Аҧсны Аҳәынҭқарра Ахада

 

Ахада Нестор Лакоба диижьҭеи 125 шықәса аҵра иазкыз аусмҩаҧгатәқәа дрылахәын

01.05.2018

Ахада Нестор Лакоба диижьҭеи 125 шықәса аҵра иазкыз аусмҩаҧгатәқәа дрылахәын

Лаҵарамза 1 азы Аҧсны Аҳәынҭқарра Ахада Рауль Ҳаџьымба иналукааша аҳәынҭқарратә усзуҩы, 1922 – 1936 шш. раан асоветтә Аҧсны анапхгаҩы Нестор Лакоба диижьҭеи 125 шықәса аҵра иазкны Гәдоуҭа имҩаҧысыз аусмҩаҧгатәқәа дрылахәын.

Ахада Нестор Лакоба Аҧсны аҭоурых аҿы ҭыҧс иаанникылоз азгәеиҭеит.

"Ҳаҧсадгьыл Аҧсны аҭоурых аҿы  иҟоуп  иналукааша аҧхьагылаҩцәа. Урҭ дыруаӡәкуп Нестор Аполлон-иҧа Лакоба. Иара иқәҧара, тәамҩахә ҟамҵа иусура зегьы азкын ижәлар рхьыҧшымра, иҧсадгьыл ахақәиҭра. Нестор Лакоба иеиҧш иҟаз  аҳәынҭқарратәи, ауаажәларратәи усзуҩцәа нагақәа иуадаҩыз аамҭақәа рзы ирылшеит  ҳажәлар реидкылара, ахьыҧшымра абираҟ иаҵаргыланы ҧхьаҟа ргара.  
Ҳара даара гәцаракрала, обиективла ахәшьара раҳҭалароуп ҳҭоурыхи , ҳазнысыз амҩеи, урҭ ирыцыз атрагедиатә хҭысқәеи.
Иҵегьы инарҵауланы иҭаҳҵаалароуп ҳаҧсуа политикцәа хатәрақәа, ҳмилаҭтә интеллигенциа  сталинтә режим аан ирхыргаз арыцҳарақәа, массалатәи  арепрессиақәа рҵыхәтәа бааҧсқәа. Аҭоурыхтә ҵабырг ган рацәала, факт рацәала  иҭҵаамкәа, ишьақәыргыламкәа,  ҳара иҳалшом ҧхьаҟатәи ҳперспектива ду азхәыцра, уи мҽхакы ҭбаала арҿиара. 
Сгәанала,  ииашоуп аҵыхәтәантәи аамҭазы Нестор Лакобеи Ефрем  Ешбеи реиҩызара, рыҧсадгьылазы урҭ реицықәҧара аҧышәа  иазкны аконференциақәа ахьымҩаҧысуа, еицырдыруа ҳҵарауаа алархәны. 
Ҳиашахоит, ҳауаажәларгьы ҳаилыркаауеит,  ҳҳәынҭқарра ашьаҭаркыҩцәа  рытрагедиатә лахьынҵақәа  ҳрылацәажәалар, дара зҭагылаз аамҭа-уадаҩ  ахәшьара иаша  азуа, апринциптә зҵаарақәа рзы дара реизыразра аҧыжәара аҭо", - азгәеиҭеит Ахада.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT