧара ҿыцқәа рхы иақәиҭны анхаразы аҧсҭазаареи аҿиареи рзы алшарақәа рзаазгаз Аҧсадгьыл ахьчаҩцәа!

Акыр иаҧсоу аветеранцәа, насыҧ ҳамоуп ҳәа иҳаҧхьаӡоит, иахьа хаҭала ари амш шәыдныҳәаларазы аҭагылазаашьа ахьҳамоу. Иаҳҭахуп аҧхьаҟагьы акыр шықәса шәаргьы ҳаргьы ари аныҳәа ду еицазгәаҳҭаларц. Иҭабуп ҳәа шәаҳҳәоит иаашәырҧшыз агәымшәаразы, ахамеигӡаразы. Аҧсадгьыл абзиабареи уи аҿиареи, аизҳазыҕьареи рзы иҟаҵатәу ҳзырбаз, ҳамҩақәызҵаз шәоуп шәара.

Ҽааныбзиала шәнеиааит! Аиааира Амш шәагымзааит!


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT