Аҧсны Аҳәынҭқарра Ахада

 

Ахада Аминистрцәа реилазаара Геннади Гагәлиа дыдирдырит

25.04.2018

Мшаҧымза 25 рзы Аҧсны Аҳәынҭқарра Ахада Рауль Ҳаџьымба Аминистрцәа реилазаара Аҧыза-министр Геннади Гагәлиа дыдирдырит.

Аҳәынҭқарра Ахада иазгәеиҭеит ари аусуратә процесс иахәҭакны ишыҟоу.

«Ари усуратә процессуп. Ааи, иҟоуп аихьӡарақәа, иҟоуп аилагарақәагьы, Аминистрцәа реилазаараҟны агхақәагьы ыҟоуп. Ари аӡәгьы мап ацәикӡом, аха уи џьоукы шахцәажәо еиҧш иҟаӡам. Иахьа иӡбатәу азҵаарақәа ртәы ҳҳәозар, урҭ анапхгаҩ ҿыц хырхарҭас ирыҭатәуи иӡбатәуи дахылаҧшуеит.

Аминистрцәа реилазаара аусура иацҵахоит, ҳҿаҧхьа иқәгылоу азҵаарақәа ҳаӡбалароуп. Иҟоуп ауадаҩрақәа, аха урҭ ҳаҩныҵҟатәи аҭагылазаашьақәа рымацара ирхьыҧшӡам. Изныкымкәа исҳәахьеит Урыстәыла акәша-мыкәша имҩаҧысуа апроцессқәа ирыдҳәалоу шыҟоугьы. Уи ҳара ҳасаб азаҳуроуп, адунеи аҿы иҟоу аҭагылазаашьа ҳаргьы ҳадҳәалоуп азы.

Анапхгаҩ ҿыц шәидгыланы аус жәуроуп. Сгәы иаанагоит Геннади Леонид-иҧа Аминистрцәа реилазаараҟны иусура атәы жәдыруеит, дасу иусушьа ҕәҕәала хылаҧшра аиҭоит ҳәа», - иҳәеит Ахада.

Ахада иара убас хшыҩзышьҭра азиуит аусура-еиҿкааратә леишәа. Аҳәынҭқарра Ахада Беслан Барцыц иҭабуп ҳәа иеиҳәеит имҩаҧигаз аусуразы, иҳәеит даҽа уск аҿы илшарақәа раарҧшразы аҭагылазаашьақәа маҷымкәа ишыҟоу.

Беслан Барцыц Аминистрцәа реилазаара иҭабуп ҳәа реиҳәеит шықәсыки бжаки рыҩныҵҟа русеицуразы.

«Иҟаз аамҭақәа мариаӡамызт. Иҳалшаз рацәоуп, аҧхьаҟагьы иҟаҵатәу ыҟоуп. Геннади Леонид-иҧа иҧышәеи идыррақәеи ирыбзоураны аҳәынҭқарра Ахада ҳганахьала дыззыҧшу алҵшәақәа риура алыршахоит. Ҳазҭагылоу ашықәсгьы мариаӡам, арҭ азҵаарақәа зегьы рыҟны Ахада иганахьала иҳадыз адҵақәа зегьы анапхгаҩ ҿыци шәареи аҵыхәанӡа рнагара шәылшап ҳәа сгәы иаанагоит. Геннади Леонид-иҧа, ишәзеиҕьасшьоит ақәҿиарақәа, шәҧышәа дуӡӡеи шәзанааҭтә ҟазшьақәеи ртәы здыруеит. Агәра ганы сыҟоуп шәыззыҧшу, шәзықәгәыҕуа зегьы рынагӡара шәылшоит ҳәа», - иҳәеит иара.

Геннади Гагәлиа, Аминстрцәа реилазаара иалахәу ихы рықәкны иҳәеит:

«Ҳара аҳәынҭқарра аргылара ҳаҿуп, ари аҳәынҭқарраҿы ҳазегьы ҳсолдаҭцәоуп. Ҳазегьы аус еицаҳуроуп. Ари аҩыза аҭагылазаашьа сақәшәоижьҭеи хынтәуп. Ҳаҧсадгьыл азы иҟаҵатәу ҳазхәыцны аусура ҳалагоит. Гхақәак ҳаур Ахада дыҟоуп, ҳзыриашо, аха Аминистрцәа реилазаара ажәҩа иқәу маҷӡам. Ҳара ҳусура иахьыҧшу рацәоуп. Аусура ианаамҭоу хаҭабзаиарала анагӡара - абри ауп сара аусураҿы сзықәныҟәо. Ҳаҧсадгьыл ишҳаднаҵо еиҧш аусура ҳалагароуп», - иаҵшьны иҳәеит Геннади Гагәлиа.

 


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT